ബുല്‍ധാന(മഹാരാഷ്‌ട്ര): റോഡ് സൗകര്യമില്ലാത്തതിനാല്‍ ഒരു പതിനാറുകാരിയെ നിസ്സഹായമായി മരണത്തിന് വിട്ടു കൊടുക്കേണ്ടി വന്നൊരു ഹൃദയഭേദകമായ വാര്‍ത്തയാണ് മഹാരാഷ്‌ട്രയില്‍ നിന്ന് പുറത്ത് വന്നിരിക്കുന്നത്. ബുല്‍ധാന ജില്ലയിലെ ഒരു ഉള്‍നാടന്‍ ഗ്രാമത്തിലുള്ള ഗോത്രവര്‍ഗ വിഭാഗത്തിലെ പെണ്‍കുട്ടിയാണ് യാത്രാ സൗകര്യമില്ലാത്തത് മൂലം മരണത്തിന് കീഴടങ്ങിയത്. വാഹന സൗകര്യമില്ലാത്തതിനാല്‍ ആശുപത്രിയിലെത്തിക്കാന്‍ വൈകിയത് മൂലമാണ് പെണ്‍കുട്ടി മരണത്തിന് കീഴടങ്ങിയത്.
ബുല്‍ധാന ജില്ലയിലെ ജല്‍ഗാവിലുള്ള ജമോദിലെ സതപുഡ ഗിരിവര്‍ഗ ഗ്രാമത്തിലാണ് സംഭവം. ഞായറാഴ്‌ച വൈകിട്ടോടെ പെണ്‍കുട്ടി നിര്‍ത്താതെ ഛര്‍ദ്ദിക്കാന്‍ തുടങ്ങി. നില വഷളായതോടെ പെണ്‍കുട്ടിയുടെ വീട്ടുകാര്‍ നാട്ടുകാരുടെ കൂടി സഹായത്തോടെ കമ്പുകളും മറ്റും വച്ച് ഉണ്ടാക്കിയ താത്ക്കാലിക സ്ട്രെച്ചറില്‍ കുട്ടിയെ കിടത്തി ദൂരെയുള്ള ആശുപത്രിയിലേക്ക് കാല്‍നടയായി കൊണ്ടു പോയി.
ആംബുലന്‍സിന് വരാന്‍ കഴിയും വിധമുള്ള ഒരു പാത ആ ഗ്രാമത്തില്‍ ഇല്ല. ആശുപത്രിയില്‍ എത്തും മുമ്പ് പെണ്‍കുട്ടി മരണത്തിന് കീഴടങ്ങി. നല്ലൊരു റോഡ് ഉണ്ടായിരുന്നെങ്കില്‍ കുട്ടിയെ രക്ഷിക്കാനാകുമായിരുന്നുവെന്ന് നാട്ടുകാര്‍ വേദനയോടെ പറയുന്നു. കുട്ടിയുടെ മൃതദേഹം തിരികെ വീട്ടിലെത്തിച്ചതും കൊണ്ടുപോയത് പോലെ തന്നെ താത്ക്കാലിക സ്ട്രെച്ചറിലാണ്.
ഇടിവി ഭാരത് കേരളം ഇനി വാട്‌സ്‌ആപ്പിലും
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക.
മേഖലയിലെ ഗിരിവര്‍ഗ ജനവിഭാഗത്തിനിടയില്‍ പെണ്‍കുട്ടിയുടെ മരണം കടുത്ത രോഷത്തിന് ഇടയാക്കിയിട്ടുണ്ട്. സംസ്ഥാന സര്‍ക്കാരിന്‍റെ വിവിധ വനിതാ കേന്ദ്രീകൃത പദ്ധതികള്‍ നിലവിലുണ്ടായിട്ടും ഒരുപെണ്‍കുട്ടിയെ മരണത്തിന് വിട്ട് കൊടുക്കേണ്ടി വന്നിരിക്കുന്നു. ഗ്രാമത്തില്‍ റോഡോ പ്രാഥമിക ആരോഗ്യ സംവിധാനങ്ങളോ ഇല്ലെന്നും നാട്ടുകാര്‍ പരാതിപ്പെടുന്നു. അടിയന്തര ആരോഗ്യ പ്രശ്നങ്ങളുണ്ടാകുമ്പോള്‍ ഇത് തങ്ങളെ വല്ലാതെ ബുദ്ധിമുട്ടിലാക്കാറുണ്ടെന്നും ഇവര്‍ വെളിപ്പെടുത്തുന്നു.
Also Read: നൃത്തം ചെയ്യുന്നതിനിടെ 13 വയസുകാരി കുഴഞ്ഞു വീണ് മരിച്ചു
