2023ന്‍റെ താളും മടക്കാൻ ഒരുങ്ങുകയാണ് മലയാള സിനിമ. സൂപ്പർ ഹിറ്റുകൾ കുറവെങ്കിലും മലയാള സിനിമ നേട്ടംകൊയ്‌ത വർഷം കൂടിയായിരുന്നു 2023. അന്താരാഷ്‌ട്ര തലങ്ങളിലടക്കം കയ്യടി നേടാൻ മലയാളത്തില്‍ പിറന്ന പല സിനിമകൾക്കും സാധിച്ചു. 2018, തടവ്, അദൃശ്യജാലകങ്ങൾ, ആട്ടം എന്നിവ അക്കൂട്ടത്തിൽപ്പെടും.
2023ൽ മലയാള സിനിമയെ ദേശീയ - അന്തർദേശീയ തലത്തിലേക്ക് ഉയർത്തിയ ചിത്രമായിരുന്നു 2018. ജൂഡ് ആന്തണി ജോസഫ് സംവിധാനം ചെയ്‌ത ഈ ചിത്രം ഓസ്‌കര്‍ പുരസ്‌കാരത്തിനുള്ള വിദേശ ഭാഷാ ചിത്രങ്ങളുടെ മത്സര വിഭാഗത്തിലേക്ക് ഇന്ത്യയുടെ ഔദ്യോഗിക എന്‍ട്രിയായി തെരഞ്ഞെടുക്കപ്പെട്ടിരുന്നു. ലിജോ ജോസ് പെല്ലിശ്ശേരിയുടെ ജെല്ലിക്കെട്ടിന് ശേഷം ഈ നേട്ടം കൈവരിക്കുന്ന സിനിമയായി 2018.
മലയാളത്തിലെ മിക്ക യുവതാരങ്ങളും ഒന്നിച്ചെത്തിയ ചിത്രം കൂടിയായിരുന്നു 2018. ചിത്രം അത്തരത്തില്‍ പരിഗണിക്കപ്പെട്ടത് കൂട്ടായ്‌മയുടെ വിജയമാണെന്നാണ് ജൂഡ് ആന്തണി ജോസഫ് ഇടിവി ഭാരതിനോട് പ്രതികരിച്ചത്. മലയാളത്തിലെ എക്കാലത്തെയും ഉയര്‍ന്ന കലക്ഷൻ നേടിയ ചിത്രവുമായി 2018.
പിന്നീടൊരു ബോക്‌സ് ഓഫിസ് തരംഗം സംഭവിക്കുന്നത് വീക്കെൻഡ് ബ്ലോക്ക് ബസ്റ്ററിന്‍റെ ബാനറിൽ സോഫിയ പോൾ നിർമിച്ച 'ആർഡിഎക്‌സി'ന്‍റെ വരവോടെ ആയിരുന്നു. ഷെയ്‌ന്‍ നിഗം, ആന്‍റണി വർഗീസ്, നീരജ് മാധവ് തുടങ്ങിയവർ പ്രധാന വേഷത്തിൽ എത്തിയ ചിത്രം സംവിധാനം ചെയ്‌തത് നഹാസ് ഹിദായത്താണ്. '2018' എന്ന സിനിമയ്ക്ക് ശേഷം ഏറ്റവും കൂടുതൽ പണം വാരിയ ചിത്രങ്ങളിൽ ഒന്നുകൂടിയായി മാറി 'ആർഡിഎക്‌സ്'. സൗബിന്‍റെ രോമാഞ്ചവും ഈ വർഷം ബോക്‌സോഫിസിൽ തരംഗമായ ചിത്രമാണ്.
2023 മമ്മൂട്ടി അങ്ങെടുത്തു മക്കളേ: അക്ഷരാർഥത്തിൽ 2023 മലയാളത്തിന്‍റെ മഹാനടൻ മമ്മൂട്ടിയുടെ വർഷമായിരുന്നു എന്ന് പറയാം. വൈവിധ്യമാർന്ന കഥാപാത്രങ്ങളുമായി മമ്മൂട്ടി തിരശീലയിൽ പ്രേക്ഷകരെ വിസ്‌മയിപ്പിച്ചു. 2022 ഡിസംബറിൽ മമ്മൂട്ടി ചിത്രം 'നൻപകൽ നേരത്ത് മയക്കം' ഐഎഫ്എഫ്കെയിൽ പ്രദർശിപ്പിച്ചുവെങ്കിലും റിലീസിന് എത്തിയത് 2023 ജനുവരിയിൽ ആയിരുന്നു.
