ಮದುವೆ ಮೆರವಣಿಗೆಗೆ ತೆರಳುತ್ತಿದ್ದ ವೇಳೆ ಕಾಲುವೆಗೆ ಬಿದ್ದ ಕಾರು; ಮೂವರು ಸಾವು

ಬುಲಂದ್​ಶಹರ್(ಉತ್ತರ ಪ್ರದೇಶ)​​: ರಾಜ್ಯದ ಬುಲಂದ್​​​ಶಹರ್​ನಲ್ಲಿ ಭೀಕರ ಅಪಘಾತ ನಡೆದು 3 ಜನ ಸಾವನ್ನಪ್ಪಿದ್ದಾರೆ. ಕಾರಿನಲ್ಲಿ 8 ಜನರು ಮದುವೆ ಮೆರವಣಿಗೆಗೆ ತೆರಳುತ್ತಿದ್ದ ವೇಳೆ ನಿಯಂತ್ರಣ ತಪ್ಪಿ ಕಾರು ಕಾಲುವೆಗೆ ಬಿದ್ದಿದೆ. 8 ಜನರು ಕಾಲುವೆಗೆ ಬಿದ್ದಿದ್ದು ಐವರನ್ನು ರಕ್ಷಿಸಲಾಗಿತ್ತು. ಅದರಲ್ಲಿ ಮೂವರು ಸಾವನ್ನಪ್ಪಿದರೆ, ಇನ್ನಿಬ್ಬರ ಸ್ಥಿತಿ ಚಿಂತಾಜನಕವಾಗಿದೆ. ಉಳಿದ ಮೂವರು ಕಾಲುವೆಯ ನೀರಿನಲ್ಲಿ ನಾಪತ್ತೆಯಾಗಿದ್ದು ಮೃತದೇಹಕ್ಕಾಗಿ ಕಾರ್ಯಾಚರಣೆ ನಡೆಯುತ್ತಿದೆ. 

ಅಲಿಘರ್​ನಲ್ಲಿ ನಡೆಯುತ್ತಿದ್ದ ಮದುವೆ​ ಮೆರವಣಿಗೆ ಕಾರ್ಯಕ್ರಮಕ್ಕೆ ಕಾಕೋಡ್‌ನ ಶೇರ್‌ಪುರ ಗ್ರಾಮದಿಂದ ಕಾರಿನಲ್ಲಿ ತೆರಳುತ್ತಿದ್ದ ಇವರೆಲ್ಲರೂ ಸಹೋದರ ಸಹೋದರಿಯರಾಗಿದ್ದಾರೆ ಎಂದು ತಿಳಿದು ಬಂದಿದೆ. ಈ ವೇಳೆ ಭಾನುವಾರ ರಾತ್ರಿ ಕಾರು ಜಹಾಂಗೀರ್‌ಪುರದ ಕಪನಾ ಗ್ರಾಮದ ಕಾಲುವೆ ಸೇತುವೆ ಬಳಿಗೆ ಬಂದ ತಕ್ಷಣ ನಿಯಂತ್ರಣ ತಪ್ಪಿದೆ. ಬಳಿಕ ಶಿಥಿಲಗೊಂಡಿದ್ದ ಸೇತುವೆಯಿಂದ ಕಾಲುವೆಗೆ ಬಿದ್ದಿದೆ. ಅಪಘಾತದಲ್ಲಿ ಕಾರಿನಲ್ಲಿದ್ದ 8 ಮಂದಿ ನೀರಿನಲ್ಲಿ ಮುಳುಗಿದ್ದಾರೆ.

ಈ ಘಟನೆಯನ್ನು ಅದೇ ಮಾರ್ಗದಲ್ಲಿದ್ದ ಪಾದಚಾರಿಗಳು ಗಮನಿಸಿ ಮಾಹಿತಿ ತಿಳಿಸಿ ತಾವೇ ರಕ್ಷಣೆಗೆ ಮುಂದಾದಾಗ ಸಾಧ್ಯವಾಗದೇ ಪೊಲೀಸರಿಗೆ ತಿಳಿಸಿದ್ದಾರೆ. ಬಳಿಕ ಸ್ಥಳೀಯ ಈಜುಗಾರರ ಸಹಾಯದಿಂದ ಐವರನ್ನು ಹೊರತೆಗೆಯಲಾಯಿತು. ಇದಲ್ಲದೆ ಇನ್ನೂ ಮೂವರಿಗಾಗಿ ಶೋಧ ನಡೆಸಲಾಗುತ್ತಿದೆ. ಈ ಘಟನೆಯಿಂದ ಮದುವೆ ಸಂಭ್ರಮದಲ್ಲಿ ಇರಬೇಕಿದ್ದ ಕುಟುಂಬದಲ್ಲಿ ಸೂತಕದ ಛಾಯೆ ಆವರಿಸಿದೆ. ಕುಟುಂಬಸ್ಥರ ಆಕ್ರಂದನ ಮುಗಿಲು ಮುಟ್ಟಿದೆ.

ಸದ್ಯ ಸಿಕ್ಕಿರುವ ಮಾಹಿತಿ ಪ್ರಕಾರ, ಕಾಕೋಡ್ ಪ್ರದೇಶದ ಶೇರ್ಪುರ್ ಗ್ರಾಮದ ನಿವಾಸಿ ರಾಬಿನ್​ ಅವರ ವಿವಾಹ ಕಾರ್ಯಕ್ರಮವಾಗಿತ್ತು. ಈ ಸಮಾರಂಭಕ್ಕೆ ಒಂದೇ ಕಾರಿನಲ್ಲಿ ರಾಬಿನ್​ ಅವರ ಸೋದರಳಿಯ ದೇವಿರಾಮ್ ಅವರ ಪುತ್ರ ಮನೀಶ್ (22), ಸಹೋದರಿ ಕಾಂತ (24), ಅಂಜಲಿ (20), ಚಿಕ್ಕಮ್ಮನ ಮಗ ಪ್ರಶಾಂತ್ (18), ಸೊಸೆ ಮತ್ತು ಕೈಲಾಶ್ (42) ಮತ್ತಿಬ್ಬರು ತೆರಳುತ್ತಿದ್ದರು.

ಇದನ್ನೂ ಓದಿ: ತೆಲಂಗಾಣ: ಮರಕ್ಕೆ ಡಿಕ್ಕಿ ಹೊಡೆದ ಕಾರು, ಬಳ್ಳಾರಿಯ 5 ಮಂದಿ ಸಾವು