ഹൈദരാബാദ് : നമ്മുടെ വരുമാനത്തിന്‍റെ ഒരു ഭാഗം ദീര്‍ഘകാല നിക്ഷേപത്തിനായി മാറ്റിവയ്‌ക്കേണ്ടതുണ്ട്. നല്ല വണ്ണം വിലയിരുത്തലുകള്‍ നടത്തിയ ശേഷമായിരിക്കണം ഏത് സാമ്പാദ്യ പദ്ധതിയാണ് ഇതിനായി തെരഞ്ഞെടുക്കേണ്ടതെന്ന് തീരുമാനിക്കാന്‍. നമ്മള്‍ തെരഞ്ഞെടുക്കുന്ന സമ്പാദ്യ പദ്ധതി എത്രമാത്രം റിട്ടേണ്‍ തരുന്നുണ്ട്, അതിന്‍റെ കാലപരിധി, എത്രതുക അതില്‍ നിക്ഷേപിക്കണം എന്നതൊക്കെ സംബന്ധിച്ച് വ്യക്തമായ ധാരണ ഉണ്ടായിരിക്കണം.
എല്ലാ സാമ്പാദ്യ പദ്ധതികള്‍ക്കും നേട്ടങ്ങളും കോട്ടങ്ങളും ഉണ്ടായിരിക്കും. ഒരു പ്രത്യേക സമ്പാദ്യ പദ്ധതിയുടെ കോട്ടങ്ങള്‍ എന്താണെന്ന് നമ്മള്‍ അറിഞ്ഞിരിക്കണം. നമ്മുടെ നിക്ഷേപം, പ്രത്യേകിച്ച് ഓഹരി വിപണിയിലേത്, എല്ലായ്‌പ്പോഴും ലാഭം മാത്രമല്ല തരിക. ചില നഷ്‌ടങ്ങള്‍ ഉണ്ടാവാതെ ഒരു റിട്ടേണും നിങ്ങള്‍ക്ക് കൈവരിക്കാന്‍ കഴിയില്ല എന്ന തത്വം മനസിലാക്കിയിരിക്കണം.
ഓരോ സമ്പാദ്യ പദ്ധതിയുടേയും സ്വഭാവമനുസരിച്ച് വ്യത്യസ്‌തങ്ങളായ റിസ്‌ക് ഫാക്‌ടറുകള്‍ അതില്‍ അടങ്ങിയിട്ടുണ്ടാകും. ഈ പ്രശ്‌നസാധ്യതകളുടെ ആഘാതം കുറയ്‌ക്കാനായി മ്യൂച്വല്‍ ഫണ്ട് മാനേജര്‍മാര്‍ പല തന്ത്രങ്ങളും സ്വീകരിക്കാറുണ്ട്. എന്നാല്‍ സാധാരണ ഒരു നിക്ഷേപകന് ഇത് അറിഞ്ഞുകൊള്ളണമെന്നില്ല. ഒരേ സ്വഭാവമുള്ള എല്ലാ സമ്പാദ്യ പദ്ധതികള്‍ക്കും സമാന റിസ്‌ക് ഫാക്‌ടറുകളാണ് ഉണ്ടാവുക എന്നാണ് പൊതുവെയുള്ള ധാരണ. എന്നാല്‍ അങ്ങനെയല്ല.
നഷ്‌ട സാധ്യത അടിസ്ഥാനപ്പെടുത്തിയുള്ള വര്‍ഗീകരണം : വ്യത്യസ്‌തമായ സാഹചര്യത്തില്‍ ഒരേസ്വഭാവമുള്ള സമ്പാദ്യ പദ്ധതികള്‍ക്ക് നഷ്‌ടസാധ്യതകളുടെ തീവ്രത വ്യത്യസ്‌തമായിരിക്കും. മ്യൂച്വല്‍ ഫണ്ട് സ്‌കീമുകള്‍ അവയുടെ നഷ്‌ട സാധ്യതാ തോതിനെ അടിസ്ഥാനപ്പെടുത്തി വര്‍ഗീകരിച്ചിട്ടുണ്ട്. ലോ, നോര്‍മല്‍-മീഡിയം, മീഡിയം, മീഡിയം-ഹൈ, ഹൈ, വെരി ഹൈ എന്നിങ്ങനെയാണിത്.
