ഭഗൽപൂർ : രോഗം ബാധിച്ച കുട്ടികള്‍ക്ക് സര്‍ക്കാരില്‍ നിന്ന് ദയാവധം ആവശ്യപ്പെട്ടുകൊണ്ട് അധ്യാപകന്‍റെ കത്ത്. ബിഹാറിലെ ഭഗൽപൂര്‍, നവഗാച്ചിയയിലെ അധ്യാപകനായ ഘൻശ്യാം കുമാറാണ് പ്രധാനമന്ത്രിയുടെ ഓഫീസിനും മുഖ്യമന്ത്രി നിതീഷ് കുമാർ, വിദ്യാഭ്യാസ വകുപ്പ് അഡീഷണൽ ചീഫ് സെക്രട്ടറി, ആരോഗ്യ വകുപ്പ് അഡീഷണൽ ചീഫ് സെക്രട്ടറി, മനുഷ്യാവകാശ കമ്മീഷൻ എന്നിവർക്കും കത്തെഴുതിയിത്. അധ്യാപകരുടെ സ്ഥലം മാറ്റത്തിന് ബിഹാര്‍ വിദ്യാഭ്യാസ വകുപ്പ് ഉത്തരവിട്ടതിന് പിന്നാലെയാണ് ഘൻശ്യാം ദയാവധം ആവശ്യപ്പെട്ടുകൊണ്ട് കത്ത് അയച്ചത്.
അധ്യാപകന് മൂന്ന് പെണ്‍മക്കളും രണ്ട് ആണ് മക്കളുമാണ് ഉള്ളത്. ഘന്‍ശ്യാം കുമാറിന്‍റെ രണ്ട് ആൺമക്കളും ഡുചെൻ മസ്‌കുലർ ഡിസ്ട്രോഫി ബാധിതരാണ്. രണ്ടുപേരെയും 80 ശതമാനത്തിലധികം വൈകല്യം ബാധിച്ചിട്ടുണ്ട്. മൂത്ത മകന്‍ അനിമേഷ് അമൻ (17) ഒമ്പതാം ക്ലാസ് വിദ്യാർത്ഥിയാണ്. രണ്ടാമത്തെ മകന്‍ അനുരാഗ് ആനന്ദ് (9) മൂന്നാം ക്ലാസിൽ പഠിക്കുന്നു. ഇരുവരും ഓരോ ദിവസവും മരണത്തോടടുത്തു കൊണ്ടിരിക്കുകയാണെന്ന് ഘന്‍ശ്യാം ഇടിവി ഭാരതിനോട് പറഞ്ഞു. തന്നെ സ്ഥലം മാറ്റിയാല്‍ കുട്ടികളെ ആര് സംരക്ഷിക്കുമെന്നും അധ്യാപകന് ചോദിക്കുന്നു.
'ഇതുവരെ 60 ലക്ഷത്തോളം രൂപ രണ്ട് ആൺമക്കളുടെയും ചികിത്സക്കായി ചിലവഴിച്ചെങ്കിലും അവരുടെ രോഗം ഭേദമായിട്ടില്ല. ഏഴോളം സംസ്ഥാനങ്ങളിൽ ഞാന്‍ ഇവരെ ചികിത്സിച്ചു. ഇപ്പോൾ എന്‍റെ മനസ്സിൽ പലതരത്തിലുള്ള കാര്യങ്ങളാണ് വരുന്നത്.' - ഘന്‍ശ്യാം കുമാർ പറഞ്ഞു.
കുട്ടികളുടെ എല്ലാ കാര്യങ്ങളും ഘന്‍ശ്യാം തന്നെയാണ് നോക്കുന്നത്. വീട്ടിലെ ഏക വരുമാന ശ്രോതസും ഇദ്ദേഹത്തിന്‍റെ ജോലിയാണ്. ദൂരത്തേക്ക് സ്ഥലം മാറ്റം കിട്ടിയാല്‍ കുട്ടികളെ എങ്ങനെ ശുശ്രൂഷിക്കുമെന്നാണ് ഘന്‍ശ്യാമിന്‍റെ ആശങ്ക. താനില്ലാതെ കുട്ടികള്‍ പരിചരണം ലഭിക്കാതെ മരിച്ചുപോകുമെന്നും അധ്യാപകന് വിലപിക്കുന്നു.
തനിക്ക് വൊളന്‍ററി ട്രാന്‍സ്‌ഫര്‍ എന്ന ആനുകൂല്യം നൽകണമെന്ന് ആവശ്യപ്പെട്ട് ഘന്‍ശ്യാം കുമാർ മുഖ്യമന്ത്രിക്കും മനുഷ്യാവകാശ കമ്മീഷനും കത്ത് നൽകിയിട്ടുണ്ട്. സർക്കാർ തന്നെ മറ്റെവിടേക്കെങ്കിലും സ്ഥലം മാറ്റിയാൽ സർക്കാരിന് മുന്നിൽ കുടുംബത്തോടൊപ്പം ആത്മഹത്യ ചെയ്യുമെന്നും അദ്ദേഹം പറഞ്ഞു. കുട്ടികളിൽ നിന്ന് തന്നെ അകറ്റാനാണ് സർക്കാർ ആഗ്രഹിക്കുന്നതെങ്കില്‍ അവർക്ക് ദയാവധം നൽകണമെന്നും കത്തില്‍ അദ്ദേഹം ആവശ്യപ്പെട്ടു.
ഗുരുതരമായ അസുഖം ബാധിച്ച കുട്ടികൾ, വാർദ്ധക്യം ബാധിച്ച രക്ഷിതാക്കള്‍ എന്നിവരുള്ള അധ്യാപകർക്ക് സർക്കാർ വൊളന്‍ററി ട്രാന്‍സ്‌ഫര്‍ നൽകിയില്ലെങ്കിൽ, അത് സർക്കാരും വിദ്യാഭ്യാസ വകുപ്പും കാണിക്കുന്ന വലിയ ക്രൂരതയാകുമെന്നും അദ്ദേഹം കൂട്ടിച്ചേര്‍ത്തു.
