ലഖ്‌നൗ : ഏകദിന ക്രിക്കറ്റ് ലോകകപ്പില്‍ (Cricket World Cup 2023) ജൈത്രയാത്ര തുടരാന്‍ ടീം ഇന്ത്യ (Team India) ഇന്നിറങ്ങുകയാണ്. തുടര്‍ച്ചയായ ആറാം ജയം തേടി ടീം ഇന്ത്യ ലഖ്‌നൗവിലെ ഏകന സ്റ്റേഡിയത്തില്‍ ഇറങ്ങുമ്പോള്‍ നിലവിലെ ചാമ്പ്യന്മരായ ഇംഗ്ലണ്ടാണ് എതിരാളികളായി എത്തുന്നത് (India vs England). ഉച്ചയ്‌ക്ക് രണ്ട് മണിക്കാണ് മത്സരം.
ലോകകപ്പില്‍ ആറാം ജയം തേടിയിറങ്ങുമ്പോള്‍ നായകന്‍ രോഹിത് ശര്‍മയ്‌ക്ക് കീഴില്‍ ഇന്ത്യ കളിക്കുന്ന നൂറാമത്തെ മത്സരമെന്ന പ്രത്യേകതയും ഈ പോരാട്ടത്തിനുണ്ട്. അന്താരാഷ്‌ട്ര ക്രിക്കറ്റില്‍ ഇന്ത്യന്‍ ടീമിനെ നൂറ് മത്സരങ്ങള്‍ നയിച്ച ഏഴാമത്തെ മാത്രം നായകനെന്ന നേട്ടത്തിനരികിലാണ് ഹിറ്റ്‌മാന്‍ നിലവില്‍. വിരാട് കോലിക്ക് ശേഷം ഈ നേട്ടത്തിലേക്ക് എത്തുന്ന ആദ്യത്തെ താരം കൂടിയാണ് രോഹിത് ശര്‍മ (Rohit Sharma Captaincy Record).
രോഹിത് ശര്‍മയ്‌ക്ക് കീഴില്‍ ടീം ഇന്ത്യ ഇതുവരെ മൂന്ന് ഫോര്‍മാറ്റിലായി 99 അന്താരാഷ്‌ട്ര മത്സരങ്ങളാണ് കളിച്ചിട്ടുള്ളത്. അതില്‍ 73 മത്സരങ്ങളിലും ജയിക്കാന്‍ ടീം ഇന്ത്യയ്‌ക്കായിട്ടുണ്ട്.
ഏകദിന ക്രിക്കറ്റില്‍ 39 മത്സരങ്ങളിലാണ് ഇതുവരെ രോഹിത് ശര്‍മ ഇന്ത്യയെ നയിച്ചിട്ടുള്ളത്. 76.31 ആണ് ഏകദിന ക്രിക്കറ്റില്‍ രോഹിത് ശര്‍മയ്‌ക്ക് കീഴില്‍ ഇന്ത്യയുടെ വിജയശതമാനം. ടി20യില്‍ രോഹിത് ക്യാപ്‌റ്റനായി കളിച്ച 51 മത്സരങ്ങളില്‍ 39 എണ്ണത്തില്‍ ഇന്ത്യ ജയിച്ചിട്ടുണ്ട്.
ടെസ്റ്റ് ക്രിക്കറ്റില്‍ രോഹിത് ശര്‍മയ്‌ക്ക് കീഴില്‍ ഇതുവരെ ഒന്‍പത് മത്സരങ്ങള്‍ മാത്രമാണ് ഇന്ത്യ കളിക്കാനിറങ്ങിയിട്ടുള്ളത്. അതില്‍ അഞ്ച് മത്സരവും ഇന്ത്യയ്‌ക്ക് ജയിക്കാനായി. രണ്ട് മത്സരം പരാജയപ്പെട്ടപ്പോള്‍ രണ്ടെണ്ണം സമനിലയില്‍ അവസാനിക്കുകയാണ് ഉണ്ടായത്.
ഈ ലോകകപ്പിലും രോഹിത് ശര്‍മയ്‌ക്ക് കീഴില്‍ വിജയക്കുതിപ്പ് നടത്തുകയാണ് ടീം ഇന്ത്യ. ഓസ്‌ട്രേലിയ, അഫ്‌ഗാനിസ്ഥാന്‍, പാകിസ്ഥാന്‍, ബംഗ്ലാദേശ്, ന്യൂസിലന്‍ഡ് ടീമുകളെ തോല്‍പ്പിച്ച ഇന്ത്യയ്‌ക്ക് 10 പോയിന്‍റാണ് നിലവില്‍. പോയിന്‍റ് പട്ടികയില്‍ രണ്ടാം സ്ഥാനക്കാരാണ് നിലവില്‍ രോഹിത് ശര്‍മയും സംഘവും.
ഈ ലോകകപ്പില്‍ ടീമിനായി ബാറ്റുകൊണ്ടും മികച്ച പ്രകടനം ഇതുവരെ നടത്താന്‍ രോഹിത് ശര്‍മയ്‌ക്കായിട്ടുണ്ട്. അഞ്ച് മത്സരത്തിലും ബാറ്റ് ചെയ്‌ത രോഹിത് 62.20 ശരാശരിയില്‍ 311 റണ്‍സ് ഇന്ത്യയ്‌ക്കായി നേടിയിട്ടുണ്ട്. ഇന്ത്യയ്‌ക്ക് വേണ്ടി ഇക്കുറി ലോകകപ്പില്‍ കൂടുതല്‍ റണ്‍സടിച്ച രണ്ടാമത്തെ താരമാണ് രോഹിത് ശര്‍മ.
