തിരുവനന്തപുരം : രാഹുല്‍ ഗാന്ധി നയിക്കുന്ന ഭാരത് ജോഡോ യാത്രയെ രൂക്ഷമായി വിമര്‍ശിച്ച് സിപിഎം സംസ്ഥാന സെക്രട്ടറി എം വി ഗോവിന്ദന്‍. ദേശാഭിമാനിയിലെഴുതിയ ലേഖനത്തിലാണ് വിമര്‍ശനം. വിലക്കയറ്റത്തിനും വര്‍ഗീയതയ്ക്കും എതിരെയാണ് ജാഥ എന്നാണ് കോണ്‍ഗ്രസിന്‍റെ അവകാശവാദം.
ബിജെപി ഭിന്നിപ്പിച്ച ഇന്ത്യന്‍ ജനതയെ യോജിപ്പിക്കുകയാണ് ജാഥയുടെ ലക്ഷ്യം. എന്നാല്‍, ബിജെപി ഭരിക്കുന്ന ഗുജറാത്ത് പോലുള്ള സംസ്ഥാനങ്ങളെ പൂര്‍ണമായും ജാഥയില്‍ നിന്ന് ഒഴിവാക്കി ഈ ലക്ഷ്യം എങ്ങനെ നേടുമെന്ന ചോദ്യം ഉയര്‍ന്നിട്ടുണ്ട്. ആറ് ദശാബ്‌ദം രാജ്യം ഭരിച്ച കോണ്‍ഗ്രസ് പാര്‍ട്ടിയുടെ നിഴല്‍രൂപം മാത്രമാണ് ഇന്നുള്ളത്. ഈ വസ്‌തുത ആദ്യം കോണ്‍ഗ്രസ് നേതൃത്വം അംഗീകരിക്കണമെന്ന് എം വി ഗോവിന്ദന്‍ കൂട്ടിച്ചേർത്തു.
യാത്ര തുടങ്ങി കൊല്ലത്ത് എത്തുമ്പോഴേക്കും ഗോവയില്‍ എട്ട് കോണ്‍ഗ്രസ് എംഎല്‍എമാരാണ് ബിജെപിയിലേക്ക് ചേക്കേറിയത്. നാണംകെട്ട ഈ കൂറുമാറ്റത്തിനുള്ള ആശയാടിത്തറ രാഹുല്‍ ഗാന്ധിയും കൂട്ടരും ഒരുക്കുന്നുവെന്നതാണ് വസ്‌തുത. തീവ്രഹിന്ദുത്വത്തെ പരാജയപ്പെടുത്താന്‍ മൃദുഹിന്ദുത്വ സമീപനം സ്വീകരിച്ചുകൊണ്ട് മുന്നോട്ടുപോകാനാകില്ലെന്ന് അനുഭവങ്ങളുടെ പശ്ചാത്തലത്തില്‍ ഇനിയും കോണ്‍ഗ്രസ് പഠിച്ചിട്ടില്ല.
Also read: ഭാരത് ജോഡോ യാത്രയെ തകർക്കാൻ സിപിഎം ബിജെപി ശ്രമമെന്ന് ഡീൻ കുര്യാക്കോസ് എംപി
ഇന്ത്യന്‍ രാഷ്ട്രീയത്തില്‍ തീര്‍ത്തും അപ്രസക്തമായ സാന്നിധ്യമായി ഈ വന്ദ്യവയോധിക കക്ഷി മാറിയിരിക്കുന്നതായും ലേഖനത്തില്‍ എം വി ഗോവിന്ദന്‍ കുറ്റപ്പെടുത്തുന്നു.