പിന്നാലെ 'കണ്ണൂർ സ്‌ക്വാഡ്', 'കാതൽ' തുടങ്ങിയ ചിത്രങ്ങളിലെ പ്രകടനങ്ങളിലൂടെ മമ്മൂട്ടി സിനിമ കലണ്ടറിലെ 2023 എന്ന വർഷത്തെ തന്‍റെ പേരിലാക്കി. ഈ മൂന്ന് ചിത്രങ്ങളും നിർമ്മിച്ചത് അദ്ദേഹത്തിന്‍റെ തന്നെ ഉടമസ്ഥതയിലുള്ള മമ്മൂട്ടി കമ്പനിയാണ് എന്നതും ശ്രദ്ധേയം.
'നേരി'ലൂടെ തിരിച്ചുവന്ന് മോഹൻലാൽ : മോഹൻലാൽ - ജീത്തു ജോസഫ് കൂട്ടുകെട്ടിൽ തിയേറ്ററുകളിൽ എത്തിയ ചിത്രമാണ് 'നേര്'. ഡിസംബർ 21ന് റിലീസ് ചെയ്‌ത 'നേര്' മോഹൻലാലിന്‍റെ തിരിച്ചുവരവിന് തന്നെയാണ് അക്ഷരാർഥത്തിൽ വഴിയൊരുക്കിയത്. ഈ വർഷം താരം നായകനായി റിലീസിന് എത്തിയ 'മോൺസ്റ്റർ', 'എലോൺ' തുടങ്ങിയ ചിത്രങ്ങൾ വലിയ വിമർശനം നേരിട്ടിരുന്നു. എന്നാൽ ഫെബ്രുവരിയിൽ റിലീസ് ചെയ്‌ത 'സ്‌ഫടികം' ഫോർകെ പ്രിന്‍റിന് ഒരു മുഖ്യധാര സിനിമയ്ക്ക് ലഭിക്കുന്ന വരവേൽപ്പ് തന്നെ ആയിരുന്നു ലഭിച്ചത്.
ഫഹദ് ഫാസിലിനെ നാകനാക്കി അഖിൽ സത്യൻ സംവിധാനം ചെയ്‌ത പാച്ചുവും അത്ഭുതവിളക്കും ഹിറ്റ് ചാർട്ടിൽ ഇടം നേടി. അഖിൽ സത്യൻ എന്ന ഡയറക്‌ടറിന്‍റെ ഭാവി പ്രതീക്ഷകൾക്കും ഈ സിനിമ വഴിയൊരുക്കി. ദിലീപ് - ഷാഫി കൂട്ടുകെട്ടിൽ എത്തിയ 'വോയ്‌സ് ഓഫ് സത്യനാഥൻ' ഒരിടവേളയ്‌ക്ക് ശേഷം ദിലീപിന്‍റെ വിജയചിത്രമായി. എന്നാൽ 'രാമലീല'യ്ക്കു‌ശേഷം അരുൺ ഗോപിയുടെ സംവിധാനത്തിലെത്തിയ 'ബാന്ദ്ര'യ്‌ക്ക് തിയേറ്ററുകളിൽ സമ്മിശ്ര പ്രതികരണം ആണ് ലഭിച്ചത്. തമന്ന മലയാളത്തിൽ അരങ്ങേറ്റം കുറിച്ച ചിത്രം കൂടിയായിരുന്നു 'ബാന്ദ്ര'.
2023ലെ സൂപ്പർഹിറ്റുകൾ : ജൂഡ് ആന്തണി ജോസഫിന്‍റെ '2018', റോബി വർഗീസിന്‍റെ 'കണ്ണൂർ സ്‌ക്വാഡ്', നഹാസ് ഹിദായത്തിന്‍റെ 'ആർഡിഎക്‌സ്', ജിത്തു മാധവന്‍റെ 'രോമാഞ്ചം' എന്നിവയാണ് മലയാളത്തിൽ ഈ വർഷം ഇതുവരെ സൂപ്പർ ഹിറ്റ് പട്ടികയിൽ ഇടംനേടിയ ചിത്രങ്ങൾ.
2023 ലെ ഹിറ്റുകൾ : നൻപകൽ നേരത്ത് മയക്കം, നെയ്‌മർ, പ്രണയവിലാസം, പാച്ചുവും അത്ഭുതവിളക്കും, പൂക്കാലം, ഗരുഡൻ, ഫാലിമി, കാതൽ, മധുര മനോഹര മോഹം എന്നീ സിനിമകളും ഈ വർഷത്തെ പണം വാരിയ ചിത്രങ്ങളാണ്.
പുരസ്‌കാരത്തിളക്കത്തിൽ വിൻസി : 'രേഖ' എന്ന ചിത്രത്തിലൂടെ ഈ വർഷത്തെ മികച്ച നടിക്കുള്ള സംസ്ഥാന പുരസ്‌കാരം വിൻസി അലോഷ്യസ് സ്വന്തമാക്കി. അവാർഡ് നേട്ടത്തിലെ സന്തോഷം താരം ഇടിവി ഭാരതുമായി പങ്കുവച്ചിരുന്നു. വിൻസി നായികയായി എത്തിയ ബോളിവുഡ് ചിത്രം 'ദ ഫെയ്‌സ് ഓഫ് ദ ഫെയ്‌സ്‌ലെസ്' 2024ലെ ഓസ്‌കറിനുള്ള മികച്ച ഒറിജിനൽ സ്‌കോർ വിഭാഗത്തിലേക്കുള്ള നോമിനേഷനില്‍ ഇടംനേടിയിരുന്നു. ഷെയ്‌സണ്‍ പി ഔസേഫാണ് ഈ ചിത്രത്തിന്‍റെ സംവിധായകൻ.
