കോട്ടയം: സിനിമ ലോക്കേഷനിലേക്ക് കൊണ്ടുപോകുന്ന വഴി ജൂനിയർ ആർട്ടിസ്റ്റായ പെൺകുട്ടിക്ക് നേരെ ലൈംഗികാതിക്രമം നടത്തിയ മധ്യവയസ്‌കൻ അറസ്റ്റിൽ. കങ്ങഴ കടയനിക്കാട് സ്വദേശി റെജി എം കെ (51) എന്നയാളെയാണ് ചങ്ങനാശ്ശേരി പൊലീസ് അറസ്റ്റ് ചെയ്‌തത്. സിനിമയിൽ ജൂനിയർ ആർട്ടിസ്റ്റുകളെ നൽകുന്നയാളാണ് റെജി.
ഷൂട്ടിംഗിനായി പോകും വഴി ഒഴിഞ്ഞ വീട്ടിൽ വച്ച് ഇയാൾ പെൺകുട്ടിയെ പീഡിപ്പിച്ചുവെന്നാണ് പരാതി. കാഞ്ഞിരപ്പള്ളി, തിടനാട് മേഖലയിൽ ഷൂട്ടിങ് പുരോഗമിക്കുന്ന ചിത്രത്തിൽ അഭിനയിക്കുവാൻ എത്തിയ പെൺകുട്ടിക്ക് നേരെയായായിരുന്നു ലൈംഗികാതിക്രമം ഉണ്ടായത്.
ട്രെയിനിൽ ലൈംഗികാതിക്രമം : ട്രെയിൻ യാത്രക്കിടെ വനിത ഡോക്‌ടർക്ക് നേരെ ലൈംഗികാതിക്രമം നടത്തിയ പ്രതിയെ പിടികൂടിയിരുന്നു. തൃശൂർ സ്വദേശിയായ സനീഷാണ് പിടിയിലായത്. ഹോസ്‌ദുർഗ് പൊലീസാണ് ഇയാളെ പിടികൂടിയത്. മംഗളൂരുവിൽ ഹൗസ് സർജനായ യുവതിയെ ചെന്നൈ മംഗളൂരു എക്‌സ്‌പ്രസിൽ വച്ച് ഇയാൾ ശല്യം ചെയ്യുകയായിരുന്നു.
തലശ്ശേരിയിൽ നിന്ന് കയറിയ ഇയാൾ പീഡിപ്പിക്കാൻ ശ്രമിച്ചെന്ന് ചൂണ്ടിക്കാട്ടി യുവതി കാസർകോട് റെയിൽവേ പൊലീസിൽ പരാതി നൽകി. തുടർന്നാണ് ഇയാളെ പൊലീസ് പിടികൂടിയത്.
Also read : ട്രെയിൻ യാത്രയ്ക്കിടെ വനിത ഡോക്‌ടർക്ക് നേരെ ലൈംഗികാതിക്രമം: തൃശൂർ സ്വദേശി പിടിയിൽ
ലഹരി മരുന്ന് നൽകി പീഡിപ്പിച്ചു : താമരശ്ശേരിയില്‍ കോളജ് വിദ്യാര്‍ഥിനിക്ക് ലഹരി മരുന്ന് നല്‍കി പീഡിപ്പിച്ചതായി പരാതി. താമരശേരിയിലെ സ്വകാര്യ കോളജിലെ ഒന്നാം വര്‍ഷ ബിരുദ വിദ്യാര്‍ഥിയെയാണ് പീഡിപ്പിച്ചത്. പീഡന ശേഷം താമരശ്ശേരി ചുരത്തിലെ ഒന്‍പതാം വളവില്‍ പെൺകുട്ടിയെ ഉപേക്ഷിക്കുകയായിരുന്നു. വ്യാഴാഴ്‌ച ഉച്ചയ്‌ക്കാണ് പെണ്‍കുട്ടിയെ താമരശ്ശേരിയിൽ നിന്ന് കണ്ടെത്തിയത്.
ചൊവ്വാഴ്‌ച കോളജ് ഹോസ്റ്റലില്‍ നിന്ന് വീട്ടിലേക്ക് പോയ പെണ്‍കുട്ടിയെ കാണാതായിരുന്നു. പിന്നാലെ പിതാവ് പൊലീസില്‍ പരാതി നല്‍കി. ലഹരി മരുന്ന് നല്‍കിയ പ്രതി വിവിധയിടങ്ങളിലെത്തിച്ച് പീഡനത്തിന് ഇരയാക്കിയെന്ന് പെണ്‍കുട്ടി മൊഴി നല്‍കി. ലഹരി മാഫിയ സംഘത്തിലെ കണ്ണിയാണ് പ്രതിയെന്ന് പൊലീസ് പറഞ്ഞു. പ്രതിയെ ഉടൻ പിടികൂടുമെന്നും പൊലീസ് അറിയിച്ചു.
Also read : ലഹരി മരുന്ന് നല്‍കി പീഡിപ്പിച്ച ശേഷം വഴിയില്‍ ഉപേക്ഷിച്ചു; കാണാതായ ബിരുദ വിദ്യാര്‍ഥിനിയെ കണ്ടെത്തി
കെഎസ്ആര്‍ടിസിയില്‍ പീഡനശ്രമം : കെഎസ്ആര്‍ടിസി ബസില്‍ യുവതിക്ക് നേരെ പീഡനശ്രമം നടത്തിയ പ്രതിയെ പൊലീസ് പിടികൂടിയിരുന്നു. കാഞ്ഞങ്ങാട് - പത്തനംതിട്ട റൂട്ടിലോടുന്ന കെഎസ്ആര്‍ടിസി ബസിലായിരുന്നു പീഡനശ്രമം. ബസില്‍ യാത്ര ചെയ്യുകയായിരുന്ന യുവതിക്ക് നേരെ മലപ്പുറം വളാഞ്ചേരിക്ക് സമീപത്ത് വച്ചാണ് അതിക്രമം ഉണ്ടായത്.
യുവതിയും യുവാവും കണ്ണൂരില്‍ നിന്നായിരുന്നു ബസില്‍ കയറിയത്. കോഴിക്കോട് മുതല്‍ തന്നെ ഇയാള്‍ യുവതിയെ ശല്യം ചെയ്യാന്‍ ആരംഭിച്ചിരുന്നുവെന്ന് സഹയാത്രികര്‍ പറഞ്ഞു. തുടര്‍ന്ന് യുവതി ഇക്കാര്യം കണ്ടക്‌ടറെ അറിയിക്കുകയായിരുന്നു. പിന്നീട് ഇയാളെ മറ്റൊരു സീറ്റിലേക്ക് മാറ്റിയിരുത്തി. എന്നാല്‍, യാത്രക്കിടെ വീണ്ടും ഇയാൾ യുവതിക്ക് അരികെലെത്തി ഉപദ്രവിക്കാന്‍ ശ്രമിക്കുകയായിരുന്നു.
Also read : കെഎസ്ആര്‍ടിസി ബസില്‍ യാത്രക്കാരിക്ക് നേരെ പീഡനശ്രമം, പ്രതി പിടിയില്‍
