ബെംഗളൂരു: ഐപിഎല്‍ പതിനേഴാം പതിപ്പില്‍ (IPL 2024) പഞ്ചാബ് കിങ്‌സിനെതിരായ (Punjab Kings) മത്സരത്തില്‍ ബാറ്റുകൊണ്ട് തകര്‍പ്പൻ പ്രകടനമാണ് ആര്‍സിബിയുടെ (RCB) സ്റ്റാര്‍ ബാറ്റര്‍ വിരാട് കോലി (Virat Kohli) കാഴ്‌ചവെച്ചത്. ചിന്നസ്വാമിയില്‍ 177 റണ്‍സ് പിന്തുടരുന്നതിനിടെ ആര്‍സിബിയുടെ ടോപ് ഓര്‍ഡര്‍ തകര്‍ന്നെങ്കിലും മത്സരത്തില്‍ അവരെ പിടിച്ചുനിര്‍ത്തുന്നതായിരുന്നു വിരാട് കോലിയുടെ പ്രകടനം. സീസണിലെ ആദ്യ മത്സരത്തില്‍ ചെന്നൈ സൂപ്പര്‍ കിങ്‌സിനെതിരെ നിരാശപ്പെടുത്തിയ കോലി രണ്ടാമത്തെ കളിയില്‍ തന്‍റെ മികവ് തെളിയിച്ചു.
മത്സരത്തില്‍ 49 പന്ത് നേരിട്ട കോലി 77 റണ്‍സ് നേടിയാണ് പുറത്തായത്. 11 ഫോറും രണ്ട് സിക്‌സറും അടങ്ങുന്നതായിരുന്നു പഞ്ചാബിനെതിരായ കോലിയുടെ ഇന്നിങ്‌സ്. ഈ പ്രകടനത്തോടെ, ടി20 ക്രിക്കറ്റില്‍ മറ്റൊരു ഇന്ത്യൻ താരത്തിനും അവകാശപ്പെടാനില്ലാത്ത തകര്‍പ്പൻ റെക്കോഡും കോലി തന്‍റെ പേരിലാക്കി.
ഐപിഎല്ലില്‍ വിരാട് കോലിയുടെ 51-ാം അര്‍ധസെഞ്ച്വറിയായിരുന്നു പഞ്ചാബിനെതിരായ മത്സരത്തിലേത്. ഇതോടെ, ടി20 ക്രിക്കറ്റില്‍ 100 പ്രാവശ്യം 50-ല്‍ അധികം റണ്‍സ് കണ്ടെത്തുന്ന ആദ്യ ഇന്ത്യൻ ബാറ്ററെന്ന നേട്ടമാണ് കോലി സ്വന്തം പേരിലാക്കിയത്. ടി20യില്‍ 81 തവണ 50-ല്‍ അധികം റണ്‍സ് നേടിയിട്ടുള്ള മുൻ മുംബൈ ഇന്ത്യൻസ് നായകൻ രോഹിത് ശര്‍മയാണ് പട്ടികയില്‍ കോലിക്ക് പിന്നിലുള്ള മറ്റൊരു ഇന്ത്യൻ താരം.
ക്രിസ് ഗെയില്‍, ഡേവിഡ് വാര്‍ണര്‍ എന്നിവരാണ് ലോക ക്രിക്കറ്റില്‍ ഈ നേട്ടം സ്വന്തമാക്കിയിട്ടുള്ള മറ്റ് ബാറ്റര്‍മാര്‍. തന്‍റെ കരിയറില്‍ ക്രിസ് ഗെയില്‍ 110 പ്രാവശ്യം 50ല്‍ അധികം റണ്‍സ് കണ്ടെത്തിയിട്ടുണ്ട്. രണ്ടാമനാമയ ഡേവിഡ് വാര്‍ണര്‍ 109 തവണയാണ് 50+ സ്കോര്‍ അടിച്ചുകൂട്ടിയിട്ടുള്ളത്.
അതേസമയം, പഞ്ചാബ് കിങ്‌സിനെതിരായ മത്സരത്തില്‍ അക്കൗണ്ട് തുറക്കും മുന്‍പ് ലഭിച്ച ലൈഫ് മുതലെടുത്തുകൊണ്ടായിരുന്നു വിരാട് കോലി ആര്‍സിബിയുടെ റണ്‍ ചേസിനെ മുന്നില്‍ നിന്നും നയിച്ചത്. പവര്‍പ്ലേയില്‍ പഞ്ചാബ് ബൗളര്‍മാരെ കടന്നാക്രമിച്ചുകൊണ്ടായിരുന്നു കോലിയുടെ ഇന്നിങ്‌സിന്‍റെ തുടക്കം. സാം കറൻ, കഗിസോ റബാഡ, അര്‍ഷ്‌ദീപ് സിങ് എന്നിവരെല്ലാം കോലിയുടെ ബാറ്റിന്‍റെ ചൂടറിഞ്ഞു.
എന്നാല്‍, മറുവശത്ത് വിക്കറ്റുകള്‍ നഷ്‌ടമാകാൻ തുടങ്ങിയതോടെ കോലി ഗിയര്‍ മാറ്റി കരുതലോടെ കളിച്ചു. മത്സരത്തിന്‍റെ 16-ാം ഓവറില്‍ ജയത്തിന് 47 റണ്‍സ് അകലെയായിരുന്നു കോലിയുടെ പുറത്താകല്‍. ഹര്‍ഷല്‍ പട്ടേല്‍ ആയിരുന്നു വിരാട് കോലിയുടെ വിക്കറ്റ് സ്വന്തമാക്കിയത്.
Read More : പഞ്ചാബ് കിങ്ങ്‌സിനെ തകർത്ത് 'കിങ്ങ് കോലി'; റോയൽ ചാലഞ്ചേഴ്‌സിന് ആദ്യ ജയം - IPL 2024 RCB BEAT PBKS HIGHLIGHTS
