ഹൈദരാബാദ്: പ്രണയവും ബന്ധങ്ങളും മനുഷ്യന് മാനസികമായി ഉല്ലാസം തരുന്നവയാണെങ്കിലും ചില ബന്ധങ്ങൾ അപകടകരമായ രീതിയിലേക്ക് വഴിമാറാറുണ്ട്. കുറെ നാൾ ജീവിക്കുക മരിക്കുക എന്നതിന് ഉപരിയായി ജീവിതത്തിൽ സന്തോഷവും സമാധാനവും നിഷേധിക്കുന്ന ബന്ധങ്ങൾ ഒഴിവാക്കിയാൽ മാത്രമേ ഇത് സാധ്യമാകു. നിങ്ങൾ അപകടകരമായ ബന്ധത്തിലാണോ എന്ന് തിരിച്ചറിയണമെങ്കിൽ ഈ കാര്യങ്ങൾ അവഗണിക്കരുത്.
1. നിരന്തരമായ മാനസിക സമ്മർദം
നമ്മുടെ പങ്കാളികൾക്കൊപ്പം ഗുണനിലവാരമുള്ള സമയം ചെലവഴിക്കാൻ സാധിക്കണം. ജീവിതം ഒരിക്കലും സൗമ്യമായിരിക്കില്ല പ്രതിസന്ധികളും പ്രശ്‌നങ്ങളും പരസ്‌പരം സംസാരിക്കാനും നേരിടാനും നമുക്ക് സാധിക്കണം. എന്നാൽ പങ്കാളിയുമായി പങ്കിടുന്ന സമയങ്ങളിൽ നിങ്ങൾക്ക് പരസ്‌പരം തുറന്ന് സംസാരിക്കാനോ നിങ്ങളുടെ മാനസികാവസ്ഥ പങ്കിടാനോ പറ്റുന്ന സാഹചര്യമില്ലെങ്കിൽ, ബന്ധം മാനസികമായ പിരിമുറുക്കമാണ് നിങ്ങൾക്ക് നൽകുന്നതെങ്കിൽ ആ ബന്ധങ്ങൾ നിലനിർത്തിക്കൊണ്ട് പോകുന്നത് അനുഗുണമാവില്ല.
2. ടോക്‌സിക് ആശയവിനിമയം
കാര്യങ്ങൾ എല്ലാം തുറന്ന് പറയാനുള്ള സംസാരിക്കാനുള്ള സ്വാതന്ത്ര്യവും സാവകാശവും നിങ്ങൾക്ക് ബന്ധത്തിൽ നിന്ന് ലഭിക്കുന്നുണ്ടോ? ഏത് കാര്യങ്ങൾ സംസാരിച്ചാലും അവ കേൾക്കാനോ മനസിലാക്കാനോ നിങ്ങളുടെ പങ്കാളി സന്നദ്ധൻ അല്ലേ? ഇവക്ക് രണ്ടും അല്ല എന്നാണ് ഉത്തരമെങ്കിൽ അത്തരം ബന്ധങ്ങളിൽ തുടരാതിരിക്കുക.
3. സ്വാതന്ത്ര്യം നിഷേധിക്കുക
ഒരു ബന്ധം വ്യക്തി എന്ന നിലയിലുള്ള നിങ്ങളുടെ സ്വാതന്ത്ര്യത്തെ ഹനിക്കുന്നതാവരുത്. നിങ്ങളുടെ തീരുമാനം എടുക്കാനുള്ള, അഭിപ്രായം പറയാനുള്ള സ്വാതന്ത്ര്യത്തെ തടയുന്ന ഒന്നാവരുത്.
4. സാമ്പത്തിക അച്ചടക്കമില്ലായ്‌മ
ജീവിതച്ചെലവ് വഹിക്കുന്നതിൽ തുല്യ ഉത്തരവാദിത്തം വഹിക്കേണ്ടത് കാലഘട്ടത്തിന്‍റെ ആവശ്യമാണ്. സാമ്പത്തിക കാര്യങ്ങളിൽ പൂർണമായി തുറന്ന് സംസാരിക്കാനും, പക്വതയോടെ കാര്യങ്ങൾ കൈകാര്യം ചെയ്യാനും സാധിക്കണം. ഇത്തരം കാര്യങ്ങളിൽ വിട്ടുവീഴ്‌ച വരുത്തുന്നത് അനാവശ്യ വഴക്കുകളിലേക്ക് നയിക്കുകയും നിങ്ങളുടെ ബന്ധത്തെ പ്രതികൂലമായി ബാധിക്കുകയും ചെയ്യും.
5. നേതാവാകരുത്
ഒരു ബന്ധത്തിൽ ഇരുവരും തുല്ല്യരാണ്. ഇരുവർക്കും അഭിപ്രായ സ്വാതന്ത്ര്യം ഉണ്ടായിരിക്കണം. പരസ്‌പരം മനസിലാക്കാനും ഉൾക്കൊള്ളാനും സാധിക്കണം. അല്ലാത്ത പക്ഷം ഒരു മേൽക്കോയ്‌മ ഉണ്ടായാൽ പ്രശ്‌നങ്ങൾ രൂക്ഷമാകും. ഒരാൾ മറ്റൊരാളേക്കാൾ മികച്ചതാണ് എന്ന തോന്നൽ ടോക്‌സിക് ആശയമാണ്.
