ಊಟಕ್ಕೂ ಹಣವಿಲ್ಲ, ಫೈನ್ ಹೇಗೆ ಕಟ್ಟಲಿ?: ಪೊಲೀಸರೊಂದಿಗೆ ಬೈಕ್ ಸವಾರನ ಕಿರಿಕ್

ಮೈಸೂರು: ಬೈಕ್​ನಲ್ಲಿ ಮಾಸ್ಕ್ ಧರಿಸದೆ ಬಂದು ಪೊಲೀಸರ ಬಳಿ ಸಿಕ್ಕಿ ಹಾಕಿಕೊಂಡ ಬೈಕ್ ಸವಾರ, ಫೈನ್ ಕಟ್ಟಲು ಆಗದೆ ಅವರೊಂದಿಗೆ ವಾಗ್ವಾದ ನಡೆಸಿ, ಕೊನೆಗೂ ನನ್ನ ಬಳಿ ಊಟಕ್ಕೂ ಹಣವಿಲ್ಲ ಎಂದು ತನ್ನ ಪರ್ಸ್​ನನ್ನು ತೋರಿಸಿದ ಘಟನೆ ನಗರದ ಚಾಮರಾಜ ಜೋಡಿ ರಸ್ತೆ ಸಿಗ್ನಲ್ ಬಳಿ ನಡೆದಿದೆ. ನಗರದ ಚಾಮರಾಜಜೋಡಿ ರಸ್ತೆಯ ಸಿಗ್ನಲ್ ಬಳಿ ವ್ಯಕ್ತಿಯೊಬ್ಬ ಮಾಸ್ಕ್ ಧರಿಸದೆ ಬೈಕ್​ನಲ್ಲಿ ಬಂದಿದ್ದು, ಈ ಸಂದರ್ಭದಲ್ಲಿ ಪೊಲೀಸರು ಈತನನ್ನು ತಡೆದು ಮನೆಯಿಂದ ಹೊರ ಬಂದಾಗ ಮಾಸ್ಕ್ ಹಾಕಿಕೊಂಡು ಬರುವುದು ಕಡ್ಡಾಯ, ಮಾಸ್ಕ್ ಧರಿಸದ ಕಾರಣ ಫೈನ್ ಕಟ್ಟುವಂತೆ ಆ ವ್ಯಕ್ತಿಗೆ ಹೇಳಿದ್ದಾರೆ. ಮಾಸ್ಕ್ ಏಕೆ ಧರಿಸಬೇಕು, ಫೈನ್ ಕಟ್ಟಲು ನನ್ನ ಬಳಿ ಹಣವಿಲ್ಲ, ಫೈನ್ ಕಟ್ಟುವುದಕ್ಕಿರಲಿ ನನ್ನ ಬಳಿ ಊಟ ತಿಂಡಿಗೂ ಹಣವಿಲ್ಲ, ಎಂದಿದ್ದಾನೆ. ಕೊನೆಗೂ ಪೊಲೀಸರು ಈತನಿಗೆ ಕರುಣೆ ತೋರದೆ ಇದ್ದಾಗ ಫೋನ್​ನಲ್ಲಿ ಸ್ನೇಹಿತನನ್ನು ಕರೆಸಿ ಆತನ ಬಳಿ ಸಾಲ ಪಡೆದು, ಮಾಸ್ಕ್ ಫೈನ್​ನನ್ನು ಕಟ್ಟಿದ್ದಾನೆ.