Ingenuity Mars Helicopter: ಈ ವರ್ಷದ ಜನವರಿಯಲ್ಲಿ ತನ್ನ ಕೊನೆಯ ಹಾರಾಟದ ನಂತರ ಕೆಂಪು ಗ್ರಹದಲ್ಲಿ ಶಾಶ್ವತವಾಗಿ ನೆಲೆಗೊಂಡ ಏಜೆನ್ಸಿಯ ಇಂಜೆನ್ಯೂಟಿ ಮಾರ್ಸ್ ಹೆಲಿಕಾಪ್ಟರ್ ಕುರಿತು ತನಿಖೆ ಪೂರ್ಣಗೊಳಿಸಿರುವ ನಾಸಾ ಎಂಜಿನಿಯರ್‌ಗಳು ಮಹತ್ವದ ಮಾಹಿತಿಗಳನ್ನು ಹಂಚಿಕೊಂಡಿದ್ದಾರೆ.
ಇಂಜೆನ್ಯೂಟಿ ಮಾರ್ಸ್ ಹೆಲಿಕಾಪ್ಟರ್ ಮತ್ತೊಂದು ಗ್ರಹದ ಮೇಲೆ ಹಾರುವ ಮೊದಲ ಹೆಲಿಕಾಪ್ಟರ್ ಎಂಬುದು ವಿಶೇಷ. 30 ದಿನಗಳಲ್ಲಿ ಐದು ಪ್ರಾಯೋಗಿಕ ಪರೀಕ್ಷಾ ಹಾರಾಟಗಳನ್ನು ನಿರ್ವಹಿಸಲು ಇದನ್ನು ವಿನ್ಯಾಸಗೊಳಿಸಲಾಗಿತ್ತು. ಇದು ಸುಮಾರು ಮೂರು ವರ್ಷಗಳ ಕಾಲ ಕಾರ್ಯನಿರ್ವಹಿಸಿದೆ. 72 ಹಾರಾಟಗಳನ್ನು ನಿರ್ವಹಿಸಿದೆ ಮತ್ತು ಎರಡು ಗಂಟೆಗಳ ಹಾರಾಟದ ಸಮಯವನ್ನು ಸಂಗ್ರಹಿಸುವಾಗ ಯೋಜಿಸಿದ್ದಕ್ಕಿಂತ 30 ಪಟ್ಟು ಹೆಚ್ಚು ದೂರ ಹಾರಿದೆ ಎಂದು ನಾಸಾ ಬುಧವಾರ ತಿಳಿಸಿದೆ.
12 ಮೀಟರ್ ಎತ್ತರಕ್ಕೆ ಹಾರಾಟ ನಡೆಸಿದ ಇಂಜೆನ್ಯೂಟಿ: ಜನವರಿ 18, 2024 ರಂದು ಅದರ ಅಂತಿಮ ಹಾರಾಟದ ಸಮಯದಲ್ಲಿ ಇಂಜೆನ್ಯೂಟಿ 12 ಮೀಟರ್ ಎತ್ತರಕ್ಕೆ ಹಾರಿತ್ತು. ಬಳಿಕ ಅದು ತೂಗಾಡುತ್ತಲೇ ಚಿತ್ರಗಳನ್ನು ಸೆರೆಹಿಡಿಯಿತು. ಬಳಿಕ ಅದು ಕೆಳಗಿಳಿಯಲು ಪ್ರಾರಂಭಿಸಿತು ಆಗ ಸಂವಹನವನ್ನು ಸ್ಥಗಿತಗೊಂಡಿತು. ಮರುದಿನ ಆ ಮಿಷನ್ ಸಂವಹನಗಳನ್ನು ಮರು ಸ್ಥಾಪಿಸಿತು. ಆದರೆ, NASA ಪ್ರಕಾರ, ಅದು ನೆಲೆಗೊಂಡು ಆರು ದಿನಗಳ ನಂತರ ಬಂದ ಚಿತ್ರಗಳ ಮೂಲಕ ಕೆಲವೊಂದು ದೋಷಗಳು ಸಂಭವಿಸಿರುವುದು ತಿಳಿಯಿತು. ಅಂದ್ರೆ ರೋಟರ್ ಬ್ಲೇಡ್‌ಗಳು ಹಾನಿಗೊಳಗಾಗಿರುವುದನ್ನು ನಾಸಾ ಕಂಡುಕೊಂಡಿದೆ.
