ಬೆಳ್ತಂಗಡಿ : ಬಂದಾರು ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಕುಂಟಾಲಪಲ್ಕೆ ಕಲ್ಲರ್ಪೆ ರಸ್ತೆ ಬದಿ ಸುಮಾರು 50ಕ್ಕೂ ಹೆಚ್ಚು ಮೃತ ಹಾಗೂ ಅಸ್ವಸ್ಥ ಮಂಗಗಳು ನಿನ್ನೆ (ಗುರುವಾರ) ರಾತ್ರಿ ಪತ್ತೆಯಾಗಿವೆ.
ರಸ್ತೆ ಬದಿಯಲ್ಲಿದ್ದ ಮಂಗಗಳನ್ನು ನಿನ್ನೆ ರಾತ್ರಿ ವಾಹನದಲ್ಲಿ ಹೋಗುವವರು ಗಮನಿಸಿದ್ದಾರೆ. ಇಂದು ಗ್ರಾಮ ಪಂಚಾಯಿತಿ ಮತ್ತು ಅರಣ್ಯ ಇಲಾಖೆಗೆ ಮಾಹಿತಿ ನೀಡಿದ್ದಾರೆ. ಗ್ರಾ.ಪಂ ಅಧ್ಯಕ್ಷ ಬಿ.ಕೆ. ಉದಯ ಕುಮಾರ್, ಪಿಡಿಒ ಮೋಹನ್ ಬಂಗೇರ, ಅರಣ್ಯ ಇಲಾಖೆ ಸಿಬ್ಬಂದಿ, ಗ್ರಾ.ಪಂ ಸದಸ್ಯ ಹರೀಶ್ ಸೇರಿ ಇತರರು ಬಂದು ಪರಿಶೀಲಿಸಿದರು.
ವಿಷ ಹಾಕಿದ್ದ ಹಣ್ಣು ತಿಂದ ಮಂಗಗಳು ಪ್ರಜ್ಞೆ ತಪ್ಪಿವೆ. ಈ ಬಳಿಕ ಅವುಗಳನ್ನು ವಾಹನದಲ್ಲಿ ತಂದು ಇಲ್ಲಿನ ರಸ್ತೆ ಬದಿಯಲ್ಲಿ ಎಸೆದು ಹೋಗಿರಬಹುದು ಎನ್ನಲಾಗುತ್ತಿದೆ. ಅರೆ ಪ್ರಜ್ಞಾವಸ್ಥೆಯಲ್ಲಿದ್ದ ಕೆಲವು ಮಂಗಗಳು ಚೇತರಿಸಿಕೊಂಡು ಹತ್ತಿರದ ಕಾಡಿಗೆ ಹೋಗಿವು. ಉಳಿದ ಕೆಲವು ಮಂಗಗಳು ಸ್ಥಳದಲ್ಲಿ ಮೃತಪಟ್ಟಿವೆ ಎಂದು ಸ್ಥಳೀಯರು ಹೇಳುತ್ತಿದ್ದಾರೆ.
ಪಶು ಇಲಾಖೆ ಸಿಬ್ಬಂದಿ ಸತ್ತಿರುವ ಮಂಗಗಳ ಕೆಲ ಭಾಗಗಳನ್ನು ಪ್ರಯೋಗಾಲಯಕ್ಕೆ ಪರೀಕ್ಷೆಗೆ ಕಳುಹಿಸಿದ್ದಾರೆ.
