ವಿಶ್ವ ಕ್ರಿಕೆಟ್​ಗೆ ಭಾರತವೇ ನಂಬರ್​ 1; ಮೂರೂ ಮಾದರಿಗಳಲ್ಲಿ ಟೀಂ ಇಂಡಿಯಾ ಅಗ್ರಜ

ಐಸಿಸಿ ಇಂದು (ಭಾನುವಾರ) ಬಿಡುಗಡೆ ಮಾಡಿದ ಶ್ರೇಯಾಂಕ ಪಟ್ಟಿಯಲ್ಲಿ ಭಾರತ ಕ್ರಿಕೆಟ್​ ತಂಡ ಮೂರೂ ಮಾದರಿಯಲ್ಲಿ ಮೊದಲ ಸ್ಥಾನ ಪಡೆದಿದೆ.

ದುಬೈ: ಸೋಲರಿಯದ ಸರದಾನಂತೆ ಮುನ್ನುಗ್ಗುತ್ತಿರುವ ಭಾರತ ಕ್ರಿಕೆಟ್​ ತಂಡ ಮೂರು ಮಾದರಿಯಲ್ಲಿ ಅಗ್ರಸ್ಥಾನ ಪಡೆದು, ವಿಶ್ವ ಕ್ರಿಕೆಟ್​ನ ಬಾಸ್​ ಆಗಿದೆ. ಇಂಗ್ಲೆಂಡ್​ ವಿರುದ್ಧದ ಐದು ಪಂದ್ಯಗಳಲ್ಲಿ ಸರಣಿಯಲ್ಲಿ 4-1 ರಲ್ಲಿ ಗೆಲುವು ಸಾಧಿಸುವ ಮೂಲಕ ಟೆಸ್ಟ್​ ಚಾಂಪಿಯನ್​ಶಿಪ್​ನಲ್ಲೂ ನಂಬರ್​ 1 ಸ್ಥಾನದಲ್ಲಿದೆ.

ಅಂತಾರಾಷ್ಟ್ರೀಯ ಕ್ರಿಕೆಟ್ ಮಂಡಳಿ (ಐಸಿಸಿ) ಭಾನುವಾರ ಬಿಡುಗಡೆ ಮಾಡಿರುವ ಶ್ರೇಯಾಂಕ ಪಟ್ಟಿಯಲ್ಲಿ ಭಾರತ ಏಕದಿನ, ಟೆಸ್ಟ್​ ಮತ್ತು ಟಿ20 ಯಲ್ಲಿ ಮೊದಲ ಸ್ಥಾನ ಪಡೆದುಕೊಂಡಿದೆ. ಇಂಗ್ಲೆಂಡ್​ ವಿರುದ್ಧದ ಟೆಸ್ಟ್​ ಸರಣಿಯನ್ನು ಗೆದ್ದುಕೊಳ್ಳುವ ಮೂಲಕ ಆಸ್ಟ್ರೇಲಿಯಾ ತಂಡವನ್ನು ಹಿಂದಿಕ್ಕಿದೆ. 122 ರೇಟಿಂಗ್​ ಹೊಂದಿರುವ ಭಾರತ ಟಾಪ್​ 10 ಪಟ್ಟಿಯಲ್ಲಿ ಮೊದಲಿದ್ದರೆ, ಆಸ್ಟ್ರೇಲಿಯಾ 117 ರೇಟಿಂಗ್​ನೊಂದಿಗೆ 2ನೇ ಸ್ಥಾನದಲ್ಲಿದೆ. 111, 101, 99 ರೇಟಿಂಗ್​ ಪಡೆದು ಕ್ರಮವಾಗಿ ಇಂಗ್ಲೆಂಡ್​, ನ್ಯೂಜಿಲ್ಯಾಂಡ್​, ದಕ್ಷಿಣ ಆಫ್ರಿಕಾ ನಂತರದ ಸ್ಥಾನದಲ್ಲಿವೆ.

ನ್ಯೂಜಿಲೆಂಡ್ ಮತ್ತು ಆಸ್ಟ್ರೇಲಿಯಾ ನಡುವೆ ಕ್ರೈಸ್ಟ್‌ಚರ್ಚ್‌ನಲ್ಲಿ ನಡೆಯುತ್ತಿರುವ ಎರಡನೇ ಟೆಸ್ಟ್‌ನ ಫಲಿತಾಂಶ ಏನೇ ಬಂದರೂ, ಟೀಂ ಇಂಡಿಯಾದ ಸ್ಥಾನದಲ್ಲಿ ಯಾವುದೇ ಏರಿಳಿತ ಉಂಟಾಗದು. ಹಾಲಿ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್ ಆಸ್ಟ್ರೇಲಿಯಾ ಮೊದಲ ಟೆಸ್ಟ್​ನ ಅನ್ನು 172 ರನ್‌ಗಳಿಂದ ಜಯಿಸಿ ಸರಣಿಯಲ್ಲಿ 1-0 ಮುನ್ನಡೆ ಸಾಧಿಸಿದೆ.

