ന്യൂഡൽഹി : മുഖ്യമന്ത്രി അരവിന്ദ് കെജ്‌രിവാള്‍ ഇന്ന് വൈകിട്ട് നാല് മണിയോടെ രാജി സമര്‍പ്പിക്കുമെന്ന് സൂചന. ലഫ്റ്റനന്‍റ് ഗവര്‍ണര്‍ വി കെ സക്‌സേനയുടെ വസതിയില്‍ നേരിട്ടെത്തിയാകും രാജി നല്‍കുകയെന്നും ആം ആദ്‌മി വൃത്തങ്ങള്‍ വ്യക്തമാക്കി. അതേസമയം പുതിയ മുഖ്യമന്ത്രിയുടെ കാര്യത്തില്‍ പാര്‍ട്ടിയില്‍ ചര്‍ച്ചകള്‍ തുടരുകയാണ്. ഇന്നു രാവിലെ 11.30നു നിയമസഭ കക്ഷി യോഗത്തിനു ശേഷമാകും അന്തിമ പ്രഖ്യാപനം.
ഭാര്യ സുനിത കെജ്‌രിവാളിന്‍റെ പേര് അരവിന്ദ് കെജ്‌രിവാള്‍ തള്ളിയെന്നാണ് സൂചന. പിൻഗാമിയായി മന്ത്രിമാരായ അതിഷി, ഗോപാൽ റായ്, കൈലാഷ് ഗലോട്ട് തുടങ്ങിയവരുടെ പേരുകളാണു സജീവം. അങ്ങനെയെങ്കില്‍ ധനം, റവന്യു, വിദ്യാഭ്യാസം, ജല വകുപ്പുകളുടെ ചുമതല വഹിക്കുന്ന മന്ത്രി അതിഷിയ്ക്കാകും നറുക്ക് വീഴുക. പാര്‍ട്ടിയോഗത്തില്‍ ഏറ്റവും കൂടുതല്‍ അംഗങ്ങള്‍ മുന്നോട്ട് വച്ച പേരും അതിഷിയുടേതാണ്.
വനിത വോട്ടര്‍മാരെ പാര്‍ട്ടിയിലേക്ക് തിരികെ കൊണ്ടുവരാനും ഇത് സഹായകമാകുമെന്നാണ് വിലയിരുത്തല്‍. മറ്റ് ചില മന്ത്രിമാരുടെ പേരുകളും യോഗത്തില്‍ ഉയര്‍ന്നിട്ടുണ്ട്. പിന്നാക്ക വിഭാഗത്തില്‍ നിന്നുള്ള രണ്ട് പേരുകളും ഉയര്‍ന്നിട്ടുണ്ട്.
മദ്യനയക്കേസിൽ സുപ്രീം കോടതി ജാമ്യം അനുവദിച്ചെങ്കിലും അഴിമതിയാരോപണം നിലനിൽക്കുന്ന സാഹചര്യത്തിലാണു ഭരണത്തിൽനിന്ന് ഒഴിയാനും പാർട്ടി നേതൃത്വത്തിൽ ശക്തമാകാനും കെജ്‌രിവാൾ തീരുമാനിച്ചതെന്ന് ആം ആദ്‌മി പാർട്ടി വൃത്തങ്ങൾ പറയുന്നു. മദ്യനയ അഴിമതിക്കേസിനു പുറമേ മുഖ്യമന്ത്രിയുടെ ഔദ്യോഗിക വസതി മോടിപിടിപ്പിച്ചതുമായി ബന്ധപ്പെട്ട ആരോപണവും സജീവമാണ്.
ജാമ്യ കാലയളവിൽ മുഖ്യമന്ത്രിയുടെ ഓഫിസ് സന്ദർശിക്കരുതെന്ന ഇഡിക്കേസിലെ ജാമ്യവ്യവസ്ഥ സിബിഐ കേസിൽ ജാമ്യം നൽകിയപ്പോഴും സുപ്രീം കോടതി മാറ്റിയിട്ടില്ല. മദ്യനയക്കേസിൽ മാർച്ച് 21ന് അറസ്റ്റിലായ കെജ്‌രിവാൾ ജയിലിൽ കഴിഞ്ഞ ആറു മാസവും മുഖ്യമന്ത്രി പദവിയിൽ തുടർന്നിരുന്നു.
ഫെബ്രുവരിയിലാണു സംസ്ഥാനത്തു തെരഞ്ഞെടുപ്പു നടക്കേണ്ടത്. എഎപിക്കെതിരെ ഭരണവിരുദ്ധ വികാരം നിലനിൽക്കുന്ന സാഹചര്യത്തിൽ തെരഞ്ഞെടുപ്പിനെ നേരിടാൻ ശക്തമായ ഒരുക്കങ്ങൾ വേണമെന്നാണു പാർട്ടി വിലയിരുത്തൽ. മുഖ്യമന്ത്രിയെന്ന നിലയിൽ ഔദ്യോഗിക ഫയലുകളിൽ ഒപ്പിടുന്നതിനു തടസമില്ലെങ്കിലും കേന്ദ്രവും ലഫ്. ഗവർണറുമായി കൂടുതൽ യുദ്ധമുണ്ടാക്കി ഭരണം തടസപ്പെടുത്തേണ്ടതില്ലെന്ന ചിന്തയും രാജി തീരുമാനത്തിനു പിന്നിലുണ്ട്.
