वाढदिवसाच्या निमित्ताने साईबाबांच्या चरणी भक्तांकडून सोनं-चांदीचं दान

शिर्डी : मुंबईतील एका साई भक्ताने वाढदिवसानिमित्त शिर्डीत साईबाबा संस्थानकडे आज सोमवार 22 जानेवारी रोजी दोन किलो वजनाचा चांदीचा अष्ठलक्ष्मी दिवा दान केला. तसंच, दिल्ली येथील एका साईभक्त परिवाराने 3 तोळे वजनाचा सोन्याचा मोर पंख आज साईबाबांच्या चरणी दान केला. अयोध्येत श्री राम प्राणप्रतिष्ठा सोहळा होत असताना, साई भक्तांनी आज हे दान दिलं आहे. 68 वर्षे वय असलेल्या मुंबई येथील साईभक्त अनिल जेठवणी यांनी शिर्डी साईबाबांना 2 किलो वजनाचा चांदीचा अष्ठलक्ष्मी दिवा दान स्वरूपात दिलाय. जेठवणी या साईभक्त परिवाराने मागच्या वर्षीही वाढदिवसाच्या निमित्ताने शिर्डी साईबाबांच्या चरणी चांदीचा ग्लास, चांदीचं ताट, चांदीचा चमचा भेट स्वरूपात दिला होता. याचवेळी दुसऱ्या भक्ताने मोर पंखही दिला आहे.