ಹೆಚ್ಚಾಗಿ ಆರ್ಭಟಗಳಲ್ಲೇ ಕಳೆದು ಹೋಗುವ ಕನ್ನಡ ಬಿಗ್ ಬಾಸ್ ಮನೆಯೀಗ ಭಾವನಾತ್ಮಕ ಕ್ಷಣಗಳಿಗೆ ಸಾಕ್ಷಿಯಾಗಿದೆ. ಸ್ಪರ್ಧಿಗಳ ಮನೆ ಮಂದಿ ಆಗಮಿಸುತ್ತಿದ್ದು, ಈ ವಾರ ಎಮೋಶನಲ್ ವೀಕ್ ಆಗಿ ಮಾರ್ಪಾಡಾಗಿದೆ. ಇಂದಿನ ಸಂಚಿಕೆಯಲ್ಲಿ ಧನರಾಜ್ ಆಚಾರ್, ಹನುಮಂತ ಮತ್ತು ಚೈತ್ರಾ ಕುಂದಾಪುರ ಕುಟುಂಬಸ್ಥರನ್ನು ಕಾಣಬಹುದಾಗಿದೆ.
'ದೊಡ್ಮನೆ ತುಂಬಾ ಸಂತಸ, ಸಂಭ್ರಮದ ಜೊತೆ ಒಂದಿಷ್ಟು ಕಣ್ಣೀರು' ಎಂಬ ಕ್ಯಾಪ್ಷನ್ನಡಿ ಪ್ರೋಮೋ ಅನಾವರಣಗೊಂಡಿದೆ. ಚೈತ್ರಾ ಕುಂದಾಪುರ ಅವರ ತಾಯಿ ಮತ್ತು ತಂಗಿ ದೊಡ್ಮನೆ ಪ್ರವೇಶಿಸಿದ್ದಾರೆ. ಮನೆಯೊಳಗೆ ಬರುತ್ತಿದ್ದಂತೆ ರಜತ್ ಅವರಿಗೆ ನನಗೆ ನೀವ್ ಬಾಸ್ ಎಂದು ಚೈತ್ರಾ ಕುಂದಾಪುರ ಅವರ ಸಹೋದರಿ ತಿಳಿಸಿದ್ದಾರೆ.
ಚೈತ್ರಾ ಕುಂದಾಪುರ ಭಾವುಕ: ಇನ್ನೂ ತಾಯಿ ಮಾತನಾಡಿ, ಎಲ್ಲಾ ಸೇರಿ ನನ್ನ ಮಗಳಿಗೆ ಕಳಪೆ ಕೊಟ್ರಿ. ಆದರೆ ಅವಳು ನಮಗೆ ಎಂದೆಂದಿಗೂ ಉತ್ತಮವೇ ಎಂದು ಹೇಳಿ ಚೈತ್ರಾ ಕುಂದಾಪುರಗೆ ಮೆಡಲ್ ಹಾಕಿದ್ದಾರೆ. ನಂತರ ಚೈತ್ರಾ ಮಾತನಾಡಿ, ಇವಳು (ತಂಗಿ) ಹುಟ್ಟಿದಾಗ ನನಗೆ ನಿಜವಾದ ಚಾಲೆಂಜ್ ಶುರುವಾಗುತ್ತದೆ. ಮೂರನೆಯದ್ದೂ ಹೆಣ್ಣಾಯ್ತು ಅನ್ನೋ ಮಾತುಗಳು ಬರುತ್ತೆ. ಅಪ್ಪ ಅಮ್ಮನ ಹೆಣಕ್ ಬೆಂಕಿ ಇಡೋಕ್ಕೂ ಇವರ ಮನೆಯಲ್ಲಿ ಗಂಡ್ ದಿಕ್ಕಿಲ್ಲ..... ಅನ್ನೋ ಮಾತುಗಳು ಬಂದವು ಎಂದು ಹೇಳುತ್ತಾರೆ. ಅಲ್ಲಿಗೆ ಹೆಣ್ಣು ಮಗುವಿನ ಜನನದ ಬಗ್ಗೆ ಸಮಾಜದಿಂದ ಬಂದ ಟೀಕೆಗಳ ಬಗ್ಗೆ ಹೇಳಿಕೊಂಡು ಕಣ್ಣೀರಿಟ್ಟಿರುವಂತೆ ತೋರಿದೆ.