ഇടിവി ഭാരത് കേരളം ഇനി വാട്‌സ്‌ആപ്പിലും
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക.
മദ്യനയ അഴിമതിക്കേസിൽ സുപ്രീം കോടതി ജാമ്യം അനുവദിച്ചതിനെത്തുടർന്നു ജയിൽമോചിതനായ ആം ആദ്‌മി പാർട്ടി കൺവീനർ കൂടിയായ കെജ്‌രിവാൾ അപ്രതീക്ഷിതമായാണു രാജിപ്രഖ്യാപനം നടത്തിയത്. 'ഞാൻ മുഖ്യമന്ത്രി സ്ഥാനം രാജിവയ്ക്കുകയാണ്. സത്യസന്ധനാണെന്നു ജനങ്ങൾ പറയുന്നതുവരെ മുഖ്യമന്ത്രിക്കസേരയിൽ ഇരിക്കില്ല' - അദ്ദേഹം പറഞ്ഞു. നിരപരാധിത്തം തെളിയിക്കാൻ ഏത് അഗ്നിപരീക്ഷയും നേരിടാൻ തയാറാണെന്ന് പറഞ്ഞ കെജ്‌രിവാൾ ഡൽഹിയിൽ നിയമസഭ തെരഞ്ഞെടുപ്പ് നേരത്തെ നടത്തണമെന്നും അഭിപ്രായപ്പെട്ടു.
'ഫെബ്രുവരിയിലാണു ഡൽഹിയിൽ തെരഞ്ഞെടുപ്പു നടക്കേണ്ടത്. അതു നവംബറിൽ മഹാരാഷ്‌ട്ര തെരഞ്ഞെടുപ്പിനൊപ്പം നടത്തണമെന്ന് ആവശ്യപ്പെടുകയാണ്'– അദ്ദേഹം പറഞ്ഞു.
ഇന്നലെ അവധിയായതിനാലാണ് രണ്ട് ദിവസത്തിനുള്ളിൽ രാജിക്കത്തു കൈമാറാൻ തീരുമാനിച്ചത്. തൊട്ടടുത്ത പ്രവൃത്തി ദിവസമെന്ന നിലയിലാണു 17 തെരഞ്ഞെടുത്തതെന്നു മന്ത്രി അതിഷി പറഞ്ഞു. സ്വാതന്ത്രദിനത്തിൽ പതാക ഉയർത്താൻ കെജ്‌രിവാൾ നിർദേശിച്ചത് അതിഷിയുടെ പേരായിരുന്നുവെങ്കിലും ലഫ്. ഗവർണർ അതു നിരസിച്ചിരുന്നു. പിന്നീടു കൈലാഷ് ഗലോട്ടാണു പതാക ഉയർത്തിയത്.
പരിസ്ഥിതി വകുപ്പു കൈകാര്യം ചെയ്യുന്ന ഗോപാൽ റായിയുടെ പേരു സജീവമായി ഉയരുന്നുണ്ടെങ്കിലും അദ്ദേഹത്തിന്‍റെ അനാരോഗ്യം തടസമാണ്. 2013ലാണു കേജ്‌രിവാൾ മുഖ്യമന്ത്രി പദവിയിൽ ആദ്യമെത്തുന്നത്. കോൺഗ്രസുമായുള്ള കൂട്ടുകക്ഷി സർക്കാർ ഒരുവർഷം നീണ്ടില്ല. 2015 ൽ മിന്നും ജയവുമായി അധികാരത്തിലെത്തിയ എഎപി 2020ൽ വീണ്ടും വിജയിച്ചു.
നിയമസഭ തരഞ്ഞെടുപ്പു നേരത്തെയാക്കണമെന്നു അരവിന്ദ് കെജ്‌രിവാൾ അഭിപ്രായപ്പെട്ടെങ്കിലും അതിനുള്ള സാധ്യത കുറവാണെന്നു വിദഗ്‌ധർ പറയുന്നു. വോട്ടർ പട്ടിക തയാറാക്കൽ ഉൾപ്പെടെയുള്ള നടപടികൾ വേഗത്തിൽ പൂർത്തിയാക്കേണ്ടി വരും. വോട്ടിങ് യന്ത്രങ്ങളുടെ പരിശോധന, പോളിങ് ഓഫിസർമാർക്കുള്ള പരിശീലനം എന്നിവയെല്ലാം പൂർത്തിയാക്കേണ്ടതുണ്ട്. ഡൽഹിയിൽ വോട്ടർ പട്ടിക പുതുക്കാനുള്ള നടപടികൾ ഓഗസ്റ്റിലാണ് ആരംഭിച്ചത്. ജനുവരി വരെയാണ് സമയം അനുവദിച്ചിരിക്കുന്നത്. മന്ത്രിസഭ പിരിച്ചുവിട്ട് പോളിങ് നേരത്തെ നടത്താൻ സർക്കാർ അഭ്യർഥിക്കുകയും വേണം.
Also Read: കെജ്‌രിവാളിന് ശേഷം എന്ത്? തലസ്ഥാനം ഇനി ആര് ഭരിക്കും?; സാധ്യത പട്ടികയില്‍ ഇവരൊക്കെ
