പി.വി. അൻവർ എംഎൽഎയുടെ രാജി; കോൺഗ്രസ് ബഹുജന മാർച്ചും ധർണയും നടത്തും

റീബിൽഡ് നിലമ്പൂരിന് സർക്കാരുമായി ഒരു ബന്ധവുമില്ലെന്ന് ജില്ലാ കലക്ടർ വ്യക്തമാക്കിയ സാഹചര്യത്തിൽ എംഎൽഎ സ്ഥാനം രാജിവെച്ച് അന്വേഷണത്തെ നേരിടാൻ പി.വി. അൻവർ തയ്യാറാകണമെന്ന് ആര്യാടൻ ഷൗക്കത്ത് ആവശ്യപ്പെട്ടു

മലപ്പുറം: പി.വി അൻവർ എം.എൽ.എയുടെ രാജി ആവശ്യപ്പെട്ട് കോൺഗ്രസ് വെളളിയാഴ്ച്ച നിലമ്പൂരിൽ ബഹുജന മാർച്ചും ധർണയും നടത്തും. നിലമ്പൂരിൽ വിളിച്ചുചേർത്ത വാർത്താ സമ്മേളനത്തിലാണ് നേതാക്കൾ സമര പ്രഖ്യാപനം നടത്തിയത്. 'ആശിക്കും ഭൂമി ആദിവാസിക്ക്' എന്ന കഴിഞ്ഞ യുഡിഎഫ് സർക്കാരിന്‍റെ പദ്ധതിയുടെ ഭാഗമായി ഫെഡറൽ ബാങ്കിന്‍റെ സഹായത്തോടെ നടത്തുന്ന വീടുകളുടെ നിർമ്മാണം എംഎൽഎ തടഞ്ഞത് സർക്കാരിനോടുള്ള വെല്ലുവിളിയാണെന്ന് കെപിസിസി സെക്രട്ടറി വി.എ. കരീം പറഞ്ഞു.

റീബിൽഡ് നിലമ്പൂരിന് സർക്കാരുമായി ഒരു ബന്ധവുമില്ലെന്ന് ജില്ലാ കലക്ടർ വ്യക്തമാക്കിയ സാഹചര്യത്തിൽ എംഎൽഎ സ്ഥാനം രാജിവെച്ച് അന്വേഷണത്തെ നേരിടാൻ പി.വി.അൻവർ തയ്യാറാകണമെന്ന് ആര്യാടൻ ഷൗക്കത്ത് ആവശ്യപ്പെട്ടു. റീബിൽഡ് നിലമ്പൂരിന്‍റെ പേരിൽ ഇപ്പോൾ ഉണ്ടെന്ന് എംഎൽഎ അവകാശപ്പെടുന്ന 40 ലക്ഷത്തോളം രൂപ അടിയന്തരമായി കവളപ്പാറയിലെ പ്രളയബാധിതർക്ക് വീതിച്ചു നൽകണം. എല്‍ഡിഎഫ് വിശദീകരണ യോഗത്തിൽ പോലും പങ്കെടുക്കാതെ നിലമ്പൂർ റീബിൽഡിന് വേണ്ടി എംഎൽഎ ഗൾഫിൽ പിരിവ് നടത്തുകയാണെന്ന് ഒരു പ്രമുഖ സിപിഎം നേതാവ് പറഞ്ഞതായും ആര്യാടൻ ഷൗക്കത്ത് പറഞ്ഞു. വെള്ളിയാഴ്ച്ച രാവിലെ 10ന് മാർച്ച് ആരംഭിക്കും, വാർത്ത സമ്മേളനത്തിൽ വി.എസ് ജോയി, എ.ഗോപിനാഥ്, പാനായി ജേക്കബ് പാലോളി മൊഹബൂബ് എന്നിവരും പങ്കെടുത്തു.