കോട്ടയം: സ്ഥാനാര്‍ഥികള്‍ക്ക് വോട്ടുറപ്പിക്കാന്‍ മുതിര്‍ന്ന നേതാക്കള്‍ പാലായിലേക്ക്. മുഖ്യമന്ത്രി പിണറായി വിജയന്‍ ഇന്ന് തെരഞ്ഞെടുപ്പ് പ്രചരണ രംഗത്തിറങ്ങും. മൂന്നു ദിവസങ്ങളിലായി മൂന്നു യോഗങ്ങളില്‍ വീതം മുഖ്യമന്ത്രി സംസാരിക്കും. പരമാവധി വോട്ടുകള്‍ ഉറപ്പാക്കി തെരഞ്ഞെടുപ്പിനെ നേരിടാനാണ് എൽ ഡി എഫ് നീക്കം. വൈകിട്ട് 4ന് കൊല്ലപ്പള്ളിയിലും അഞ്ചിന് കരൂരും മുഖ്യമന്ത്രി പങ്കെടുക്കും.
യുഡിഎഫിനായി എ കെ ആൻ്റണിയാണ് പ്രചരണ രംഗത്ത്. എ കെ ആൻ്റണി പങ്കെടുക്കുന്ന പൊതുയോഗത്തിൽ പി ജെ ജോസഫും വേദി പങ്കിടും. കുരിശുപള്ളി കലവയില്‍ വൈകിട്ട് നാലിന് നടക്കുന്ന യോഗത്തില്‍ ജോസ് കെ മാണിയും പങ്കെടുക്കും. ഉമ്മന്‍ ചാണ്ടി, രമേശ് ചെന്നിത്തല, മുല്ലപ്പള്ളി രാമചന്ദ്രന്‍, പി കെ കുഞ്ഞാലിക്കുട്ടി എന്നിവരും പ്രചരണത്തിനെത്തും. എൻഡിഎ പ്രചരണത്തിനായി ബി ജെ പി ദേശീയ ജനറൽ സെക്രട്ടറി വി മുരളീധര്‍ റാവു നാളെ പാലായിലെത്തും. ദേശീയ സെക്രട്ടറി സുനില്‍ ദിയോദാര്‍, കെ സുരേന്ദ്രന്‍, എഎന്‍ രാധാകൃഷ്ണന്‍, പി കെ കൃഷ്ണദാസ് തുടങ്ങിയവരും മണ്ഡലത്തിലുണ്ട്. ഭരണങ്ങാനം, എലിക്കുളം മീനച്ചില്‍ പഞ്ചായത്തുകളിലാണ് എല്‍ഡിഎഫ് സ്ഥാനാര്‍ഥി മാണി സി കാപ്പൻ്റെ വാഹന പര്യടനം.
തലനാട്, മൂന്നിലവ് പഞ്ചായത്തുകളില്‍ യുഡിഎഫ് സ്ഥാനാര്‍ഥി ജോസ് ടോം പ്രചാരണം തുടരും. കടനാട് മേലുകാവ്, മൂന്നിലവ് പഞ്ചായത്തുകളിലാണ് എന്‍ഡിഎ സ്ഥാനാര്‍ഥി എന്‍ ഹരിയുടെ പര്യടനം.
