പാലക്കാട്‌: സ്‌ത്രീയെ വെട്ടിപ്പരിക്കേൽപിച്ച കേസിൽ പ്രതിക്ക്‌ 10 വർഷം കഠിന തടവും ഒരുലക്ഷം രൂപ പിഴയും വിധിച്ചു. പരുത്തിപ്ര കാട്ടാളംപാടത്ത്‌ വിജയത്തെ (35) ആക്രമിച്ച കേസിൽ വാടാനംകുർശി കാവതിയാട്ടിൽ വീട്ടിൽ ശ്രീജിത്തിനെയാണ്‌ (42) അഡീഷണൽ സെഷൻസ്‌ ജഡ്‌ജ്‌-5 കോടതി ജഡ്‌ജി സി.എം സീമ ശിക്ഷിച്ചത്‌.
പിഴ തുക വിജയത്തിന്‌ നൽകാനും കോടതി ഉത്തരവിട്ടു. വിവിധ വകുപ്പുകളിലായാണ്‌ 10 വർഷം തടവ്‌ വിധിച്ചത്. ശിക്ഷ ഒന്നിച്ച്‌ അഞ്ച് വർഷം അനുഭവിച്ചാൽ മതി.
2015ലാണ്‌ സംഭവം നടന്നത്‌. ഇരുവരും ഹോളോബ്രിക്‌സിലെ ജോലിക്കാരായിരുന്നു. ശ്രീജിത്ത് ജോലി സ്ഥലത്ത്‌ നേരിട്ടും ഫോണിലും വിജയത്തെ ശല്യം ചെയ്‌തിരുന്നു. ഇക്കാര്യം ഹോളോബ്രിക്‌സ്‌ മുതലാളിയോട്‌ പറഞ്ഞ വിരോധമാണ്‌ വെട്ടിപരിക്കേൽപ്പിക്കാൻ കാരണം.
ഷൊർണൂർ പൊലീസ്‌ സ്‌റ്റേഷനിൽ രജിസ്‌റ്റർ ചെയ്‌ത കേസ് ഇൻസ്‌പെക്‌ടർ വി. മണികണ്‌ഠൻ അന്വേഷിച്ച്‌ കുറ്റപത്രം സമർപ്പിച്ചു. പ്രോസിക്യൂഷന് വേണ്ടി അഡീഷണൽ പബ്ലിക്‌ പ്രോസിക്യൂട്ടർ വി. ജയപ്രകാശ്‌ ഹാജരായി.