ಹಾರಾಟದ ಸಮಯದಲ್ಲಿ ನಿಖರವಾದ ಡೇಟಾ ಒದಗಿಸಲು ಇಂಜೆನ್ಯೂಟಿ ನ್ಯಾವಿಗೇಷನ್ ಸಿಸ್ಟಮ್ನ ಅಸಮರ್ಥತೆಯು ಮಿಷನ್ ಅನ್ನು ಕೊನೆಗೊಳಿಸಿದ ಘಟನೆಗಳ ಸರಣಿಯನ್ನು ಉಂಟುಮಾಡಬಹುದು ಎಂದು ತನಿಖೆಯು ತೀರ್ಮಾನಿಸಿದೆ. ಈ ಹೆಲಿಕಾಪ್ಟರ್ ಫೆಬ್ರವರಿ 18, 2021 ರಂದು NASA ದ ಪರ್ಸೆವೆರೆನ್ಸ್ ರೋವರ್‌ಗೆ ಜೋಡಿಸಲಾಗಿತ್ತು. ಅದು ಮಂಗಳನ ಜೆಜೆರೊ ಕ್ರೇಟರ್‌ಗೆ ತೆರಳಿತು.
ಫ್ಲೈಟ್ 72 ಇಂಜೆನ್ಯೂಟಿ ಅನ್ನು ಶಾಶ್ವತವಾಗಿ ನೆಲಸಿದ್ದರೂ, ಹೆಲಿಕಾಪ್ಟರ್ ಇನ್ನೂ ವಾರಕ್ಕೊಮ್ಮೆ ಪರ್ಸೆವೆರೆನ್ಸ್ ರೋವರ್‌ಗೆ ಹವಾಮಾನ ಮತ್ತು ಏವಿಯಾನಿಕ್ಸ್ ಪರೀಕ್ಷಾ ಡೇಟಾವನ್ನು ಅಪ್ಡೇಟ್ ಮಾಡುತ್ತಲೇ ಇರುತ್ತದೆ. ಹವಾಮಾನ ಮಾಹಿತಿಯು ಕೆಂಪು ಗ್ರಹದ ಭವಿಷ್ಯದ ಪರಿಶೋಧಕರಿಗೆ ಪ್ರಯೋಜನವನ್ನು ನೀಡುತ್ತದೆ ಎಂದು ನಾಸಾ ಹೇಳಿದೆ.
ಸಂಶೋಧನೆಗಳು ಭವಿಷ್ಯದ ಮಂಗಳ ಹೆಲಿಕಾಪ್ಟರ್‌ಗಳಿಗೆ ಮತ್ತು ಇತರ ಪ್ರಪಂಚಗಳಲ್ಲಿ ಕಾರ್ಯನಿರ್ವಹಿಸಲು ಉದ್ದೇಶಿಸಿರುವ ಇತರ ವಿಮಾನಗಳಿಗೆ ಪ್ರಯೋಜನವನ್ನು ನೀಡುತ್ತದೆ ಎಂದು ನಾಸಾ ಹೇಳಿದೆ. 1.8 ಕಿಲೋಗ್ರಾಂ ತೂಕದ ಹೆಲಿಕಾಪ್ಟರ್ ಗ್ರಹದ ತೆಳ್ಳಗಿನ ವಾತಾವರಣದ ಹೊರತಾಗಿಯೂ ಮಂಗಳ ಗ್ರಹದಲ್ಲಿ ಚಾಲಿತ ಹಾರಾಟವು ನಿಜವಾಗಿಯೂ ಸಾಧ್ಯ ಎಂಬುದನ್ನು ಪ್ರದರ್ಶಿಸುವ ಕಾರ್ಯವನ್ನು ನಿರ್ವಹಿಸಿದೆ.
