ഗാന്ധിനഗര്‍: രണ്ട് ദിവസത്തെ ഗുജറാത്ത് സന്ദര്‍ശനത്തിനെത്തിയ പ്രധാനമന്ത്രി നരേന്ദ്ര മോദി നര്‍മദയിലെ കെവാഡിയില്‍ ജംഗിള്‍ സഫാരി എന്നറിയപ്പെടുന്ന സര്‍ദാര്‍ പട്ടേല്‍ സുവോളജിക്കല്‍ പാര്‍ക്ക് ഉദ്‌ഘാടനം ചെയ്‌തു. സര്‍ദാര്‍ പട്ടേലിന്‍റെ 145-ാം ജന്മവാര്‍ഷികത്തോടനുബന്ധിച്ചാണ് ചടങ്ങ്‌ സംഘടിപ്പിച്ചത്. സ്റ്റാച്യു ഓഫ്‌ യൂണിറ്റിക്ക് സമീപമാണ് സര്‍ദാര്‍ പട്ടേല്‍ സുവോളജിക്കല്‍ പാര്‍ക്ക് നിര്‍മിച്ചിരിക്കുന്നത്. ചടങ്ങില്‍ ഗുജറാത്ത് മുഖ്യമന്ത്രി വിജയ്‌ രൂപാനിയും ഗവര്‍ണര്‍ ആചാര്യ ദേവ്രതും പങ്കെടുത്തു.
കൂടാതെ കെവാഡിയില്‍ പുതിയതായി നിര്‍മിച്ച ഏക്‌താ മാളും കുട്ടികളുടെ ന്യുട്രീഷന്‍ പാര്‍ക്കും ആരോഗ്യ വന്‍ എന്നിവയുടെ ഉദ്ഘാടനവും പ്രധാനമന്ത്രി നിര്‍വഹിച്ചു. പാര്‍ക്കില്‍ നൂറുകണക്കിന് ഔഷധ ചെടികളും അത് സംബന്ധിക്കുന്ന വിവരങ്ങളും പ്രദര്‍ശിപ്പിച്ചിട്ടുണ്ട്. ലോക്ക്‌ഡൗണ്‍ പ്രഖ്യാപിച്ചതിന് ശേഷം ആദ്യമായാണ് പ്രധാനമന്ത്രി ഗുജറാത്ത് സന്ദര്‍ശിക്കുന്നത്.
