ಹಾಸನ : ನಾಯಿನ ಎಲ್ಲೇ ತಂದು ಕೂರಿಸಿದರೂ ಅದು ತಿಪ್ಪೆ ಕೆರೆಯೋ ಬುದ್ದಿನ ಬಿಡುವುದೇ ಇಲ್ಲ. ಹಾಗೇನೆ ನಮ್ಮ ಹೆಚ್ ಡಿ ರೇವಣ್ಣನವರು ಕೂಡ ತಮ್ಮ ಹಳೆ ಚಾಳಿನ ಬಿಡೋದೇ ಇಲ್ಲ ಎಂದು ಮಾಜಿ ಸಚಿವ ಎ.ಮಂಜು ವ್ಯಂಗ್ಯವಾಡಿದ್ದಾರೆ.
ನಗರದಲ್ಲಿ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು, ಅಪ್ಪ-ಮಕ್ಕಳ ಜೊತೆ ಹೋದರೆ ಕಾಂಗ್ರೆಸ್ ಉಳಿಯಲ್ಲ ಅಂತಾ ನಾನು ಮೊದಲೇ ಹೇಳಿದ್ದೆ. ಅದು ಹಾಗೇ ಆಗಿದೆ. ನಾನು ಕಾಂಗ್ರೆಸ್ ಬಿಡುವಾಗ ಸಿದ್ದರಾಮಯ್ಯನವರಿಗೆ ಹೇಳ್ಬಿಟ್ಟೇ ಬಂದಿದ್ದೆ. ನೀವೇನಾದ್ರೂ ಅವರ ಜೊತೆ ಕೈಜೋಡಿಸಿದರೆ ನಾನು ನಿಮ್ಮ ಪಕ್ಷದಲ್ಲಿ ಇರೋಲ್ಲ ಅಂತಾ. ಇವತ್ತು ಕಾಂಗ್ರೆಸ್ ಪಕ್ಷದ ಸ್ಥಿತಿಯನ್ನು ನೋಡಿದರೆ ನಿಮಗೆ ಗೊತ್ತಾಗುತ್ತೆ, ನಾನು ಯಾಕೆ ಕಾಂಗ್ರೆಸ್ ಬಿಟ್ಟೆ ಅನ್ನೋದು ಎಂದರು.
ಸಿದ್ದರಾಮಯ್ಯ ನನಗೆ ಮೊದಲೇ ಹೇಳಿದ್ದರು. ಹೆಚ್ ಡಿ ರೇವಣ್ಣ ಪ್ರಾಣ ಬೇಕಾದ್ರೂ ಬಿಡ್ತಾನೆ, ಕೆ‌ಎಂಎಫ್ ಬಿಡೋದಿಲ್ಲ ಅಂತಾ. ಪಿಡಬ್ಲ್ಯೂಡಿನಲ್ಲಿರುವ ಭ್ರಷ್ಟ ಅಧಿಕಾರಿಗಳನ್ನ ಸರ್ಕಾರದ ಆದೇಶ ಧಿಕ್ಕರಿಸಿ ವರ್ಗಾವಣೆ ಮಾಡುತ್ತಿದ್ದಾರೆ. ಇದಕ್ಕೆಲ್ಲಾ ರೇವಣ್ಣನವರ ಕೃಪಾಕಟಾಕ್ಷ ಇದೆ ಎಂದು ಎ. ಮಂಜು ದೂರಿದರು.
ಈ ಹಿಂದೆ ಯಡಿಯೂರಪ್ಪನವರು ಸದನದಲ್ಲಿ ಅಪ್ಪ-ಮಕ್ಕಳ ಬಗ್ಗೆ ಡಿ ಕೆ ಶಿವಕುಮಾರ್ ಮತ್ತು ಸಿದ್ದರಾಮಯ್ಯನವರಿಗೆ ಹೇಳಿದ್ರು. ಇವರನ್ನ ನಂಬಿಕೊಂಡು ಹೋದರೆ, ನಿಮಗೆ ಖಂಡಿತಾ ಅನ್ಯಾಯ ಮಾಡ್ತಾರೆ ಅಂತಾ ಎಚ್ಚರಿಸಿದ್ದರು. ರಾಜ್ಯದಲ್ಲಿ ಯಡಿಯೂರಪ್ಪನವರ ನೇತೃತ್ವದಲ್ಲಿ ಒಳ್ಳೆಯ ಕೆಲಸಗಳು ಆಗುತ್ತವೆ ಅಂತಾ ಇದೇ ವೇಳೆ ಎ. ಮಂಜು ವಿಶ್ವಾಸ ವ್ಯಕ್ತಪಡಿಸಿದರು.