അതേസമയം ഏറെ പ്രതീക്ഷ ഉണ്ടായിരുന്നെങ്കിലും ഏറ്റവും നിരാശപ്പെടുത്തിയ നടനായിരുന്നു നിവിൻ പോളി എന്ന് ഷേണായിസ് തിയേറ്റർ ഉടമ സുരേഷ് ഷേണായി അഭിപ്രായപ്പെട്ടു. 'സാറ്റർഡേ നൈറ്റ്‌സ്, തുറമുഖം, രാമചന്ദ്രബോസ് ആൻഡ് കോ' തുടങ്ങിയ ചിത്രങ്ങൾക്ക് സാമ്പത്തികമായി വിജയമുണ്ടാക്കാൻ സാധിച്ചില്ല.
ദളപതി വിജയ് ചിത്രം ലിയോ, രജനീകാന്ത് ചിത്രം ജയിലർ എന്നിവ കേരളത്തിൽ നിന്ന് ഏറ്റവും പണം വാരിയ അന്യഭാഷാ ചിത്രങ്ങൾ ആണെന്ന് പറഞ്ഞ അദ്ദേഹം മലയാള സിനിമ വലിയ പ്രതിസന്ധിയിലാണെന്നും ചൂണ്ടിക്കാട്ടി. ജനങ്ങളെ തിയേറ്ററിലേക്ക് ആകർഷിക്കുന്ന തരത്തിലുള്ള സിനിമകൾ ഇറങ്ങുന്നില്ല. ഒടിടി എന്ന മോഹവലയം സ്വപ്‌നം കണ്ട് സിനിമയുണ്ടാക്കുന്ന സംവിധായകരെയും അദ്ദേഹം വിമർശിച്ചു.
2022ലും 2023ലും മലയാള സിനിമയുടെ അവസ്ഥ ഏകദേശം ഒന്നു തന്നെ. വരാനിരിക്കുന്ന ചിത്രങ്ങളിൽ 2024 തുടക്കത്തിൽ റിലീസ് ചെയ്യുന്ന മോഹൻലാൽ - ലിജോ പെല്ലിശ്ശേരി കൂട്ടുകെട്ടിന്‍റെ 'മലൈക്കോട്ടെ വാലിബനി'ൽ മാത്രമാണ് പ്രതീക്ഷ ഉള്ളതൊന്നും അദ്ദേഹം പറഞ്ഞു. ജനങ്ങൾക്ക് മികച്ച രീതിയിലുള്ള സേവനമാണ് തിയേറ്ററുകൾ നൽകുന്നതെന്നും അദ്ദേഹം കൂട്ടിച്ചേർത്തു.
നേട്ടംകൊയ്‌ത് അന്യഭാഷ സിനിമകൾ : അതേസമയം മലയാള സിനിമകൾക്ക് കാലിടറിയ 2023ൽ തമിഴ് - ഹിന്ദി സിനിമ മലയാളത്തിൽ നടത്തിയത് വൻ ബിസിനസാണ്. രജനീകാന്തിന്‍റെ 'ജയിലർ' കേരളത്തിൽ നിന്ന് 20 കോടിയിലേറെ രൂപയുടെ ഷെയറാണ് നേടിയത്. വിജയ് ചിത്രം 'ലിയോ', 'ജിഗർതണ്ട', ഷാരൂഖ് ഖാൻ ചിത്രങ്ങളായ 'ജവാൻ, പഠാൻ', രൺബീറിന്‍റെ 'ആനിമൽ' എന്നിവയും മികച്ച കളക്ഷൻ സ്വന്തമാക്കി.
പ്രശാന്ത് നീലിന്‍റെ പ്രഭാസ് - പൃഥ്വിരാജ് ചിത്രം സലാറും കേരളത്തിൽ നിന്ന് കോടികൾ കൊയ്യുകയാണ്. എന്നാൽ അന്യഭാഷ ചിത്രങ്ങളായി എത്തിയ കന്നട സൂപ്പർതാരം ശിവരാജ് കുമാറിന്‍റെ ഗോസ്റ്റ്, രക്ഷിത് ഷെട്ടിയുടെ സപ്‌ത സാഗര ദാചയെല്ലോ സൈഡ് ബി തുടങ്ങിയ ചിത്രങ്ങൾ ജനങ്ങൾ ഏറ്റെടുത്തില്ല.
