തിരുവനന്തപുരം : സ്കൂളുകള് തുറക്കാനിരിക്കെ കെ എസ് ആര്‍ ടി സിയെ സമീപിച്ച് 1250 വിദ്യാലയങ്ങള്‍. സംസ്ഥാനത്ത് നവംബര്‍ ഒന്നിന് സ്‌കൂള്‍ തുറക്കാനിരിക്കെ വിദ്യാര്‍ഥികള്‍ക്കുള്ള പ്രത്യേക ബസുകള്‍ക്കുവേണ്ടിയാണിത്.
ലാഭം ഒഴിവാക്കി ജീവനക്കാരുടെ ശമ്പളവും ഡീസല്‍ ചെലവും ഈടാക്കികൊണ്ട് ബസുകള്‍ ഓടിക്കാനാണ് കെ.എസ്.ആര്‍.ടി.സി ആലോചിക്കുന്നത്. വനിതാകണ്ടക്ടര്‍മാരെയായിരിക്കും ബസുകളില്‍ നിയോഗിക്കുക.
വിദ്യാര്‍ഥികളെ രാവിലെ സ്‌കൂളിലാക്കി വൈകിട്ട് തിരിച്ചെത്തിക്കണം. 49 വിദ്യാര്‍ഥികള്‍ക്കാണ് ഒരു ബസില്‍ യാത്ര ചെയ്യാനാവുക. പത്ത് കിലോമീറ്റര്‍ യാത്രയ്‌ക്ക് ഒരു ബസിന് 6000 രൂപയാണ് ചെലവ് പ്രതീക്ഷിക്കുന്നത്. അഞ്ചുകിലോമീറ്റര്‍ വീതം കൂട്ടി 50 കിലോമീറ്റര്‍ വരെ വ്യത്യസ്‌ത നിരക്കുകള്‍ തയ്യാറാക്കിയിട്ടുണ്ട്.
