ಕೋಲಾರ: ದೇಶಾದ್ಯಂತ ಮಹಾಮಾರಿ ಕೊರೊನಾ ತನ್ನ ವಿಭಿನ್ನ ರೀತಿಯಲ್ಲಿ ಆರ್ಭಟಿಸುತ್ತಿದೆ. ಇದರ ಅಟ್ಟಹಾಸಕ್ಕೆ ಎಲ್ಲ ವಯೋಮಾನದವರು ಸಿಲುಕಿ ನರಳುತ್ತಿದ್ದರೆ, ಕೆಲವರ ಪ್ರಾಣಪಕ್ಷಿ ಹಾರಿಹೋಗಿದೆ.
ಈಗ ಈ ಮಹಾಮಾರಿ ತನ್ನ ಪ್ರಭಾವವನ್ನು ಬೇರೆಡೆ ಸ್ಥಳಾಂತರಿಸಿದ್ದು, ಆಗ ತಾನೇ ಹೊಸ ಪ್ರಪಂಚಕ್ಕೆ ಕಾಲಿಡುತ್ತಾ ಅಮ್ಮನ ಮಡಿಲಲ್ಲಿ ಬೆಚ್ಚನೆ ಮಲಗಿ ಆಡುತ್ತಾ, ನಲಿಯುತ್ತಾ ಎದೆಹಾಲು ಕುಡಿಯಬೇಕಿದ್ದ ನವಜಾತ ಶಿಶುಗಳು ಇಂದು ತಾಯಂದಿರಿಂದ ದೂರವಾಗಿವೆ. ಈ ಮನಕಲಕುವ ಘಟನೆಗೆ ಸಾಕ್ಷಿಯಾಗಿದೆ ಜಿಲ್ಲಾಸ್ಪತ್ರೆ.
ಹೌದು, ಈ ಕ್ರೂರಿ ಕೊರೊನಾ ಅನ್ನೋ ವೈರಸ್ ವಿಶ್ವದಾದ್ಯಂತ ಜನರನ್ನು ಇನ್ನಿಲ್ಲದಂತೆ ಕಾಡುತ್ತಿದೆ. ಮಹಿಳೆಯರು-ಮಕ್ಕಳು, ವೃದ್ಧರನ್ನು ಬಿಟ್ಟು ಬಿಡದಂತೆ ಹಿಂಸಿಸಿದೆ. ಇನ್ನು ಗರ್ಭಿಣಿಯರಲ್ಲಿ ಈ ಸೋಂಕು ವಕ್ಕರಿಸಿ ಆತಂಕ ಸೃಷ್ಟಿಸಿದ್ದಲ್ಲದೇ, ಇದೀಗ ಬಾಣಂತಿಯರ ಬೆನ್ನೇರಿದೆ. ಈ ಮೂಲಕ ಹುಟ್ಟುತ್ತಲೇ ಅಮ್ಮನ ಮಡಿಲಲ್ಲಿ ಮಲಗಿ ನಲಿದಾಡಬೇಕಿದ್ದ ಹಸುಗೂಸುಗಳ ನೆಮ್ಮದಿಯನ್ನು ಕಸಿದುಕೊಂಡಿದೆ.
ಮೂವರು ಬಾಣಂತಿಯರಲ್ಲಿ ಪಾಸಿಟಿವ್: ಇಂಥಹ ಪ್ರಕರಣಗಳು ನಡೆದಿರೋದು ಕೋಲಾರದಲ್ಲಿ. ಜಿಲ್ಲೆಯಲ್ಲಿ ಮೂವರು ಬಾಣಂತಿಯರಲ್ಲಿ ಕೊರೊನಾ ಪಾಸಿಟಿವ್ ಬಂದಿರುವ ಹಿನ್ನೆಲೆ ಬಾಣಂತಿಯರು ಹಾಗೂ ಆ ನವಜಾತ ಶಿಶುಗಳನ್ನು ಹೆಚ್ಚಿನ ಕಾಳಜಿ ವಹಿಸಿ ಆರೈಕೆ ಮಾಡಲಾಗುತ್ತಿದೆ. ಮೂವರು ಬಾಣಂತಿ ಮಹಿಳೆಯರನ್ನು ಪ್ರತ್ಯೇಕವಾಗಿಟ್ಟು ಯಾವುದೇ ತೊಂದರೆಯಾಗದಂತೆ ನೋಡಿಕೊಳ್ಳಲಾಗುತ್ತಿದೆ.
