ന്യൂഡൽഹി : 2024ലെ ലോക്‌സഭ തെരഞ്ഞെടുപ്പ് ഒരുക്കങ്ങളുടെ ഭാഗമായി ഉത്തർപ്രദേശിലും ബിഹാറിലും പാർട്ടി പുനഃസംഘടിപ്പിക്കാനൊരുങ്ങി കോൺഗ്രസ്. അടുത്തിടെ നടന്ന യു.പി നിയമസഭ തെരഞ്ഞെടുപ്പിൽ ആകെയുള്ള 403 സീറ്റുകളിൽ 2 എണ്ണം മാത്രമാണ് കോൺഗ്രസിന് നേടാനായത്. 2019ലെ ലോക്‌സഭ തെരഞ്ഞെടുപ്പിൽ പ്രിയങ്ക ഗാന്ധി യുപിയുടെ ചുമതലയേൽക്കുമ്പോൾ പാർട്ടിക്ക് സംസ്ഥാനത്ത് 80ൽ ഒരു സീറ്റ് മാത്രമാണുണ്ടായിരുന്നത്.
യുപി കോൺഗ്രസ് പുനഃസംഘടന : 2017ൽ പാർട്ടിക്ക് ഉണ്ടായിരുന്ന 7 എംഎൽഎമാരിൽ അജയ് കുമാർ ലല്ലുവിനെ സംസ്ഥാന അധ്യക്ഷനായും ആരാധന മിശ്രയെ നിയമസഭ കക്ഷി നേതാവായും പ്രിയങ്ക തെരഞ്ഞെടുത്തിരുന്നു. ഏറ്റവും ഒടുവിലായി നേരിട്ട തെരഞ്ഞെടുപ്പ് പരാജയത്തെ തുടർന്ന് അജയ് കുമാർ ലല്ലുവിനോട് രാജിവയ്ക്കാൻ ആവശ്യപ്പെട്ട കോൺഗ്രസ് അധ്യക്ഷ സോണിയ ഗാന്ധി, ബ്രാഹ്മണ വിഭാഗത്തിൽപ്പെട്ട ആരാധന മിശ്രയെ സിഎൽപി നേതാവായി നിലനിർത്തി.
നിലവിൽ സംസ്ഥാന അധ്യക്ഷ സ്ഥാനത്തേക്ക് ഒബിസി വിഭാഗത്തിൽപ്പെട്ട നിയമസഭാംഗമായ വീരേന്ദ്ര ചൗധരിയെ നിയമിക്കണോ, അതോ മറ്റാർക്കെങ്കിലും സംസ്ഥാനത്തെ പാർട്ടി ചുമതല നൽകണോ എന്ന ചർച്ചയിലാണ് കോൺഗ്രസ്. സംസ്ഥാനത്ത് ബിജെപിക്കും എസ്‌പിക്കും എതിരായ മികച്ച പ്രതിയോഗിയായി ചൗധരി മാറുമെന്നാണ് പാർട്ടിയുടെ കണക്കുകൂട്ടൽ.
അതേസമയം ബ്രാഹ്മണ വിഭാഗത്തിൽപ്പെട്ട രാജേഷ് മിശ്ര, ആചാര്യ പ്രമോദ് കൃഷ്‌ണൻ തുടങ്ങിയവരുടെ പേരും സുപ്രധാന സ്ഥാനത്തേക്ക് പരിഗണിക്കുന്നുണ്ട്. ബിഎസ്‌പി അനുയായികളെ ആകർഷിക്കാനായി, ഒരു ദലിത് നേതാവിനെ സംസ്ഥാന ഘടകം മേധാവിയായി തെരഞ്ഞെടുക്കണമെന്നാണ് മറ്റൊരു വിഭാഗം നേതാക്കളുടെ നിർദേശം.
കോൺഗ്രസുമായുള്ള സഖ്യം നിരസിച്ച് സംസ്ഥാനത്ത് ബിജെപിയുടെ വിജയത്തിന് വഴിതെളിച്ചതായി അടുത്തിടെ രാഹുൽ ഗാന്ധി മായാവതിയെ കുറ്റപ്പെടുത്തിയിരുന്നു. അതോടൊപ്പം തന്നെ ബിഎസ്‌പി സ്ഥാപകൻ കാൻഷി റാമിനെ അദ്ദേഹം പ്രശംസിക്കുകയും ചെയ്‌തു.
പുനഃസംഘടന സംബന്ധിച്ച് പാർട്ടിക്കുള്ളിൽ ചർച്ചകൾ പുരോഗമിക്കുന്നുവെന്നും ഉടൻ തന്നെ പുതിയ സംസ്ഥാന നേതൃത്വം നിലവിൽ വരുമെന്നും യുപിയുടെ ചുമതലയുള്ള എഐസിസി സെക്രട്ടറി തൗക്കിർ ആലം ഇടിവി ഭാരതിനോട് പറഞ്ഞു. 2024ലെ തെരഞ്ഞെടുപ്പിന് തങ്ങൾ മികച്ച തയാറെടുപ്പുകളാണ് നടത്തുന്നതെന്നും അദ്ദേഹം കൂട്ടിച്ചേർത്തു.
ബിഹാറിലും അഴിച്ചുപണി : സംസ്ഥാന ഘടകം മേധാവിയായിരുന്ന മദൻ മോഹൻ ഝാ രാജിവച്ച ബിഹാർ കോൺഗ്രസിലും സമാനമായ മാറ്റങ്ങളാണ് ആസൂത്രണം ചെയ്യുന്നത്. ഇവിടെയും ജാതി സമവാക്യങ്ങൾ സന്തുലിതമാക്കി സംഘടനയെ മുന്നോട്ട് കൊണ്ടുപോകാൻ കഴിവുള്ള യുവ നേതാക്കളെ കൊണ്ടുവരാനാണ് കോൺഗ്രസ് ശ്രമിക്കുന്നത്. മദൻ മോഹന് പകരമായി മീര കുമാർ, രഞ്ജീത് രഞ്ജൻ, ചന്ദൻ യാദവ്, മുഹമ്മദ് ജാവേദ്, കനയ്യ കുമാർ എന്നിവരുടെ പേരുകളാണ് പരിഗണനയിൽ.
സംസ്ഥാനത്ത് പുതിയ നേതൃത്വം ഉടൻ നിലവിൽ വരുമെന്ന് ബിഹാറിന്‍റെ ചുമതലയുള്ള എഐസിസി സെക്രട്ടറി ഭക്ത ചരൺ ദാസ് ഇടിവി ഭാരതിനോട് പറഞ്ഞു. ഏപ്രിൽ 17ന് ചമ്പാരനിൽ നിന്ന് സംസ്ഥാനത്തുടനീളം യൂത്ത് കോൺഗ്രസ് നടത്താനിരുന്ന ഗാന്ധി സന്ദേശ് യാത്ര പാർട്ടി മാറ്റിവച്ചു. പുതിയ നേതൃത്വം നിലവിൽ വരുന്നതോടെ കൂടുതൽ വിപുലമായ രീതിയിൽ ഗാന്ധി സന്ദേശ് യാത്ര ആസൂത്രണം ചെയ്യാനാണ് തീരുമാനം.
