म्हात्रे पुलावर चारचाकी दुभाजकाला धडकून भीषण अपघात; दोन तरुण जखमी

पुणे - म्हात्रे पुलाजवळील डी.पी. रस्त्यावर रात्री अडीच वाजण्याच्या सुमारास भरधाव चारचाकीचा दुभाजकाला धडकून भीषण (Pune BMW accident) अपघात झाला आहे. या अपघातात दोन तरुण गंभीर जखमी झाले असून त्यांना रुग्णालयात उपचारांसाठी दाखल करण्यात आले आहे. एक बीएमडब्लू (BMW) चारचाकी भरधाव वेगाने डी.पी. रस्त्याच्या (dp road pune) दिशेने जात होती. वाहन म्हात्रे पूल (mhatre bridge pune) परिसरात येताच दुभाजकाला धडकून हा अपघात झाला आहे. चालकाचा वाहनावरील ताबा सुटल्याने अपघात झाल्याचा अंदाज वर्तवण्यात येत आहे. घटनेची माहिती मिळताच अग्निशमन दलाचे अधिकारी घटनास्थळी दाखल झाले. अपघात झाला त्यावेळी वाहनात दोन तरुण होते. या दोन्ही तरुणांचे पाय वाहनात अडकले होते. अग्निशमन दलाच्या मदतीने या दोन्ही तरुणांना वाहनातून बाहेर काढण्यात आले व त्यांना तातडीने रुग्णालयात दाखल करण्यात आले आहे. दरम्यान, हा अपघात इतका भीषण होता की वाहनाच्या समोरच्या भागाचे पूर्णपणे नुकसान झाले आहे.