ഇന്ദ്രൻസ് (Indrans), ധ്യാൻ ശ്രീനിവാസൻ (Dhyan Sreenivasan), ദുർഗ കൃഷ്‌ണ (Durga Krishna) എന്നിവർ കേന്ദ്ര കഥാപാത്രങ്ങളായെത്തിയ 'ഉടൽ' (Udal) ഒടിടി റിലീസിനൊരുങ്ങുന്നു. ക്രിസ്‌മസിന് ശേഷമാകും ചിത്രം ഒടിടിയില്‍ സ്‌ട്രീമിംഗ് ആരംഭിക്കുക (Udal OTT Release). അതേസമയം 'ഉടലി'ന്‍റെ ഒടിടി റിലീസ് തീയതി നിര്‍മാതാക്കള്‍ പുറത്തു വിട്ടിട്ടില്ല (Udal OTT streaming date).
പ്രേക്ഷകരെ ആകാംക്ഷയുടെ മുൾമുനയിൽ നിർത്തി തിയേറ്ററുകളിലാകെ ഭീതി പടർത്തിയ ചിത്രമാണ് 'ഉടൽ'. രതീഷ് രഘുനന്ദ തിരക്കഥയെഴുതി സംവിധാനം ചെയ്‌ത ചിത്രം 2022 മെയ് 20നാണ് തിയേറ്റർ റിലീസ് ചെയ്‌തത്. തിയേറ്റര്‍ റിലീസ് കഴിഞ്ഞ് ഏഴ് മാസങ്ങള്‍ പിന്നിടുമ്പോഴാണ് ചിത്രം ഒടിടിയില്‍ സ്‌ട്രീമിംഗിനൊരുങ്ങുന്നത്.
റിലീസ് ചെയ്‌ത് ഒരു വർഷം പിന്നിട്ടിട്ടും ഒടിടിയില്‍ എത്താത്ത ചിത്രങ്ങളുടെ പട്ടികയിലായിരുന്നു 'ഉടലും'. ഈ സാഹചര്യത്തിലാണ് സിനിമയുടെ ഒടിടി റിലീസ് വിവരം പുറത്തു വരുന്നത്. സൈന പ്ലേയിലാണ് ചിത്രം സ്‌ട്രീമിംഗ് ആരംഭിക്കുക (Udal OTT Release on Saina Play). റെക്കോഡ് തുകയ്‌ക്കാണ് സൈന പ്ലേ 'ഉടലി'ന്‍റെ ഒടിടി അവകാശം സ്വന്തമാക്കിയത് (Udal OTT rights).
അതേസമയം സിനിമയുടെ ഒടിടി റിലീസ് വൈകിയതിനെ കുറിച്ച് നിര്‍മാതാക്കള്‍ പ്രതികരിച്ചു. 'ഉടലി'ന്‍റെ ഹിന്ദി റീമേക്കിന്‍റെ ചർച്ചകൾ നടക്കുന്നതിനെ തുടര്‍ന്നാണ് ഒടിടി റിലീസ് വൈകിയതെന്ന് നിർമാതാക്കൾ അറിയിച്ചു.
പ്രമേയം, കഥാപശ്ചാത്തലം, ദൃശ്യാവിഷ്ക്കാരം, ഭാവ പ്രകടനം എന്നിവയാൽ 'ഉടൽ' പ്രേക്ഷക ശ്രദ്ധ ആകർഷിച്ചിരുന്നു. ചിത്രം കണ്ടവരെല്ലാം മികച്ച അഭിപ്രായമാണ് സിനിമയെ കുറിച്ചും സിനിമയില്‍ അഭിനയിച്ചവരെ കുറിച്ചും പങ്കുവച്ചത്.
കുട്ടിച്ചായന്‍ എന്ന കഥാപാത്രത്തെയാണ് ചിത്രത്തില്‍ ഇന്ദ്രൻസ് അവതരിപ്പിച്ചത്. കുട്ടിച്ചായനായുള്ള ഇന്ദ്രന്‍സിന്‍റെ അസാമാന്യ പ്രകടനം ഏറെ പ്രശംസനകള്‍ ഏറ്റുവാങ്ങിയിരുന്നു. കിരൺ എന്ന കഥാപാത്രത്തെ ധ്യാൻ ശ്രീനിവാസനും ഷൈനി ചാക്കോയായ് എന്ന കഥാപാത്രത്തെ ദുർഗ കൃഷ്‌ണയും അവതരിപ്പിച്ചു.
ശ്രീ ഗോകുലം മൂവീസിന്‍റെ ബാനറിൽ ശ്രീ ഗോകുലം ഗോപാലന്‍ ആണ് സിനിമയുടെ നിര്‍മാണം. പ്രവീണ്‍, ബൈജു ഗോപാലന്‍ എന്നിവരാണ് സഹ നിർമാതാക്കൾ. ഡ്രീം ബിഗ് ഫിലിംസാണ് സിനിമയുടെ ഡിസ്ട്രിബ്യൂഷൻ പാർട്‌ണര്‍.
മനോജ് പിള്ള ഛായാഗ്രഹണവും നിഷാദ് യൂസഫ് എഡിറ്റിംഗും നിര്‍വഹിച്ചു. വില്യം ഫ്രാൻസിസ് ആണ് ചിത്രത്തിലെ ഗാനങ്ങള്‍ക്ക് സംഗീതം ഒരുക്കിയത്. എക്‌സിക്യൂട്ടീവ് പ്രൊഡ്യൂസർ - കൃഷ്‌ണമൂർത്തി.
അതേസമയം ദിലീപ് നായകനായെത്തുന്ന 'തങ്കമണി'യാണ് രതീഷ് രഘുനന്ദന്‍റെ സംവിധാനത്തിൽ റിലീസിനൊരുങ്ങുന്ന പുതിയ ചിത്രം. ദിലീപിന്‍റെ കരിയറിലെ ഏറെ വ്യത്യസ്‌തമായ കഥാപാത്രമായിരിക്കും ചിത്രത്തിലേതെന്നാണ് സൂചന. ദിലീപിന്‍റെ 148-ാമത് ചിത്രം കൂടിയാണ് 'തങ്കമണി'.
1986 ഒക്‌ടോബര്‍ 21ന് ഇടുക്കിയിലെ കാമാക്ഷി എന്ന ഗ്രാമ പഞ്ചായത്തിലെ തങ്കമണി എന്ന ഗ്രാമത്തില്‍ ഒരു ബസ് സര്‍വീസുമായി ബന്ധപ്പെട്ട് ഉണ്ടായ തര്‍ക്കത്തെ തുടര്‍ന്ന് പൊലീസ് ലാത്തിച്ചാര്‍ജും വെടിവയ്‌പ്പും ഉണ്ടായിരുന്നു. ഇതേ തുടര്‍ന്നുണ്ടായ സംഭവങ്ങളാണ് 'തങ്കമണി'യുടെ ചിത്രപശ്ചാത്തലം.
Also Read: 'പെണ്ണിന്‍റെ പേരല്ല തങ്കമണി'; ദിലീപിന്‍റെ തങ്കമണി ഗാനം ട്രെന്‍ഡിംഗില്‍
