ന്യൂഡല്‍ഹി: പെഗാസസ് ഫോൺ ചോർത്തല്‍ കേസുകൾ പരിഗണിക്കുന്നത് സുപ്രീംകോടതി ചൊവ്വാഴ്‌ചത്തേക്ക് (10.08.21) മാറ്റിവെച്ചു. ഇക്കാര്യത്തില്‍ കേന്ദ്ര സർക്കാരിന് നോട്ടീസ് അയയ്ക്കാനും വിശദീകരണം തേടാനും കോടതി തീരുമാനിച്ചു. പെഗാസസ് ഫോൺ ചോർത്തലില്‍ പ്രത്യേക അന്വേഷണം ആവശ്യപ്പെട്ടുള്ള എഡിറ്റേഴ്സ് ഗില്‍ഡ് അടക്കമുള്ളവരുടെ ഒരു കൂട്ടം ഹർജികളാണ് സുപ്രീംകോടതി ഇന്ന് പരിഗണിച്ചത്. ചീഫ് ജസ്റ്റിസ് എൻവി രമണ അധ്യക്ഷനായ ബെഞ്ചില്‍ ജസ്റ്റിസ് സൂര്യകാന്തും ഉൾപ്പെട്ടിരുന്നു.
also read: പെഗാസസ്; സുപ്രീംകോടതിയെ സമീപിച്ച് എഡിറ്റേഴ്സ് ഗിൽഡ്
പ്രതിപക്ഷ നേതാക്കൾ, മാധ്യമപ്രവർത്തകർ, നായാധിപൻമാർ, സാമൂഹിക പ്രവർത്തകർ എന്നിവരുടെ ഫോണുകൾ ചോർത്തിയെന്നാണ് ആരോപണമുണ്ടായിരുന്നത്. മുതിർന്ന മാധ്യമപ്രവർത്തകൻ എൻ റാമിന് വേണ്ടി ഹാജരായ അഭിഭാഷകൻ കപില്‍ സിബല്‍ ഗുരുതരമായ ചോദ്യങ്ങളാണ് സുപ്രീംകോടതിയില്‍ കേന്ദ്ര സർക്കാരിന് എതിരെ ഉന്നയിച്ചത്. എവിടെയാണ് പെഗാസസ് ഹാർഡ്‌വെയർ സൂക്ഷിച്ചിരിക്കുന്നത്. എന്തുകൊണ്ട് കേന്ദ്രസർക്കാർ വിഷയത്തില്‍ എഫ്‌ഐആർ രജിസ്റ്റർ ചെയ്തില്ല, തുടങ്ങിയ ചോദ്യങ്ങൾ കപില്‍ സിബല്‍ സുപ്രീം കോടതില്‍ ഉന്നയിച്ചു.
also read: പെഗാസസില്‍ എൻഡിഎയില്‍ ഭിന്നത, അന്വേഷണം വേണമെന്ന് ജെഡിയു
പെഗാസസ് ചാര സോഫ്‌റ്റ്‌വെയർ സർക്കാർ ഏജൻസികൾക്ക് മാത്രമാണ് നല്‍കുന്നതെന്നും സ്വകാര്യ ഏജൻസികൾക്ക് നല്‍കില്ലെന്നും കപില്‍ സിബല്‍ കോടതിയില്‍ വാദിച്ചു. മാധ്യമപ്രവർത്തകനായ എസ്എൻഎം അബ്‌ദിക്ക് വേണ്ടി ഹാജരായ മുതിർന്ന അഭിഭാഷകൻ രാകേഷ് ദ്വിവേദി, ഇതൊരു ക്രിമിനല്‍ കുറ്റം മാത്രമല്ലെന്നും ഭരണഘടനാപരമായ കുറ്റകൃത്യമാണെന്നും കോടതിയെ അറിയിച്ചു.
പെഗാസസ് ഫോൺചോർത്തല്‍ ലിസ്റ്റില്‍ ഉൾപ്പെട്ടവർക്ക് ആരാണ് തങ്ങളുടെ ഫോൺ ചോർത്തിയത് എന്ന് അറിയില്ലെന്നും ഇത് ഇന്ത്യൻ ഇൻഫർമേഷൻ ആക്‌ടിലെ ക്രിമിനല്‍ നടപടി പ്രകാരം സ്വകാര്യതയിലേക്കുള്ള കടന്നുകയറ്റമാണെന്നും മാധ്യമപ്രവർത്തകർക്ക് വേണ്ടി ഹാജരായ അഭിഭാഷകർ വാദിച്ചു. അതേസമയം പാർലമെന്‍റില്‍ ഇന്നും പെഗാസസ് വിഷയം വലിയ ബഹളത്തിനിടയാക്കി. ബഹളത്തെ തുടർന്ന് ബന്ധപ്പെട്ട രാജ്യസഭയും ലോക്‌സഭയും നിർത്തിവെച്ചു.
