വേഗതയുടെ രാജാക്കന്മാർ ഫോർമുല വണ്ണിന്‍റെ പുതിയ സീസണായിതയ്യാറെടുക്കുന്നു. മാർച്ച് 17 ന് ആരംഭിക്കുന്ന ഓസ്ട്രേലിയൻ ഗ്രാൻഡ് പ്രീയിലൂടെയാണ് പുതിയ സീസണിന് തുടക്കമാകുന്നത്. നിലവിലെ ചാമ്പ്യനായ ലൂയിസ് ഹാമില്‍ട്ടൺ ഹാട്രിക്ക് കിരീടം ലക്ഷ്യമിട്ടിറങ്ങുമ്പോൾ അഞ്ചാം കിരീടം എന്ന ലക്ഷ്യവുമായാണ് സെബാസ്റ്റ്യൻ വെറ്റലെത്തുക.
21 ഗ്രാൻഡ് പ്രീകളുള്ള സീസണില്‍ തീപാറുന്ന പോരാട്ടങ്ങളാണ് നടക്കുക. ഇത്തവണ മെച്ചപ്പെട്ട സാങ്കേതിക മികവുള്ള മെഴ്സിഡസിന്‍റെ വാഹനവുമായാണ് ഹാമില്‍ട്ടൺ മത്സരത്തിനിറങ്ങുന്നത്. കഴിഞ്ഞ രണ്ട് സീസണുകളിലും കിരീടം നേടിയ ഹാമില്‍ട്ടൺ ഇത്തവണ കിരീടം നിലനിർത്തിയാല്‍ ഏറ്റവും കൂടുതല്‍ ഫോർമുല വൺ കിരീടം നേടിയവരുടെ പട്ടികയില്‍ രണ്ടാം സ്ഥാനത്തെത്തും. ഏഴ് കിരീടങ്ങളുള്ള മൈക്കിൾ ഷുമാക്കറാണ് ഒന്നാം സ്ഥാനത്ത്.
നാല് തവണ കിരീടം ചൂടിയിട്ടുള്ള സെബാസ്റ്റ്യൻ വെറ്റല്‍ ഇത്തവണ കിരീട പ്രതീക്ഷയിലാണ് മത്സരത്തിനെത്തുന്നത്.കഴിഞ്ഞ സീസണില്‍ രണ്ടാം സ്ഥാനത്തായിരുന്നു ഫെരാരിയുടെ വെറ്റല്‍. ഇത്തവണ കിരീടം നേടിയാല്‍ ഏറ്റവും കൂടുതല്‍ കിരീടമുള്ളവരുടെ പട്ടികയില്‍ ഹാമില്‍ട്ടനൊപ്പമെത്താൻ വെറ്റലിന് സാധിക്കും.
ഓസ്ട്രേലിയൻ ഓപ്പണോടെ ആരംഭിക്കുന്ന പുതിയ സീസൺ ഡിസംബർ ഒന്നിന് അബുദാബി ഗ്രാൻഡ് പ്രീയിലൂടെയാണ് അവസാനിക്കുന്നത്. ബഹ്‌റൈന്‍, ചൈനീസ്, അസെര്‍ബെയ്ജാന്‍, സ്പാനിഷ്,മൊണാക്കോ, കനേഡിയന്‍, ഫ്രഞ്ച്, ഓസ്ട്രിയന്‍, ബ്രിട്ടീഷ്, ജര്‍മന്‍, ഹംഗേറിയന്‍, ബല്‍ജിയം, ഇറ്റാലിയന്‍, സിംഗപ്പൂര്‍, റഷ്യന്‍, ജപ്പാനീസ്, മെക്‌സിക്കന്‍, അമേരിക്കന്‍, ബ്രസീലിയന്‍ എന്നിവയാണ് മറ്റ് ഗ്രാൻഡ് പ്രീകൾ.
