പത്തനംതിട്ട : ഇടവമാസ പൂജകൾക്കായി ശബരിമല ക്ഷേത്രനട ഇന്ന് വൈകുന്നേരം അഞ്ചിന് തുറക്കും. ക്ഷേത്ര തന്ത്രി കണ്ഠരര് മഹേഷ് മോഹനരുടെ മുഖ്യകാർമ്മികത്വത്തിൽ ക്ഷേത്ര മേൽശാന്തി എ.കെ സുധീർ നമ്പൂതിരി ക്ഷേത്ര ശ്രീകോവിൽ നട തുറന്ന് വിളക്കുകൾ തെളിക്കും. മെയ് 15നാണ് ഇടവം ഒന്ന്. അന്ന് പുലർച്ചെ അഞ്ച് മണിക്ക് നടതുറക്കും. അതേസമയം കൊവിഡ് 19ൻ്റെ ഭാഗമായുള്ള ലോക്ക് ഡൗൺ കണക്കിലെടുത്ത് ഈ മാസവും ഭക്തർക്ക് പ്രവേശനം അനുവദിക്കുകയില്ല.
തിരുനട തുറക്കുന്ന 14 മുതൽ അടയ്ക്കുന്ന 19-ാം തീയതി വരെ പതിവ് പൂജകൾ മാത്രമാണ് നടത്തുന്നത്. അഞ്ച് ദിവസങ്ങളിൽ നട തുറക്കുന്നതിലും അടക്കുന്നതിലും സമയ ക്രമീകരണം വരുത്തിയിട്ടുണ്ട്. പ്രത്യേക പൂജകളായ ഉദയാസ്തമന പൂജ, നെയ്യഭിഷേകം, കളഭാഭിഷേകം ,പുഷ്പാഭിഷേകം, പടിപൂജ എന്നിവ ഉണ്ടാവില്ല. മെയ് 19ന് രാത്രി ഹരിവരാസനം പാടി നട അടക്കും. ഭക്തർക്ക് ഓൺലൈൻ വഴി വഴിപാടുകൾ നടത്താൻ സംവിധാനം ഒരുക്കിയിട്ടുണ്ട്.
