Sita Ramam release in UAE: ദുല്‍ഖര്‍ സല്‍മാന്‍റെ ഏറ്റവും പുതിയ റിലീസ് ചിത്രമാണ് 'സീതാ രാമം'. ഓഗസ്‌റ്റ്‌ അഞ്ചിന്‌ തിയേറ്ററുകളിലെത്തിയ ചിത്രം ഇപ്പോഴും തിയേറ്ററുകളില്‍ മികച്ച രീതിയില്‍ മുന്നേറുകയാണ്. റിലീസിന് ഒരു ദിനം ബാക്കി നില്‍ക്കെയാണ്‌ യുഎഇ അടക്കമുള്ള ഗള്‍ഫ്‌ രാജ്യങ്ങളില്‍ ചിത്രത്തിന് വിലക്ക് ഏര്‍പ്പെടുത്തിയത്‌. മതവികാരത്തെ വ്രണപ്പെടുത്തുന്നുവെന്ന് ചൂണ്ടിക്കാട്ടിയാണ് വിവിധ രാജ്യങ്ങളില്‍ സിനിമയ്‌ക്ക് വിലക്കേര്‍പ്പെടുത്തിയത്.
Sita Ramam clears censor board: ഇപ്പോഴിതാ യുഎഇയില്‍ ചിത്രത്തിന്‍റെ വിലക്ക് നീക്കിയിരിക്കുകയാണ്. ഇതുസംബന്ധിച്ച റിപ്പോര്‍ട്ടുകളാണ് ഇപ്പോള്‍ പുറത്തുവരുന്നത്. യുഎഇയില്‍ 'സീതാ രാമ'ത്തിന് പ്രദര്‍ശനാനുമതി നിഷേധിച്ചതിനെ തുടര്‍ന്ന് സിനിമയുടെ സെന്‍സര്‍ വീണ്ടും നടത്തിയിരുന്നു. തുടര്‍ന്ന് യുഎഇയില്‍ ചിത്രം റിലീസിനൊരുങ്ങുകയാണ്. നാളെയാണ് (ഓഗസ്‌റ്റ്‌ 11നാണ്) 'സീതാ രാമം' യുഎഇയില്‍ എത്തുക.
Dulquer Salmaan Pan Indian movie: പാന്‍ ഇന്ത്യന്‍ റിലീസായെത്തിയ ചിത്രം ബിഗ്‌ ബജറ്റിലാണ് ഒരുങ്ങിയത്. സിനിമയില്‍ ലെഫ്‌റ്റനന്‍റ്‌ റാം എന്ന കഥാപാത്രത്തെയാണ് ദുല്‍ഖര്‍ സല്‍മാന്‍ അവതരിപ്പിക്കുന്നത്. പ്രധാനമായും തെലുഗുവില്‍ ഒരുങ്ങിയ ചിത്രം മലയാളം, തമിഴ്‌ എന്നീ ഭാഷകളിലും റിലീസ് ചെയ്‌തു.
ദുല്‍ഖറിന്‍റെ രണ്ടാമത്തെ തെലുഗു ചിത്രം കൂടിയാണിത്‌. കീര്‍ത്തി സുരേഷിനൊപ്പമുള്ള 'മഹാനടി' ആയിരുന്നു ദുല്‍ഖറിന്‍റെ ആദ്യ തെലുഗു ചിത്രം. 1960കളില്‍ ജമ്മു കശ്‌മീരില്‍ നടന്ന ഒരു പ്രണയ കഥയാണ് ചിത്രപശ്ചാത്തലം. 1965ലെ ഇന്‍ഡോ പാക്‌ യുദ്ധത്തിന്‍റെ പശ്ചാത്തലത്തിലാണ് 'സീതാ രാമം' കഥ പറയുന്നത്‌.
ഹനു രാഘവപ്പുടിയാണ് സംവിധാനം. മൃണാല്‍ താക്കൂര്‍ ആണ് സിനിമയില്‍ ദുല്‍ഖറിന്‍റെ നായികയായി എത്തുന്നത്‌. സീത എന്ന കഥാപാത്രമായി മൃണാലും അഫ്രീന്‍ എന്ന കഥാപാത്രമായി രഷ്‌മികയും വേഷമിട്ടു. പി.എസ്‌.വിനോദ്‌ ഛായാഗ്രഹണവും വിശാല്‍ ചന്ദ്രശേഖര്‍ സംഗീതവും നിര്‍വഹിച്ചു. വൈജയന്തി മൂവീസ്‌, സ്വപ്‌ന സിനിമാസ്‌ എന്നിവരുടെ ബാനറില്‍ അശ്വിനി ദത്ത്‌ ആണ് നിര്‍മാണം.
'മഹാനടി'ക്ക്‌ ശേഷം വൈജയന്തി ഫിലിംസും ദുല്‍ഖര്‍ സല്‍മാനും ഒന്നിച്ചെത്തിയ ചിത്രം കൂടിയാണിത്‌.
