ജയ്ഷെ മുഹമ്മദ് ഭീകരൻ മസൂദ് അസ്ഹറിനെ ജയിൽ മോചിതനാക്കിയത് ബിജെപിയാണെന്ന സത്യം നരേന്ദ്രമോദി രാജ്യത്തോട് പറയണമെന്ന് കോണ്‍ഗ്രസ് അധ്യക്ഷൻ രാഹുൽ ഗാന്ധി. കർണാടകയിൽ നടന്ന റാലിയിൽ സംസാരിക്കുന്നതിനിടെയായിരുന്നു രാഹുൽ ഗാന്ധിയുടെ വിമർശനം.
പുൽവാമയിൽ 44 സിആർപിഎഫ് ജവാൻമാർകൊല്ലപ്പെട്ട ഭീകരാക്രമണത്തിന്‍റെ സൂത്രധാരനാണ് മസൂദ് അസ്ഹർ. 1999 ലെ ബിജെപി സർക്കാരാണ് ഇന്ത്യൻ ജയിലിലായിരുന്ന ഇയാളെ അഫ്ഗാനിസ്ഥാനിലെ കാണ്ഡഹാർ വഴി പാകിസ്ഥാനിൽ വിട്ടത്. എന്തുകൊണ്ട് പ്രധാനമന്ത്രി ഇതിനെക്കുറിച്ച് മിണ്ടുന്നില്ലെന്നുംരാഹുൽ ചോദിച്ചു. ബിജെപിയെ പോലെ ഭീകരർക്ക് മുന്നിൽ തല കുനിക്കുന്നവരല്ല തങ്ങളെന്നും രാഹുൽ കൂട്ടിച്ചേർത്തു.
1999 ൽ വാജ്പെയ് സർക്കാരാണ് ഭീകരർ റാഞ്ചിയ ഇന്ത്യൻ എയർലൈൻ വിമാനത്തിലെ യാത്രക്കാരെ വിട്ടുകിട്ടാൻ ജയിലിലായിരുന്നമസൂദ് അസ്ഹറിനെ വിട്ടുകൊടുത്തത്. പാകിസ്ഥാനിൽ കഴിയുന്ന ഇയാളെ പിന്നീട് ഇന്ത്യക്ക് ലഭിച്ചിട്ടില്ല. മസൂദിനെ ആഗോള ഭീകരനായി പ്രഖ്യാപിക്കണമെന്ന ആവശ്യവും ചൈനയുടെ എതിർപ്പിനെത്തുടന്ന് നടന്നിട്ടില്ല.
റാലിയിൽ മോദിക്കെതിരെ രൂക്ഷ വിമർശമാണ് രാഹുൽ ഉയർത്തിയത്. അഴിമതിക്കെതിരെ സംസാരിക്കുന്ന മോദി അഴിമതിക്കാരനാണെന്ന കാര്യം രാജ്യത്തിനറിയാമെന്ന് രാഹുൽ ഗാന്ധി പറഞ്ഞു. മെയ്ക്ക് ഇൻഇന്ത്യ, സ്റ്റാന്‍റ് അപ്പ് ഇന്ത്യ, സിറ്റ് ഡൗണ്‍ ഇന്ത്യ തുടങ്ങിയ പദ്ധതികളിലൂടെ മോദി രാജ്യത്തെ ജനങ്ങളെ വിഢികളാക്കുകയാണെന്നും രാഹുൽ പരിഹസിച്ചു.