ಇದನ್ನೂ ಓದಿ: 'ಒಂದು ಮಳೆಬಿಲ್ಲು'.. ಸೇರಿ ಹಿಟ್ ಸಾಂಗ್ಸ್ ಕೊಟ್ಟ ಗಾಯಕ ಅರ್ಮಾನ್ ಮಲಿಕ್ ಮದುವೆ: ಡ್ರೀಮಿ ವೆಡ್ಡಿಂಗ್ ಫೋಟೋಗಳಿಲ್ಲಿವೆ
ದೊಡ್ಮನೆ ಸ್ಪರ್ಧಿಗಳಿಗೆ ಊಟ ತಂದ ಹನುಮಂತು ಕುಟುಂಬಸ್ಥರು: ಮತ್ತೊಂದೆಡೆ, ಹನುಮಂತು ಅವರ ಕುಟುಂಬಸ್ಥರು ಕೂಡಾ ಬಿಗ್ ಬಾಸ್ ಮನೆಗೆ ಬಂದಿದ್ದಾರೆ. ಸ್ಪರ್ಧಿಗಳಿಗೆ ತಮ್ಮ ಮನೆಯಿಂದ ಮಾಡಿಕೊಂಡು ಬಂದ ಊಟವನ್ನು ಬಡಿಸಿದ್ದಾರೆ. ರೊಟ್ಟಿ, ಊಟ ಸವಿದು ಮನೆಯವರು ಖುಷಿಪಟ್ಟಿದ್ದಾರೆ.
ಇದನ್ನೂ ಓದಿ: ಬೇಬಿಬಂಪ್ ಫೋಟೋಶೂಟ್ ಹಂಚಿಕೊಂಡ ಹರಿಪ್ರಿಯಾ ವಸಿಷ್ಠ ಸಿಂಹ
ಬಿಗ್ ಬಾಸ್ ಇತಿಹಾಸದಲ್ಲೇ ಮೊದಲು: ಈಗಾಗಲೇ ಬಿಗ್ ಬಾಸ್ ಮನೆಗೆ ಭವ್ಯಾ ಗೌಡ, ತ್ರಿವಿಕ್ರಮ್, ರಜತ್ ಕಿಶನ್, ಉಗ್ರಂ ಮಂಜು, ಗೌತಮಿ ಜಾಧವ್ ಕುಟುಂಬಸ್ಥರು ಬಂದು ಹೋಗಿದ್ದಾರೆ. ಇಂದಿನ ಎಪಿಸೋಡ್ನಲ್ಲಿ ಧನರಾಜ್ ಆಚಾರ್, ಹನುಮಂತ ಮತ್ತು ಚೈತ್ರಾ ಕುಂದಾಪುರ ಕುಟುಂಬಸ್ಥರನ್ನು ಕಾಣಬಹುದಾಗಿದೆ. ಅದರಲ್ಲೂ ಧನರಾಜ್ ಆಚಾರ್ ಅವರ ದೊಡ್ಡ ಕುಟುಂಬವೇ ಬಂದಿದೆ. ಪ್ರತೀ ಸ್ಪರ್ಧಿಗಳ ಮನೆಯಿಂದ ಒಬ್ಬರೋ, ಇಬ್ಬರೂ ಅಥವಾ ನಾಲ್ಕೈದು ಮಂದಿ ಬಂದ್ರೆ ಧನರಾಜ್ ಮನೆಯಿಂದ ಸರಿಸುಮಾರು 30 ಮಂದಿ ಬಂದಿದ್ದಾರೆ. ಒಂದೇ ಕುಟುಂಬದ ಇಷ್ಟೊಂದು ಮಂದಿ ಬಂದಿದ್ದು ಬಿಗ್ ಬಾಸ್ ಇತಿಹಾಸದಲ್ಲೇ ಮೊದಲು. ಒಟ್ಟಾರೆ ಸಂಪೂರ್ಣ ಸಂಚಿಕೆ ವೀಕ್ಷಿಸಲು ಅಪಾರ ಸಂಖ್ಯೆಯ ಅಭಿಮಾನಿಗಳು ಕಾತರರಾಗಿದ್ದಾರೆ.