ಶಿಶುಗಳನ್ನು ಪ್ರತ್ಯೇಕವಾಗಿಟ್ಟು ಆರೈಕೆ: ಮಕ್ಕಳಿಗೆ ತಾಯಿ ಎದೆಹಾಲು ಕುಡಿಸುವಾಗ ಮಾತ್ರ ತಾಯಿಯ ಜೊತೆಗೆ ಮಕ್ಕಳನ್ನು ಇರಿಸಲಾಗುತ್ತಿದೆ. ಉಳಿದ ಸಮಯದಲ್ಲಿ ಶಿಶುಗಳನ್ನು ಪ್ರತ್ಯೇಕವಾಗಿಟ್ಟು ಆರೈಕೆ ಮಾಡಲಾಗುತ್ತಿದೆ. ನಗರದಲ್ಲಿ ಒಂದು ಪ್ರಕರಣ, ಕೆಜಿಎಫ್ ನಲ್ಲಿ ಹಾಗೂ ಮಾಲೂರು ತಾಲ್ಲೂಕಿನಲ್ಲಿ ಒಂದು ಸೇರಿ ಒಟ್ಟು ಜಿಲ್ಲೆಯ ಮೂವರು ಬಾಣಂತಿ ಮಹಿಳೆಯರಲ್ಲಿ ಸೋಂಕು ಪತ್ತೆಯಾಗಿದ್ದು ಅವರನ್ನು ನಗರದ ಜಿಲ್ಲಾಸ್ಪತ್ರೆಯ ಮಕ್ಕಳ ತಜ್ಞರಾದ ಡಾ. ಬಾಲಸುಂದರ್ ಹೆಚ್ಚಿನ ಕಾಳಜಿ ವಹಿಸಿ ನೋಡಿಕೊಳ್ಳುತ್ತಿದ್ದಾರೆ.
ಮುನ್ನೆಚ್ಚರಿಕೆಯೊಂದಿಗೆ ಚಿಕಿತ್ಸೆ: ಇನ್ನು ಇಂತಹ ಪ್ರಕರಣಗಳು ಸಾಕಷ್ಟು ಆತಂಕ ಉಂಟು ಮಾಡುವ ಜೊತೆಗೆ ಬಹಳಷ್ಟು ಜವಾಬ್ದಾರಿ ಹಾಗೂ ಕಾಳಜಿ ವಹಿಸಬೇಕಿದ್ದು, ಅದಕ್ಕಾಗಿ ಬಾಣಂತಿಯರು ಹಾಗೂ ಸೋಂಕಿತರಿರುವ ಕೋವಿಡ್ ಆಸ್ಪತ್ರೆ ಬಳಿ ಸ್ಯಾನಿಟೈಸ್ ಮಾಡುತ್ತಾ, ಆಸ್ಪತ್ರೆಯ ಒಳಗೆ ಹಾಗೂ ಹೊರಗೆ ಸಾಕಷ್ಟು ಮುನ್ನೆಚ್ಚರಿಕೆ ಕ್ರಮ ಕೈಗೊಂಡು ಚಿಕಿತ್ಸೆ ನೀಡಲಾಗುತ್ತಿದೆ ಅನ್ನೋದು ಜಿಲ್ಲಾ ಆರೋಗ್ಯಾಧಿಕಾರಿಗಳ ಮಾತು.
ಒಟ್ಟಾರೆ ಕೊರೊನಾ ಮಹಾಮಾರಿ ಕೋಲಾರದಲ್ಲಿ ಅಟ್ಟಹಾಸ ಮೆರೆಯುತ್ತಿರುವುದರಿಂದ ಸೋಂಕಿತರ ಸಂಖ್ಯೆ 200 ರ ಗಡಿ ದಾಟಿದೆ. ಅದರಲ್ಲೂ ಗರ್ಭಿಣಿ ಮಹಿಳೆಯರು ಹಾಗೂ ಬಾಣಂತಿಯರಲ್ಲಿ ಸೋಂಕು ಪತ್ತೆಯಾಗುವ ಮೂಲಕ ಕೊರೊನಾ ಮಹಾಮಾರಿ ತನ್ನ ರೌದ್ರರೂಪವನ್ನು ಪ್ರದರ್ಶಿಸುತ್ತಿದೆ. ಇದು ಜಿಲ್ಲೆಯ ಜನರನ್ನು ಮತ್ತಷ್ಟು ಆತಂಕಕ್ಕೆ ದೂಡಿದೆ.
