1 Ball 7 Runs: ವಿಶ್ವದ ಜನಪ್ರಿಯ ಕ್ರೀಡೆಗಳಲ್ಲಿ ಒಂದಾಗಿರುವ ಕ್ರಿಕೆಟ್ನಲ್ಲಿ ಈವರೆಗೂ ಹಲವಾರು ದಾಖಲೆಗಳು ನಿರ್ಮಾಣವಾಗಿವೆ ಮತ್ತು ಮುರಿದಿವೆ. ಆದರೆ ಕೆಲವು ಅಪರೂಪದ ದಾಖಲೆಗಳಿವೆ. ಈ ಕುರಿತು ಹೆಚ್ಚಿನವರಿಗೆ ತಿಳಿದಿಲ್ಲ. ಈ ಪೈಕಿ ಒಂದು, ಬ್ಯಾಟರ್‌ವೋರ್ವ ನೋಬಾಲ್, ವೈಡ್, ಬೌಂಡರಿ ಇಲ್ಲದೆಯೇ 1 ಎಸೆತದಲ್ಲಿ 7ರನ್ ಸಿಡಿಸಿರುವುದು.
Aus vs Pak Test Series: 1981ರಲ್ಲಿ 3 ಪಂದ್ಯಗಳ ಟೆಸ್ಟ್ ಸರಣಿಗೆ ಪಾಕಿಸ್ತಾನ ತಂಡ ಆಸ್ಟ್ರೇಲಿಯಾ ಪ್ರವಾಸ ಕೈಗೊಂಡಿತ್ತು. ಸರಣಿಯ 3ನೇ ಮತ್ತು ಕೊನೆಯ ಪಂದ್ಯ ಮೆಲ್ಬರ್ನ್ ಕ್ರಿಕೆಟ್ ಮೈದಾನದಲ್ಲಿ ನಡೆದಿತ್ತು. ಮೊದಲು ಬ್ಯಾಟ್ ಮಾಡಿದ್ದ ಪಾಕಿಸ್ತಾನ, ಮುದಾಸರ್ ನಝರ್ (95), ಮಜಿದ್ ಖಾನ್ (74), ಜಾವೇದ್ ಅಬ್ಬಾಸ್ (90), ವಾಸೀಂ ರಜಾ (50), ಇಮ್ರಾನ್ ಖಾನ್ (70) ಬ್ಯಾಟಿಂಗ್ ನೆರವಿನಿಂದ ಮೊದಲ ಇನ್ನಿಂಗ್ಸ್ನಲ್ಲಿ 500 ರನ್‌ಗಳ ಬೃಹತ್ ಮೊತ್ತ ಕಲೆ ಹಾಕಿ, ಇನ್ನಿಂಗ್ಸ್ ಡಿಕ್ಲೇರ್ ಮಾಡಿಕೊಂಡಿತ್ತು.
ಇದಕ್ಕುತ್ತರವಾಗಿ ಆಸೀಸ್ ಎರಡೂ ಇನ್ನಿಂಗ್ಸ್ ಆಡಿದರೂ ಈ ಗುರಿಯನ್ನು ತಲುಪಲಾಗದೇ 82 ರನ್‌ಗಳಿಂದ ಸೋಲನುಭವಿಸಿತು. ಮೊದಲ ಇನ್ನಿಂಗ್ಸ್ನಲ್ಲಿ 293/10 ಎರಡನೇ ಇನ್ನಿಂಗ್ಸ್ನಲ್ಲಿ 125ಕ್ಕೆ ಆಲೌಟ್ ಆಯಿತು. ಇದರೊಂದಿಗೆ ಪಾಕಿಸ್ತಾನ ಇನ್ನಿಂಗ್ಸ್‌ಸಮೇತ ಪಂದ್ಯ ಗೆದ್ದುಕೊಂಡಿತ್ತು. ಇದೇ ಪಂದ್ಯದಲ್ಲಿ ಮಜಿದ್ ಖಾನ್ ಅಪರೂಪದ ದಾಖಲೆ ಬರೆದರು.
ಮೊದಲ ಇನ್ನಿಂಗ್ಸ್ನಲ್ಲಿ ಮಜಿದ್ ಖಾನ್ ಒಂದೇ ಎಸೆತದಲ್ಲಿ ನೋಬಾಲ್, ವೈಡ್, ಬೌಂಡರಿ ಇಲ್ಲದೇ 7 ರನ್ ಗಳಿಸಿದ್ದರು. ಆಸ್ಟ್ರೇಲಿಯಾದ ಡೆನ್ನಿಸ್ ಲಿಲ್ಲೆ ಬೌಲಿಂಗ್ ವೇಳೆ ಬಾಲ್ವೊಂದನ್ನು ಡೀಪ್ ಪಾಯಿಂಟ್ ಕಡೆಗೆ ಬಾರಿಸಿದ್ದರು. ಮೈದಾನ ದೊಡ್ಡದಾಗಿದ್ದ ಕಾರಣ ಮಜಿದ್ ಖಾನ್ ರನ್ಗಳಿಸಲು ಆರಂಭಿಸಿದರು. 3 ರನ್ ಕಲೆ ಹಾಕಿ 4ನೇ ರನ್ ಕದಿಯಲು ಮಜಿದ್ ಖಾನ್ ಓಡಿದ್ದರು.
ಈ ವೇಳೆ ಆಸೀಸ್ ಬೌಲರ್ ಚೆಂಡನ್ನು ಹಿಡಿದು ಬಲವಾಗಿ ಕೀಪರ್ ಕಡೆ ಎಸೆದಿದ್ದರು. ಆದರೆ ಕೀಪರ್ ಈ ಚೆಂಡನ್ನು ಹಿಡಿಯಲು ಸಾಧ್ಯವಾಗಲಿಲ್ಲ. ಪಾಕ್ ಕ್ರಿಕೆಟಿಗರು ಮತ್ತೆ 3 ರನ್ ಕಲೆ ಹಾಕಿದರು. ಓವರ್‌ ಥ್ರೋದಿಂದಾಗಿ ಮಜಿದ್ ಖಾನ್ ಖಾತೆಗೆ 7 ರನ್ ಸೇರಿದವು. ಇದರಿಂದ 1 ಎಸೆತದಲ್ಲಿ ಮಜಿದ್ ಖಾನ್ 7 ರನ್ ಕಲೆ ಹಾಕಿ ದಾಖಲೆ ಬರೆದರು. 1 ಎಸೆತದಲ್ಲಿ 7 ರನ್ ತೆಗೆದ ದಾಖಲೆ ಕ್ರಿಕೆಟ್ನಲ್ಲಿ ಅನೇಕ ಬಾರಿ ಸಂಭವಿಸಿದೆ. ಇಂಗ್ಲೆಂಡ್ನ ಅಲನ್ ನಾಟ್, ಆಸ್ಟ್ರೇಲಿಯಾದ ಮ್ಯಾಥ್ಯು ರೆನ್ಶಾ, ನ್ಯೂಜಿಲೆಂಡ್ನ ವಿಲ್ ಯಂಗ್ ಈ ಪಟ್ಟಿಯಲ್ಲಿದ್ದಾರೆ.
ಇದನ್ನೂ ಓದಿ: T20 ಕ್ರಿಕೆಟ್ನಲ್ಲಿ ಅತಿ ಹೆಚ್ಚು ಪಂದ್ಯಗಳನ್ನು ಗೆದ್ದ ಟಾಪ್ 10 ತಂಡಗಳು: ಭಾರತಕ್ಕೆ ಎಷ್ಟನೇ ಸ್ಥಾನ?
