കന്നഡയില്‍ അരങ്ങേറ്റത്തിനൊരുങ്ങി ഫഹദ് ഫാസില്‍. ശ്രീമുരളിയെ നായകനാക്കി സൂരി സംവിധാനം ചെയ്യുന്ന 'ബഗീര' എന്ന സിനിമയിലൂടെയാണ് ഫഹദ് ഫാസില്‍ കന്നഡയില്‍ അരങ്ങേറ്റം കുറിക്കാനൊരുങ്ങുന്നത്. ഒരു സിബിഐ ഉദ്യോഗസ്ഥനായാണ് 'ബഗീര'യില്‍ ഫഹദ് പ്രത്യക്ഷപ്പെടുന്നത് എന്നാണ് ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നത്.
ചിത്രത്തിലെ നായകന്‍ ശ്രീമുരളിയും ഒരു പൊലീസ് ഉദ്യോഗസ്ഥനായാണ് എത്തുന്നത്. പാന്‍ ഇന്ത്യന്‍ പ്രേക്ഷകരെ ലക്ഷ്യമിട്ടുള്ള ആക്ഷന്‍ ചിത്രമാണ് 'ബഗീര'. സിനിമയുടെ 50 ശതമാനം ചിത്രീകരണം പൂര്‍ത്തിയായതായി അണിയറപ്രവര്‍ത്തകര്‍ അറിയിച്ചു.
ചിത്രത്തിന്‍റെ അടുത്ത ഷെഡ്യൂള്‍ ഫെബ്രുവരിയില്‍ ആരംഭിക്കുമെന്നാണ് സൂചന. ബെംഗളൂരുവും മംഗളൂരുവുമാണ് സിനിമയുടെ പ്രധാന ലൊക്കേഷനുകള്‍. 'ബഗീര'യുടെ ഫസ്‌റ്റ് ലുക്ക് 2020 ഡിസംബറില്‍ അണിയറപ്രവര്‍ത്തകര്‍ പുറത്തുവിട്ടിരുന്നു.
ഫസ്‌റ്റ് ലുക്ക് വലിയ പ്രേക്ഷക ശ്രദ്ധ നേടിയിരുന്നു. സമൂഹം ഒരു വനമായി രൂപാന്തരപ്പെടുമ്പോള്‍ ഒരേയൊരു വേട്ടമൃഗം മാത്രം നീതിക്കായി ഗര്‍ജിക്കും എന്നായിരുന്നു പോസ്‌റ്ററിലെ കാപ്‌ഷന്‍. കെജിഎഫ്‌ സംവിധായകന്‍ പ്രശാന്ത് നീല്‍ ആണ് സിനിമയുടെ തിരക്കഥ ഒരുക്കുക.
കെജിഎഫ്‌ നിര്‍മാതാക്കളായ ഹോംബാലെ ഫിലിംസ് ആണ് സിനിമയുടെ നിര്‍മാതാക്കള്‍. ഹോംബാലെ ഫിലിംസിന്‍റെ മലയാള ചിത്രം 'ധൂമ'ത്തിലും ഫഹദ് ഫാസില്‍ ആണ് നായകനായെത്തുന്നത്. ഈ സിനിമയുടെ ചിത്രീകരണം ഫഹദ് പൂര്‍ത്തിയാക്കിയിരുന്നു.
Also Read:'ഞാന്‍ കുട്ടികള്‍ക്കൊപ്പം'; കെആര്‍ നാരായണന്‍ ഇന്‍സ്‌റ്റിറ്റ്യൂട്ട് സമരത്തില്‍ ഫഹദ് ഫാസില്‍
