കോട്ടയം: തലയോലപ്പറമ്പ് പോസ്റ്റ് ഓഫിസിന്‍റെ പൂട്ട് തകർത്ത് ഉള്ളിൽ കയറി മോഷണം നടത്തിയ കേസിൽ കൊല്ലം സ്വദേശിയായ അന്തർ സംസ്ഥാന മോഷ്ടാവ് പിടിയിൽ. കൊല്ലം കരവലൂർ വട്ടമൺ സജിമന്ദിരത്തിൽ സനോജിനെയാണ് തലയോലപ്പറമ്പ് പൊലീസ് അറസ്റ്റ് ചെയ്തത്. കഴിഞ്ഞ ഡിസംബർ പത്തിനാണ് തലയോലപ്പറമ്പ് പോസ്റ്റ് ഓഫിസിന്‍റെ പടിഞ്ഞാറുവശത്തെ വാതിലിന്‍റെ പൂട്ട് തകർത്ത് അകത്തു കയറി മോഷണം നടത്തിയത്. ഓഫിസിലുണ്ടായിരുന്ന 16300 രൂപയും മറ്റു വസ്തുക്കളും മോഷ്ടിച്ചതായി പൊലീസ് പറഞ്ഞു.
പണം നഷ്ടമായതായി കണ്ടെത്തിയതിനെ തുടർന്ന് ജില്ലാ പൊലീസ് മേധാവി ഡി. ശിൽപയുടെ നിർദേശത്തെ തുടർന്ന് വൈക്കം ഡി.വൈ.എസ്.പി എ.ജെ തോമസിന്‍റെ നേതൃത്വത്തിൽ അന്വേഷണം നടത്തുകയായിരുന്നു. മോഷണം നടന്നതിനെ തുടർന്ന് പൊലീസ് സ്ഥലത്ത് നടത്തിയ പരിശോധനയിൽ ഇവിടെ നിന്നും പ്രതിയുടേത് എന്നു സംശയിക്കുന്ന വിരലടയാളവും ലഭിച്ചിരുന്നു. ഫിംഗർ പ്രിന്‍റ് ബ്യൂറോയും, സയന്‍റിഫിക്ക് സ്‌ക്വാഡും നടത്തിയ പരിശോധനയിലാണ് മോഷ്ടാവിന്‍റേതെന്ന് സംശയിക്കുന്ന വിരലടയാളം ലഭിച്ചത്. തുടർന്ന് പൊലീസ് നടത്തിയ പരിശോധനയിൽ മോഷ്ടാവായ കൊല്ലം സ്വദേശി സനോജിന്‍റെ വിരലടയാളമാണ് ഇതെന്ന് തിരിച്ചറിഞ്ഞു.
ALSO READ:വിലയിടിവിന് ഇരട്ടി പ്രഹരമേകി മോഷ്‌ടാക്കളും; ഇടുക്കിയിൽ ഏലം മോഷണം പതിവാകുന്നു
നിരവധി മോഷണക്കേസിലെ പ്രതിയായ സനോജിന്‍റെ വിരലയാളം പൊലീസിന്‍റെ രേഖകളിലുണ്ടായിരുന്നു. ഇയാളുടെ ചിത്രം പൊലീസ് വാട്‌സ്അപ്പ് ഗ്രൂപ്പുകളിൽ കൈമാറി. തുടർന്ന് തലയോലപ്പറമ്പ് ബസ് സ്റ്റാന്‍റിന് സമീപത്ത് പ്രതി നിൽക്കുന്നതായി പൊലീസിനു വിവരം ലഭിച്ചതിന് പിന്നാലെ തലയോലപ്പറമ്പ് സ്‌റ്റേഷൻ ഹൗസ് ഓഫിസർ ഇൻസ്‌പെക്ടർ മനോജ്, കടുത്തുരുത്തി സ്‌റ്റേഷൻ ഹൗസ് ഓഫിസർ കെ.ജെ തോമസ് എന്നിവർ ചേർന്ന് പ്രതിയെ കസ്റ്റഡിയിൽ എടുക്കുകയായിരുന്നു.
കഴിഞ്ഞ ദിവസം കടുത്തുരുത്തിയിൽ ബ്ലോക്ക് ഓഫിസിൽ മോഷണ ശ്രമം നടന്നിരുന്നു. ഈ കേസിൽ അന്വേഷണം നടത്തുന്നതിനായി കടുത്തുരുത്തി, തലയോലപ്പറമ്പ് സി.ഐമാരെ ഉൾപ്പെടുത്തി ഒരു അന്വേഷണ സംഘം രൂപീകരിച്ചിരുന്നു. ഈ സംഘത്തിന്‍റെ നേതൃത്വത്തിൽ നടത്തിയ അന്വേഷണത്തിലാണ് പ്രതിയെപ്പറ്റി കൃത്യമായ സൂചന ലഭിച്ചത്. ഇയാൾ പുനലൂർ, അഞ്ചൽ, പാലോട്, ചടയമംഗലം എന്നീ പൊലീസ് സ്റ്റേഷനുകളിൽ ആകെ ഒമ്പത് മോഷണ കേസുകളിൽ പ്രതിയുമാണ്.
