പത്തനംതിട്ട: ലോക വിപണിയെ ലക്ഷ്യമിട്ട് കഥകളിക്കോപ്പുകളും കഥകളി ശില്‍പങ്ങളും ഒരുക്കുകയാണ് അയിരൂർ കഥകളി മ്യൂസിയം. സാംസ്‌കാരിക വകുപ്പിന്‍റെ ഗ്രാമീണ കലാകേന്ദ്രം പദ്ധതിയില്‍ ഉള്‍പ്പെടുത്തി ആരംഭിച്ച കഥകളിക്കോപ്പ് കഥകളി ശില്‍പ നിര്‍മാണ പരിശീലന കേന്ദ്രം ഏറെ പ്രതീക്ഷകളാണ് കഥകളിയുടെ പേരിൽ അറിയപ്പെടുന്ന ഈ ഗ്രാമത്തിന് നൽകുന്നത്.
ഒരടി മുതൽ ഒരാൾ പൊക്കം വരെയുള്ള ശിൽപങ്ങളാണ് കലാകേന്ദ്രത്തിൽ നിർമിക്കുക. പച്ച, കത്തി, കരി, താടി തുടങ്ങിയ എല്ലാ കഥകളി വേഷങ്ങളും ഇവിടെ നിർമ്മിക്കും. കുമിൾതടിയിൽ നിർമിക്കുന്ന രൂപത്തില്‍ ആടയാഭരണങ്ങൾ അണിയിച്ചാണ് കഥകളി ശിൽപങ്ങൾ ഒരുക്കുന്നത്.
സംസ്ഥാന സാംസ്‌കാരിക വകുപ്പിന്‍റെ ഗ്രാമീണ കലാകേന്ദ്രം പദ്ധതിയ്‌ക്ക് കീഴിലാണ് കഥകളി കോപ്പ് കഥകളി ശിൽപ നിർമാണ പരിശീലന കേന്ദ്രം പ്രവര്‍ത്തിക്കുന്നത്. 15 വനിതകള്‍ അടങ്ങിയ സ്വയം സഹായ സംഘമാണ് നിലവില്‍ പരിശീലനം നേടുന്നത്.
ജില്ല കഥകളി ക്ലബിന്‍റെ മേല്‍നോട്ടത്തിലാണ് സ്വയം സഹായ സംഘത്തിന്‍റെ പ്രവര്‍ത്തനം. പ്രശസ്‌ത കഥകളി കലാകാരനും കഥകളി ശിൽപ വിദഗ്‌ധനുമായ കരിക്കകം ത്രിവിക്രമനാണ് പരിശീലനത്തിന് നേതൃത്വം നൽകുന്നത്. പ്രശസ്‌ത പള്ളിയോട ശിൽപ്പി അയിരൂർ ചെല്ലപ്പനാചാരിയും പരിശീലകനായുണ്ട്.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
രണ്ട് മാസം കൊണ്ട് അംഗങ്ങളുടെ പരിശീലനം പൂര്‍ത്തിയാകും. പിന്നീട് ഇവിടെ നിര്‍മിക്കുന്ന ശില്‍പങ്ങളും കഥകളിക്കോപ്പുകളും വിപണിയിലേക്ക് എത്തും. കഥകളിക്കോപ്പ്, കഥകളി ശിൽപം എന്നിവക്ക് ലോകമെങ്ങും വലിയ സാധ്യതയാണുള്ളതെന്നും കഥകളി ക്ലബ്ബ് ഭാരവാഹിയായ എം ആർ വേണു പറഞ്ഞു.
കലാകേന്ദ്രത്തിൽ പരിശീലനാർഥികളുടെ ആദ്യ ശിൽപത്തിൻ്റെ നിർമാണം പൂർത്തിയായിട്ടുണ്ട്. പ്രവർത്തനം പൂർണ തോതിൽ ആവുന്നതോടെ ഇതിൽ പ്രവർത്തിക്കുന്ന വനിതകൾക്ക് നല്ലൊരു വരുമാന മാർഗമാവുമെന്നതിന് പുറമെ കഥകളിക്കും കഥകളി ഗ്രാമത്തിനും കൂടുതൽ പ്രചാരം ലഭിക്കുകയും ചെയ്യുമെന്ന പ്രതീക്ഷയിലാണ് സംഘാടകർ.
Also Read : പാഴ്‌വസ്‌തുക്കൾ കരകൗശല വസ്‌തുക്കളാകും; കുപ്പിയിലും ഗുളികയുടെ കവറിലും കഥകളി ഭാവങ്ങൾ പകർത്തി രമണി ടീച്ചർ