ഇതിനെ ഫണ്ട് റിസ്‌ക് മീറ്റര്‍ എന്നാണ് വിളിക്കുക. വിപണി മൂല്യം, സ്ഥിരത, പണമാക്കി മാറ്റാനുള്ള ശേഷി എന്നിവ അടിസ്ഥാനപ്പെടുത്തിയാണ് റിസ്‌ക് മീറ്റര്‍ ആവിഷ്‌കരിക്കുന്നത്. മ്യൂച്വല്‍ ഫണ്ട് തെരഞ്ഞെടുക്കുമ്പോള്‍ ഈ റിസ്‌ക് മീറ്റര്‍ കൃത്യമായി മനസിലാക്കിയിരിക്കണം. റിസ്‌ക് എടുക്കാനുള്ള നിങ്ങളുടെ ശേഷിക്കനുസരിച്ചായിരിക്കണം നിങ്ങള്‍ ഫണ്ട് തെരഞ്ഞെടുക്കേണ്ടത്.
ഓഹരിവിപണിയിലെ ചാഞ്ചാട്ടം : ഓഹരിവിപണി ഒരേ ദിശയില്‍ സഞ്ചരിക്കില്ല എന്നുള്ള കാര്യം നമ്മള്‍ മനസിലാക്കിയിരിക്കേണ്ടതുണ്ട്. വിപണി താഴേക്ക് പോകുമ്പോള്‍ നിക്ഷേപം പിന്‍വലിക്കുകയും അത് ഉയരുമ്പോള്‍ നിക്ഷേപിക്കുകയും ചെയ്യുന്നവരാണ് ഓഹരി നിക്ഷേപകരില്‍ നല്ലൊരു ശതമാനം. ഈ രീതി ദീര്‍ഘകാല അടിസ്ഥാനത്തില്‍ നോക്കുകയാണെങ്കില്‍ ഗുണകരമല്ല. വിപണിയിലെ ചാഞ്ചാട്ടം അതിന്‍റെ സ്വാഭാവിക അവസ്‌ഥയാണെന്ന് നിക്ഷേപകര്‍ അറിഞ്ഞിരിക്കണം.
റിസ്‌കും, റിട്ടേണും അടിസ്ഥാനപ്പെടുത്തി നിക്ഷേപം വൈവിധ്യവല്‍ക്കരിച്ചിട്ടുണ്ട് എന്ന് ഉറപ്പാക്കേണ്ടതുണ്ട്. അതായത് എല്ലാ പണവും ഒരു പ്രത്യേക സാമ്പാദ്യ പദ്ധതിയില്‍ മാത്രം നിക്ഷേപിക്കരുത്. ബെഞ്ച്‌മാര്‍ക്ക് സൂചികയേക്കാള്‍ റിസ്‌കുള്ള ഒരു നിക്ഷേപ പദ്ധതിക്ക് വിപണി അസ്ഥിരമായിരിക്കുന്ന അവസ്‌ഥയില്‍ പോലും നല്ല റിട്ടേണ്‍ നല്‍കാനുള്ള ശേഷിയുണ്ടാകും.
നമ്മള്‍ പ്രതീക്ഷിക്കാത്ത നഷ്‌ടങ്ങള്‍ നിക്ഷേപങ്ങള്‍ക്ക് സംഭവിച്ചേക്കാം. ഇതിന് മുന്‍കരുതല്‍ സ്വീകരിക്കുക എന്നുള്ളതാണ് പ്രധാനം. നല്ല ആസൂത്രണവും, കാര്യങ്ങള്‍ ശരിയായി ഗ്രഹിക്കുകയും ചെയ്യുകയാണെങ്കില്‍ നിക്ഷേപങ്ങളില്‍ നല്ല ലാഭം നേടാന്‍ സാധിക്കും.
