കോഴിക്കോട്: രാജ്യസഭാ സീറ്റുമായി ബന്ധപ്പെട്ട് അപ്രതീക്ഷിത നീക്കവുമായി പാണക്കാട് സാദിഖലി ശിഹാബ് തങ്ങൾ. സുപ്രീം കോടതി അഭിഭാഷകൻ ഹാരിസ് ബീരാൻ മുസ്ലീം ലീഗിന്‍റെ രാജ്യസഭ സ്ഥാനാർഥി ആയേക്കും. കുഞ്ഞാലിക്കുട്ടിക്ക് താൽപര്യമുള്ള പിഎംഎ സലാമിന്‍റെയും പികെ ഫിറോസിന്‍റെയും യൂത്ത് ലീഗ് ദേശീയ ജനറൽ സെക്രട്ടറി അഡ്വ. ഫൈസൽ ബാബുവിന്‍റെയും പേരുകൾ മറികടന്നാണ് തങ്ങളുടെ തീരുമാനം.
വിഷയത്തിൽ യൂത്ത് ലീഗിനിടയിൽ അമർഷമുണ്ട്. രണ്ട് ദിവസത്തിനകം തീരുമാനമുണ്ടാകും. ലോക്‌സഭാ തെരഞ്ഞെടുപ്പ് ഫലം പുറത്തുവന്നതിന് ശേഷം രാജ്യസഭ സ്ഥാനാർഥിയുടെ കാര്യം ചർച്ച ചെയ്യുമെന്നായിരുന്നു നേരത്തെ കുഞ്ഞാലിക്കുട്ടിയുടെ പേര് ഉയര്‍ന്നുവന്നപ്പോള്‍ പറഞ്ഞിരുന്നത്.
എന്നാല്‍, മത്സരിക്കാനില്ലെന്ന് കുഞ്ഞാലിക്കുട്ടി തന്നെ വ്യക്തമാക്കുകയും ചെയ്‌തിരുന്നു. അതേസമയം, ഇത്തവണ മുസ്ലീം ലീഗ് സ്ഥാനാർഥി പുതുമുഖമായിരിക്കുമെന്ന് സാദിഖലി ശിഹാബ് തങ്ങൾ വ്യക്തമാക്കിയിരുന്നു. യുവാക്കൾക്കായിരിക്കും പരിഗണനയെന്നും അദ്ദേഹം പറഞ്ഞിരുന്നു. ലീഗ് യോഗത്തിന് ശേഷം ഔദ്യോഗിക പ്രഖ്യാപനം പ്രതീക്ഷിക്കാം.
ALSO READ : മലപ്പുറത്ത് ഇ.ടി മുഹമ്മദ് ബഷീറിന് മികച്ച വിജയം; ലീഗിന്‍റെ ഉരുക്ക് കോട്ടയ്‌ക്ക് ഇളക്കമില്ല
