अमरावती : सुमारे ३१ वर्षांपूर्वी झालेल्या लैंगिक शोषणाच्या घटनेची तक्रार एका ४४ वर्षीय महिलेने अमरावती पोलिसांकडे केल्याने पोलीसही अवाक झालेत. ही महिला पाच वर्षांची असताना तिच्यावर भावाकडूनच बलात्कार करण्यात आला (Woman Sexually abused by brother) होता. हा प्रकार तिने आई-वडिलांन‍ा सांगितल्यावर त्यांनी घराची बदनामी होऊ नये, म्हणून या प्रकाराकडे दुर्लक्ष केले. पण आता तीस वर्षानंतर या महिलेने अखेर पोलीस ठाणे गाठले आणि तक्रार (Woman complains against brother) दिली.
पाच वर्षांची असताना अत्याचार - पीडित महिला पती आणि मुलासह दिल्लीजवळच्या नोएडा येथे राहते. पीडिता पाच वर्षांची असताना तिच्या सख्ख्या भावाने बलात्कार केला. लैंगिक शोषणाचा हा प्रकार अनेक वर्षे चालला. १९८३ ते १९९१ या कालावधीत राजापेठ पोलीस ठाण्याच्या हद्दीतील एका नागरी वसाहतीत घडलेल्या, या घटनेची तक्रार पीडित महिलेने राजपेठ पोलिसांकडे केल्यानंतर पोलिसांनी मंगळवारी रात्री या महिलेच्या भावाविरूद्ध बलात्काराचा गुन्हा दाखल (Sexual exploitation in Amravati) केला.
पीडितेचा भाऊ मुंबईत मालाड येथील रहिवासी - पीडितेचा ५२ वर्षीय भाऊ मुंबईतील मालाड भागात राहतो. या प्रकरणी महिलेने दिल्ली येथील राष्ट्रीय महिला आयोगासह नोएडा पोलीस ठाण्यातदेखील तक्रार दाखल केली आहे. पीडितेचे वडील अमरावतीत नोकरीवर असताना ती राजापेठ पोलीस ठाण्याच्या हद्दीत आई, वडील आणि भावासह वास्तव्याला होती. त्यावेळी ही घटना घडली.
आठ वर्षे पीडितेचे शोषण करण्यात आले. तिने पालकांना याची माहिती दिली, पण त्यांनीही दुर्लक्ष केले. कालांतराने तिचे वडील दगावले. आईची प्रकृती बिघडली. त्यामुळे तिला चकार शब्द काढता आला नाही. तिच्या डोक्यात मात्र विचारचक्र फिरत राहिले. बलात्काराची जखम भरून निघू शकली नाही. अखेर ३१ वर्षांनतर तिने आपल्यावरील अन्यायाच्या विरोधात पोलिसात तक्रार (Woman complains to Amravati police) दिली.
