ಕಸ ವಿಲೇವಾರಿಗೆ ಮೀನಾಮೇಷ: ಆಯುಕ್ತರ ಮನೆ ಮುಂದೆಯೇ ಕಸ ಸುರಿದು ಶಾಸಕನ ಆಕ್ರೋಶ

ಅಯ್ಯೋ ಅವರು ಹೇಳಿಕೇಳಿ ಮಹಾನಗರ ಪಾಲಿಕೆ ಆಯುಕ್ತರು, ಅವರ ಮನೆಯ ಮುಂದೆಯೇ ಈ ಪರಿ ಕಸವಾ ಎಂದು ಅಚ್ಚರಿ ಆಯ್ತಾ?. ಹೌದು, ನಗರದಲ್ಲಿ ಕಸ ವಿಲೇವಾರಿ ಸರಿಯಾಗಿ ಆಗದ ಹಿನ್ನೆಲೆಯಲ್ಲಿ ಜನಪ್ರತಿನಿಧಿಯೇ ಆಕ್ರೋಶಗೊಂಡು ಅಧಿಕಾರಿಗೆ ಕಲಿಸಿದ ಪಾಠ ಇದು. ಶಾಸಕ ಅಭಯ್ ಪಾಟೀಲ್​ ಆಯುಕ್ತರ ಮನೆ ಮುಂದೆಯೇ ಕಸ ಸುರಿದು ಪ್ರತಿಭಟಿಸಿದರು. ಬೆಳಗಾವಿ ದಕ್ಷಿಣ ಕ್ಷೇತ್ರ ವ್ಯಾಪ್ತಿಯಲ್ಲಿ ಕಸ ವಿಲೇವಾರಿ ಆಗುತ್ತಿಲ್ಲ ಎಂದು ಶಾಸಕರು ಈ ನಿರ್ಧಾರ ತೆಗೆದುಕೊಂಡಿದ್ದಾರೆ. ಕಸ ವಿಲೇವಾರಿ ಸಂಬಂಧ ಹಲವು ಬಾರಿ ಅಧಿಕಾರಿಗಳ ಗಮನಕ್ಕೆ ತಂದಿದ್ದರೂ ಯಾವುದೇ ಪ್ರಯೋಜನವಾಗದೆ ಬೇಸತ್ತು ಈ ನಿರ್ಧಾರ ಮಾಡಿದ್ದಾರಂತೆ. ಕ್ಷೇತ್ರದಲ್ಲಿ ವಿಲೇವಾರಿಯಾಗದೆ ಇದ್ದ ಕಸವನ್ನು ಟ್ರ್ಯಾಕ್ಟರ್​ನಲ್ಲುತುಂಬಿಸಿ ತಾವೇ ಸ್ವತಃ ಚಾಲನೆ ಮಾಡಿಕೊಂಡು ಬಂದು, ಪಾಲಿಕೆ ಆಯುಕ್ತ ಜಗದೀಶ್ ಕೆ.ಹೆಚ್ ನಿವಾಸದೆದುರೇ ಸುರಿದು ಆಕ್ರೋಶ ಹೊರಹಾಕಿದ್ದಾರೆ. ಬಳಿಕ ಕಸವನ್ನು ಮಹಾನಗರ ಪಾಲಿಕೆ ಸಿಬ್ಬಂದಿ ತೆರವುಗೊಳಿಸಿದ್ದು, ಮುಂದೆ ಈ ಸಮಸ್ಯೆ ಬಗೆಹರಿಯದಿದ್ದರೆ ಪ್ರತೀ ಭಾನುವಾರ ಕಸ ಸುರಿಯುವುದಾಗಿ ಎಚ್ಚರಿಸಿದ್ದಾರೆ.