കാസർകോട്: സംസ്ഥാനത്ത് പൊതുമേഖലയിൽ ആദ്യമായി കടൽജലം ശുദ്ധീകരിച്ച് കുടിവെള്ളമാക്കി വീടുകളിലെത്തിക്കുന്നതിന് സൗരോർജത്തിൽ പ്രവർത്തിക്കുന്ന പ്ലാന്‍റ് വരുന്നു. കാസർകോട് വികസന പാക്കേജിൽ (കെഡിപി) ഉൾപ്പെടുത്തിയുള്ള പദ്ധതിക്ക് ഭരണാനുമതിയായി. 300 വീടുകളിലേക്ക് കുടിവെള്ളമെത്തിക്കാൻ 1.40 കോടി ചെലവിലാണ് മഞ്ചേശ്വരത്ത് പ്ലാന്‍റ് സ്ഥാപിക്കുന്നത്.
ടെൻഡറെടുക്കുന്ന സ്ഥാപനം പ്ലാന്‍റ് നിർമിച്ച്‌ ഓപ്പറേറ്ററെ നിയോഗിക്കും വിധമാണ്‌ പദ്ധതി. സൗരോർജത്തിലാണ് പ്ലാന്‍റ് പ്രവർത്തിക്കുക. ഇത്തരം പ്ലാന്‍റുകൾക്ക് വൈദ്യുതിച്ചെലവ് ഏറുമെന്നതിനാലാണ് സൗരോർജം ഉപയോഗിക്കുന്നത്.
മഞ്ചേശ്വരം ഗ്രാമ പഞ്ചായത്ത് സെക്രട്ടറിയാണ് പദ്ധതിയുടെ നിർവഹണ ഉദ്യോഗസ്ഥൻ. പദ്ധതിക്ക് കേരള ജല അതോറിറ്റി സാങ്കേതിക സഹായവും നിർവഹിക്കും. കൂടാതെ സർക്കാർ മേഖലയിലുള്ള കേരളത്തിലെ ആദ്യത്തെ സൗരോർജം ഉപയോഗിച്ചുള്ള കടൽ ജല ശുദ്ധീകരണ പ്ലാന്‍റിന്‍റെ നടത്തിപ്പിന് ജില്ലാ കലക്‌ടർ ചെയർമാനായും സ്പെഷ്യൽ ഓഫിസർ കാസർകോട് വികസന പാക്കേജ്, കേരളാ ജല അതോറിറ്റി, എൽഐഡി & ഇഡബ്ല്യു, സിഡബ്ല്യു, ആർഡിഎം എന്നീ സ്ഥാപനങ്ങളിലെ എഞ്ചീനീയർമാർ മെമ്പർമാരുമായ ഒരു ടെക്‌നിക്കൽ കമ്മിറ്റിയും, ഗ്രാമ പഞ്ചായത്ത് പ്രസിഡന്‍റ് ചെയർമാനായ ഒരു ഓപ്പറേഷൻസ് ആൻഡ് മെയ്‌ന്‍റനൻസ് കമ്മിറ്റിയും രൂപീകരിച്ചാണ്‌ പ്ലാന്‍റിന്‍റെ നിർമാണം ആരംഭിക്കുക.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
ജില്ലയിൽ കുടിവെള്ള ക്ഷാമം രൂക്ഷമായ ഒരു പ്രദേശമായത് കൊണ്ടാണ് മഞ്ചേശ്വരം പഞ്ചായത്തിനെ പദ്ധതിക്ക് വേണ്ടി തെരഞ്ഞെടുത്തതെന്ന് ജില്ലാ കലക്‌ടര്‍ കെ ഇമ്പശേഖർ അറിയിച്ചു. ജില്ലയിൽ ഒരു പ്രയോറിറ്റി ആന്‍റ് എക്‌സപിരിമെന്‍റൽ മോഡൽ എന്ന നിലയിലാണ് ഈ പദ്ധതി ആവിഷ്‌കരിക്കുക എന്നും പ്രവൃത്തി ഉടന്‍ ടെണ്ടർ ചെയത് ആരംഭിക്കുമെന്നും കാസർകോട് വികസന പാക്കേജ് സ്‌പെഷ്യല്‍ ഓഫിസർ വി ചന്ദ്രൻ അറിയിച്ചു.
പ്രതിദിനം 500 ലിറ്റർ കുടിവെള്ളമെത്തിക്കും: ജല അതോറിറ്റി വിതരണം ചെയ്യുന്ന അതേനിരക്കിൽ ഉപഭോക്തൃ വിഹിതം സമാഹരിച്ച് ഒരു വീടിന് പ്രതിദിനം 500 ലിറ്റർ കുടിവെള്ളമെത്തിക്കാനാകുമെന്നാണ് അധികൃതരുടെ പ്രതീക്ഷ. സൗരോർജം ഉപയോഗിക്കുമ്പോൾ ഒരു കിലോലിറ്റർ ജലം ശുദ്ധീകരിക്കാൻ ഒന്നരരൂപയാണ് പ്രാഥമികമായി ചെലവായി കണക്കാക്കുന്നത്.
വെള്ളത്തിന്‍റെ ഉത്പാദനം കൂടുകയാണെങ്കിൽ ഗ്രാമപ്പഞ്ചായത്തിന് അധികവരുമാനമെന്ന നിലയിൽ വിപണിസാധ്യത മുൻനിർത്തി കുപ്പിവെള്ളം വിതരണത്തിലേക്കും തിരിയാം. കുടുംബശ്രീ അംഗങ്ങൾക്കുൾപ്പെടെ തൊഴിൽ ലഭ്യമാക്കാനുള്ള സാഹചര്യവുമുണ്ടാകും.
Also Read: കേരളത്തിലെ ആദ്യ 'ജലബജറ്റ് തയ്യാർ; എന്താണ് ജലബജറ്റ് എന്നറിയാം
