പൂനെ : സൈനികനായ രണ്ടാനച്ഛന് പ്രായപൂർത്തിയാകാത്ത മകളെ വിവാഹം കഴിപ്പിച്ച് നൽകി അമ്മ. പൂനെയിലെ ചന്ദ്രനഗർ പൊലീസ് സ്റ്റേഷൻ പരിധിയിലാണ് നടുക്കുന്ന സംഭവം. തന്നെ നിർബന്ധിച്ച് വിവാഹം കഴിപ്പിച്ചുവെന്ന് കാട്ടി 15 വയസുകാരിയായ പെണ്‍കുട്ടി നൽകിയ പരാതിയുടെ അടിസ്ഥാനത്തിൽ സൈനികനായ സാഗർ ജയറാം ദത്ഖിലെയും (28) പെണ്‍കുട്ടിയുടെ അമ്മയേയും പൊലീസ് അറസ്റ്റ് ചെയ്‌തു.
ആദ്യ വിവാഹ ബന്ധം ഉപേക്ഷിച്ചതിന് ശേഷമാണ് പെണ്‍കുട്ടിയുടെ അമ്മ സാഗറുമായി അടുപ്പത്തിലാകുന്നത്. ബർഷിയിലെ ഒരു വിവാഹച്ചടങ്ങിൽ വച്ച് കണ്ടുമുട്ടിയ ഇവർ പ്രണയത്തിലാവുകയായിരുന്നു. നിയമപരമായി വിവാഹം കഴിച്ചിട്ടില്ലെങ്കിലും ഇവരുടെ വീട്ടിലാണ് സാഗർ താമസിച്ചിരുന്നത്.
ഇതിനിടെയാണ് പെണ്‍കുട്ടിയോട് സാഗറിനെ വിവാഹം കഴിക്കണമെന്ന് അമ്മ ആവശ്യപ്പെട്ടത്. വിവാഹത്തെ പെണ്‍കുട്ടി എതിർത്തെങ്കിലും ആത്മഹത്യാഭീഷണി മുഴക്കിയതിനെ തുടർന്ന് നവംബർ 6ന് അഹമ്മദ് നഗറിലെ ഒരു ക്ഷേത്രത്തിൽ വച്ച് ഇരുവരുടേയും വിവാഹം നടത്തി. ഇതിന് പിന്നാലെ സാഗറുമായി ശാരീരിക ബന്ധത്തിലേർപ്പെടാനും പെണ്‍കുട്ടിയെ അമ്മ നിർബന്ധിച്ചു.
ഈ വിവരം പെണ്‍കുട്ടി സ്‌കൂളിലെ തന്‍റെ സുഹൃത്തിനെ അറിയിച്ചതോടെയാണ് സംഭവം പുറംലോകമറിഞ്ഞത്. പൂനെയിലെ ഒരു സാമൂഹിക പ്രവർത്തകയുടെ സഹായത്തോടെ പെണ്‍കുട്ടി പൊലീസിൽ പരാതി നൽകി. തുടർന്ന് കേസ് രജിസ്റ്റർ ചെയ്‌ത പൊലീസ് ഇരുവരെയും അറസ്റ്റ് ചെയ്യുകയായിരുന്നു. കേസിൽ അന്വേഷണം പുരോഗമിക്കുകയാണ്.
