शाब्बास रे पठ्ठ्या..! आदिवासी तरुणाला गुळवेल पुरविण्याचे दीड कोटींचे मिळाले कंत्राट
मुंबई/ठाणे - जगभरात गेले वर्षभर कोरोनाचा प्रसार आहे. टाळेबंदीमुळे अनेक व्यवसाय बंद पडले आहेत. अनेकांच्या नोकऱ्या गेल्या आहेत. नोकऱ्या गेल्याने अनेकांवर बेरोजगारीची कुऱ्हाड कोसळली आहे. अशातच काही लोकांनी संधी साधत आपले व्यवसाय उभे केले आहेत. याच पैकी एक तरुण आहे ठाणे जिल्ह्यातील शहापूर तालुक्यातील खरीड येथील सुनील पवार. या तरुणाने जंगलातील गुळवेल वनस्पती गोळा करून मोठमोठ्या कंपन्यांना देण्याचा व्यवसाय सुरू केला आहे. त्या माध्यमातून बड्या कंपन्यांनी त्याला एक कोटी 56 लाखांचे कंत्राट दिले आहे. या व्यवसायाच्या माध्यमातून सुनिल पवारने शेकडो आदिवासी नागरिकांना सोजगाराची संधी उपलब्ध करून दिली आहे.