ദുബായ്: 2022 ലെ എമേര്‍ജിങ് വനിത ക്രിക്കറ്റര്‍ക്കുള്ള ഐസിസിയുടെ പുരസ്‌കാരത്തിന് അര്‍ഹയായി ഇന്ത്യയുടെ രേണുക സിങ്. ഇന്ത്യയുടെ തന്നെ യാസ്‌തിക ഭാട്ട്യ, ഓസ്ട്രേലിയന്‍ താരം ഡാര്‍സീ ബ്രൗണ്‍, ഇംഗ്ലണ്ടിന്‍റെ അലീസ് കാപ്‌സി എന്നിവരെ മറികടന്നാണ് രേണുകയുടെ നേട്ടം. കഴിഞ്ഞ വര്‍ഷം 29 രാജ്യാന്തര മത്സരങ്ങളില്‍ ഇന്ത്യന്‍ കുപ്പായമണിഞ്ഞ രേണുക സിങ് 40 വിക്കറ്റുകള്‍ സ്വന്തമാക്കിയിരുന്നു.
പേസും സ്വിങ്ങുമായി എതിരാളികളെ വിറപ്പിച്ച താരം 4.62 ഇക്കോണമിയില്‍ 18 ഏകദിന വിക്കറ്റുകളാണ് കഴിഞ്ഞ വര്‍ഷം സ്വന്തമാക്കിയത്. 6.50 ഇക്കോണമിയില്‍ 22 വിക്കറ്റുകളായിരുന്നു 26കാരി ടി20 മത്സരങ്ങളില്‍ നിന്ന് പിഴുതത്. ഏകദിന ക്രിക്കറ്റ് ഫോര്‍മാറ്റില്‍ 14.88 ശരാശരിയിലായിരുന്നു രേണുക 18 വിക്കറ്റുകള്‍ നേടിയത്.
ഇംഗ്ലണ്ടിനെതിരായ രണ്ട് മത്സരങ്ങളില്‍ നിന്നായിരുന്നു ഇതില്‍ എട്ട് വിക്കറ്റും. ശ്രീലങ്കയ്ക്ക് എതിരായ പരമ്പരയില്‍ ഏഴ് പേരെ മടക്കിയപ്പോള്‍ ഓസ്ട്രേലിയക്കെതരെ ഏഴ് ടി20 മത്സരങ്ങളില്‍ നിന്ന് എട്ട് വിക്കറ്റും രേണുക സ്വന്തം പേരിലാക്കി. ഇതില്‍ കോമണ്‍വെല്‍ത്ത് ഗെയിംസില്‍ ഓസ്ട്രേലിയന്‍ ടോപ് ഓര്‍ഡറിനെ വിറപ്പിച്ച നാല് വിക്കറ്റ് നേട്ടവും ശ്രദ്ധേയമായിരുന്നു.
അലീസ ഹീലി, മെഗ് ലാന്നിംഗ്‌, ബേത് മൂണി, തഹ്ലിയ മഗ്രാത്ത് എന്നീ മുന്‍നിര ഓസീസ് താരങ്ങളെയാണ് രേണുക ആ മത്സരത്തില്‍ തിരികെ പവലിയനിലെത്തിച്ചത്. ഇന്നിങ്സില്‍ 18 റണ്‍സ് മാത്രം വഴങ്ങിയായിരുന്നു കങ്കാരുപ്പടയുടെ മുന്‍നിര നാല് വിക്കറ്റുകള്‍ രേണുക പിഴുതത്. പിന്നാലെ ബാര്‍ബഡോസിനെതിരായി നടന്ന മത്സരത്തിലും രേണുക നാല് വിക്കറ്റ് പ്രകടനം ആവര്‍ത്തിച്ചു.
അതേസമയം, പുരുഷതാരങ്ങളില്‍ ദക്ഷിണാഫ്രിക്കയുടെ പേസ് ബോളര്‍ മാര്‍ക്കോ യാന്‍സനാണ് ഐസിസിയുടെ എമേര്‍ജിങ് താരത്തിമുള്ള പുരസ്‌കാരത്തിന് അര്‍ഹനായത്. ഇന്ത്യന്‍ പേസര്‍ അര്‍ഷ്‌ദീപ് സിങ്, അഫ്‌ഗാന്‍ താരം ഇബ്രാഹിം സദ്രാന്‍, ന്യൂസിലന്‍ഡിന്‍റെ ഫിന്‍ അലന്‍ എന്നിവരെ മറികടന്നായിരുന്നു യാന്‍സന്‍റെ നേട്ടം. 2022 ല്‍ 36 ടെസ്റ്റ് വിക്കറ്റും 234 റണ്‍സും യാന്‍സന്‍ നേടി. കൂടാതെ ഏകദിനത്തില്‍ രണ്ട് വിക്കറ്റും ഒരു രാജ്യാന്ത ടി20 വിക്കറ്റും യാന്‍സന്‍ സ്വന്തമാക്കിയിരുന്നു.
Also Read: വിജയ സൂര്യ ; 2022ലെ മികച്ച ടി20 ക്രിക്കറ്ററായി സൂര്യകുമാർ യാദവ്
