കോട്ടയം: കോപ്പിയടിച്ചെന്ന ആരോപണത്തില്‍ മനംനൊന്ത് വിദ്യാർഥി ആത്മഹത്യ ചെയ്ത സംഭവത്തിലെ എംജി സർവകലാശാലയുടെ വിമർശനങ്ങൾക്ക് എതിരെ എംജി യൂണിവേഴ്‌സിറ്റി മുൻ വൈസ് ചാൻസലറും മുന്‍ ദേശീയ ന്യൂനപക്ഷ കമ്മിഷന്‍ അംഗവുമായ ഡോ. സിറിയക് തോമസ്. ഉപസമിതി തെളിവുകള്‍ വേണ്ടത്ര പരിശോധിക്കാതെയാണ് കോളജിന് വീഴ്ച പറ്റിയതായി വിധിച്ചതെന്ന് സിറിയക് തോമസ് പറഞ്ഞു. പ്രധാന തെളിവായ ഹാള്‍ ടിക്കറ്റ് പരിശോധിക്കാതെയുള്ള വിധി നീതി നിഷേധമാണെന്നും സിറിയക് തോമസ് കൂട്ടിച്ചേര്‍ത്തു.
ഉപസമിതിയുടെ റിപ്പേര്‍ട്ടില്‍ ദൃശ്യങ്ങള്‍ പുറത്ത് വിട്ടതും കുട്ടിയെ 32 മിനിറ്റ് പരീക്ഷാ ഹാളില്‍ ഇരുത്തിയതുമാണ് വീഴ്ചയായി ചൂണ്ടിക്കാട്ടുന്നത്. ദൃശ്യങ്ങള്‍ പുറത്ത് വിടുന്നതില്‍ സർവകലാശാലയുടെ അനുമതി വേണമോയെന്ന കാര്യം തന്‍റെ അറിവിലില്ല. ആരോപണങ്ങള്‍ ഉയര്‍ന്നപ്പോള്‍ സ്വയം പ്രതിരോധത്തിന്‍റെ ഭാഗമായാകാം കോളജ് ദൃശ്യങ്ങള്‍ മാധ്യമങ്ങള്‍ക്ക് മുന്‍പില്‍ വെളിപ്പെടുത്തിയത്. കോളജിലെ സൗകര്യങ്ങള്‍ സർവകലാശാലയ്ക്ക് വിട്ട് നല്‍കുകയാണ് ചെയ്തത്. കാഞ്ഞിരപ്പള്ളിയില്‍ മറ്റ് കോളജുകള്‍ ഉണ്ടായിട്ടും സർവകലാശാല ചേര്‍പ്പുങ്കലിലേക്കാണ് കുട്ടിക്ക് സെന്‍റർ അനുവദിച്ച് നല്‍കിയതെന്നും അദ്ദേഹം ചൂണ്ടിക്കാട്ടി. കോപ്പിയടി ആരോപണം സാധൂകരിക്കുന്ന പ്രധാന തെളിവുകളായ ഹാള്‍ ടിക്കറ്റും, സാക്ഷി മൊഴികളും പരിശോധിക്കാതെയാണ് സമിതി നിഗമനത്തില്‍ എത്തിച്ചേര്‍ന്നത്. ഇത് നീതിനിഷേധമാണെന്നും സിറിയക് തോമസ് പറഞ്ഞു.
കുട്ടിക്ക് മാനസിക സംഘര്‍ഷം ഉണ്ടാകത്തക്കവിധം യാതൊന്നും ഹാളില്‍ നടന്നതായി ദൃശ്യങ്ങളിലില്ല. കോളജ് അധികാരികള്‍ക്ക് പ്രൈവറ്റ് രജിസ്ട്രേഷനിലുള്ള വിദ്യാർഥികളുടെ കൂടുതല്‍ വിവരങ്ങള്‍ അറിയില്ല. വീഴ്ചയുണ്ടെന്ന് പറയുമ്പോഴും തെളിവുകള്‍ പരിശോധിക്കാത്തത് വൈരുദ്ധ്യമാണെന്നും അദ്ദേഹം പറഞ്ഞു. നിഗമനങ്ങള്‍ ഊഹോപോഹത്തിന്‍റെ അടിസ്ഥാനത്തിലായിരിക്കരുത്. ഉപസമിതി തെളിവുകള്‍ പരിശോധിക്കാതെയാണ് കോളജ് വീഴ്ച വരുത്തിയെന്ന നിഗമനത്തില്‍ എത്തിച്ചേര്‍ന്നത്. വൈസ് ചാന്‍സലര്‍ നേരിട്ട് വാര്‍ത്താ സമ്മേളനം നടത്തുന്ന പതിവ് സർവകലാശാലയ്ക്കില്ല. ഇക്കാര്യത്തില്‍ ആരുടെയെങ്കിലും സമ്മര്‍ദ്ദം ഉണ്ടായിട്ടുണ്ടാകാമെന്നും സിറിയക് തോമസ് പറഞ്ഞു.
മുഴുവന്‍ തെളിവുകളും പരിശോധിക്കണം. ഉപസമിതിയുടെ റിപ്പോര്‍ട്ട് സിന്‍ഡിക്കേറ്റ് അംഗീകരിച്ചാല്‍ മാത്രമേ ഔദ്യോഗിക നടപടിയാകൂ. വൈസ് ചാന്‍സലറെ പോലെ തന്നെ പ്രിന്‍സിപ്പലിനും ക്രെഡിബിലിറ്റി ഉണ്ട്. കുട്ടികളുടെ മേല്‍ മനസിക സമ്മര്‍ദ്ദം കെട്ടി വയ്ക്കുന്നത് സമൂഹം തന്നെയാണ്. പഠിക്കാന്‍ മിടുക്കിയാണെന്നത് കൊണ്ട് കോപ്പിയടിച്ചിട്ടില്ല എന്ന് പറയാന്‍ പറ്റില്ല. വസ്തുതാപരമായ മുന്‍ വിധിയില്ലാത്ത അന്വേഷണമാണ് ചേര്‍പ്പുങ്കല്‍ സംഭവത്തില്‍ ഉണ്ടാകേണ്ടത് എന്നും സിറിയക് തോമസ് പറഞ്ഞു.