ಏಕದಿನದ ಸುಲ್ತಾನ್​: ಇನ್ನೂ, ಏಕದಿನ ಶ್ರೇಯಾಂಕದಲ್ಲೂ ಅಗ್ರಜನಾಗಿರುವ ಭಾರತ ತಂಡ 121 ರೇಟಿಂಗ್ ಅಂಕಗಳನ್ನು ಹೊಂದಿದೆ. ಆಸ್ಟ್ರೇಲಿಯಾ 118 ಪಾಯಿಂಟ್​ನೊಂದಿಗೆ ಎರಡನೇ ಸ್ಥಾನದಲ್ಲಿದೆ. ದಕ್ಷಿಣ ಆಫ್ರಿಕಾ (110), ಪಾಕಿಸ್ತಾನ (109), ನ್ಯೂಜಿಲ್ಯಾಂಡ್ (102) ನಂತರದ ಸ್ಥಾನದಲ್ಲಿವೆ.

ಟಿ20ಯಲ್ಲಿ ಟೀಂ ಇಂಡಿಯಾ 266 ರೇಟಿಂಗ್ ಪಾಯಿಂಟ್‌ಗಳೊಂದಿಗೆ ಅಗ್ರಸ್ಥಾನದಲ್ಲೇ ಮುಂದುವರಿದಿದೆ. ಇಂಗ್ಲೆಂಡ್ (256) ಎರಡನೇ ಸ್ಥಾನದಲ್ಲಿದೆ. ಇತ್ತಂಡಗಳ ನಡುವೆ 10 ಪಾಯಿಂಟ್ಸ್​ ಅಂತರವಿದೆ. ಆಸ್ಟ್ರೇಲಿಯಾ (255), ನ್ಯೂಜಿಲ್ಯಾಂಡ್​ (254), ಪಾಕಿಸ್ತಾನ (249) ಉಳಿದ ಸ್ಥಾನಗಳಲ್ಲಿವೆ.

ಭಾರತವು ಸೆಪ್ಟೆಂಬರ್ 2023 ರಿಂದ ಜನವರಿ 2024 ರವರೆಗೆ ವಿಶ್ವದ ನಂ.1 ಟೆಸ್ಟ್ ತಂಡವಾಗಿತ್ತು. ದಕ್ಷಿಣ ಆಫ್ರಿಕಾ ವಿರುದ್ಧದ ಸರಣಿ ಡ್ರಾ ನಂತರ ಎರಡನೇ ಸ್ಥಾನಕ್ಕೆ ಕುಸಿದಿತ್ತು. ಪಾಕಿಸ್ತಾನ ವಿರುದ್ಧ ತವರಿನಲ್ಲಿ ನಡೆದ ಮೂರು ಪಂದ್ಯಗಳ ಟೆಸ್ಟ್‌ ಸರಣಿಯನ್ನು ಕ್ಲೀನ್ ಸ್ವೀಪ್ ಮಾಡಿದ ನಂತರ ಆಸ್ಟ್ರೇಲಿಯಾ ಟೆಸ್ಟ್ ಶ್ರೇಯಾಂಕದಲ್ಲಿ ಭಾರತವನ್ನು ಹಿಂದಿಕ್ಕಿ ಅಗ್ರಸ್ಥಾನಕ್ಕೆ ತಲುಪಿತ್ತು. ಆದರೆ, ಇಂಗ್ಲೆಂಡ್ ವಿರುದ್ಧದ ಐದು ಟೆಸ್ಟ್‌ಗಳ ಸರಣಿಯನ್ನು 4-1 ರಲ್ಲಿ ಗೆದ್ದು ಮತ್ತೆ ನಂಬರ್​ 1 ಸ್ಥಾನಕ್ಕೆ ಮರಳಿದೆ.

ಹೈದರಾಬಾದ್‌ನಲ್ಲಿ ನಡೆದ ಮೊದಲ ಟೆಸ್ಟ್‌ನಲ್ಲಿ ಭಾರತ 28 ರನ್‌ಗಳಿಂದ ಸೋಲು ಕಂಡಿತ್ತು. ಬಳಿಕ ವಿಶಾಖಪಟ್ಟಣಂ, ರಾಜ್‌ಕೋಟ್, ರಾಂಚಿ ಮತ್ತು ಧರ್ಮಶಾಲಾದಲ್ಲಿ ನಡೆದ ಪಂದ್ಯಗಳಲ್ಲಿ ಗೆಲುವು ಸಾಧಿಸಿದೆ.

ಇದನ್ನೂ ಓದಿ: ಇಂಗ್ಲೆಂಡ್ ವಿರುದ್ಧ ಭಾರತಕ್ಕೆ ಇನ್ನಿಂಗ್ಸ್​ ಮತ್ತು 64 ರನ್​ಗಳ ಜಯ, 4-1 ರಿಂದ ಸರಣಿ ಕೈವಶ, WTCಯಲ್ಲಿ ಅಗ್ರಸ್ಥಾನ