മുംബൈ: വിവാഹം കഴിഞ്ഞ് 26 ദിവസം കഴിഞ്ഞിട്ടും ഇഷ്‌ടപ്പെടാനാകാത്ത ഭര്‍ത്താവിനെ കഴുത്ത് ഞെരിച്ച് കൊലപ്പെടുത്തിയ ഭാര്യ അറസ്റ്റില്‍. മഹാരാഷ്‌ട്രയിലെ പോളച്ചിവാടിയിലാണ് സംഭവം. നിപ്പാണി നബേക സ്വദേശിയായ പാണ്ഡുരംഗാണ് കൊല്ലപ്പെട്ടത്.
പാണ്ഡുരംഗിന്‍റെ ഭാര്യ ശീതളാണ് അറസ്റ്റിലായത്. നവംബര്‍ ഏഴിനാണ് സംഭവം. രാത്രി ഉറങ്ങാനായി ഇരുവരും കിടപ്പ് മുറിയില്‍ പോയി. തുടര്‍ന്ന് അല്‍പസമയത്തിന് ശേഷം ശീതള്‍ തിരിച്ച് വന്ന് പാണ്ഡുരംഗിന് സുഖമില്ലെന്ന് ഭര്‍തൃമാതാവ് നിലാഭായ് രാജഭൗ ചവാനോട് പറഞ്ഞു. വിവരമറിഞ്ഞ അമ്മ മുറിയിലെത്തി നോക്കിയപ്പോള്‍ പാണ്ഡുരംഗ് മരിച്ചിരുന്നു.
സംഭവത്തില്‍ ദുരൂഹത തോന്നിയ കുടുംബം ഗവരായി പൊലീസില്‍ പരാതി നല്‍കി. മരിച്ച സമയത്ത് പാണ്ഡുരംഗിന്‍റെ കഴുത്തില്‍ മുറിപ്പാടുകളുണ്ടായിരുന്നെന്നും മകന്‍ മരിച്ചതല്ലെന്നും ശീതള്‍ കൊലപ്പെടുത്തിയാണെന്നും അമ്മ നിലാഭായ് പറഞ്ഞു. ഇവര്‍ ഇരുവരും തമ്മില്‍ എപ്പോഴും വഴക്കിടാറുണ്ടെന്നും നിലാഭായ് പൊലീസിനോട് പറഞ്ഞു.
സംഭവത്തില്‍ ആറ് ദിവസത്തെ അന്വേഷണത്തിന് ശേഷം ശീതളിനെ പൊലീസ് അറസ്റ്റ് ചെയ്‌തു. ഐപിസി സെക്ഷന്‍ 302 വകുപ്പ് പ്രകാരമാണ് ശീതളിനെതിരെ പൊലീസ് കേസ് രജിസ്റ്റര്‍ ചെയ്‌തത്. കഴിഞ്ഞ ഒക്‌ടോബര്‍ 14നായിരുന്നു ഇരുവരുടെയും വിവാഹം.
