ಕೊಳ್ಳೇಗಾಲ(ಚಾಮರಾಜನಗರ) : ಶಾಸಕ ಎನ್ ಮಹೇಶ್ ವಿರುದ್ಧ ಬಿಎಸ್ಪಿ ಇಲ್ಲಸಲ್ಲದ ಆರೋಪಗಳನ್ನ ಮಾಡುತ್ತಿದೆ. ಇದನ್ನ ಎಂದಿಗೂ ಸಹಿಸೋದಿಲ್ಲ ಅಂತಾ ಎನ್ ಮಹೇಶ್ ಅಭಿಮಾನಿಗಳ ಬಳಗದ ಮುಖಂಡ ಸಿದ್ದರಾಜ ಖಡಕ್ ಆಗಿ ಹೇಳಿದ್ದಾರೆ.
ಮೂರು ದಿನಗಳ ಹಿಂದೆಯಷ್ಟೆ ಸುದ್ದಿಗೋಷ್ಠಿಯಲ್ಲಿ ಎನ್. ಮಹೇಶ್ 20 ಪರ್ಸೆಂಟ್ ಕಮಿಷನ್ ಪಡೆದು ಕಾಮಗಾರಿ ಮಾಡಿಸುತ್ತಾರೆ. ಬಿಎಸ್ಪಿಯಿಂದ ಗೆದ್ದು ಉಚ್ಛಾಟಿತನಾದ ಮೇಲೆ ನಾನು ಸ್ವತಂತ್ರ ಶಾಸಕ ಹಾಗೂ ಪಕ್ಷೇತರ ಶಾಸಕ ಎಂದು ಹೇಳಿಕೆ ನೀಡುತ್ತಾರೆ ಎಂದು ಬಿಎಸ್ಪಿ ಆರೋಪಿಸಿತ್ತು. ಇದಕ್ಕೆ ಶಾಸಕರ ಅಭಿಮಾನಿಗಳ ಬಳಗ ಆಕ್ಷೇಪ ವ್ಯಕ್ತಪಡಿಸಿದೆ.
ಬಿಎಸ್ಪಿ ಅಧಿನಾಯಕಿ ಮಾಯಾವತಿ, ಪಕ್ಷದಿಂದ ಶಾಸಕರನ್ನು ಉಚ್ಛಾಟಿಸಿದ್ದರಿಂದ ಮಹೇಶ್ ಅವರು ಸ್ವತಂತ್ರ ಶಾಸಕ ಎಂದು ಹೇಳಿದ್ದಾರೆ ಅಷ್ಟೇ.. ಆದರೆ, ಎಲ್ಲೂ ಪಕ್ಷೇತರ ಶಾಸಕ ಎಂದು ಹೇಳಿಕೊಂಡಿಲ್ಲ. 20% ಕಮಿಷನ್ ಪಡೆಯುತ್ತಾರೆ ಎಂಬ ಮಾತಿಗೆ ಆಧಾರ ನೀಡಲಿ. ಇಂತಹ ಕೆಟ್ಟ ಆರೋಪ ಮಾಡಿದರೆ ಕಾನೂನು ಹೋರಾಟ ಮಾಡಬೇಕಾಗುತ್ತದೆ.
ಈ ರೀತಿ ಇಲ್ಲಸಲ್ಲದ ಆರೋಪಗಳನ್ನು ಎನ್.ಮಹೇಶ್ ವಿರುದ್ಧ ಬಿಎಸ್ಪಿ ಅಧ್ಯಕ್ಷ ರಾಜಶೇಖರ್ ಮಾಡಬಾರದು. ಇಂತವರ ಮೇಲೆ ಬಿಎಸ್ಪಿ ರಾಜ್ಯ ಮುಖಂಡರು ಕ್ರಮ ತೆಗೆದುಕೊಂಡು ಗಲಭೆಗೆ ಪ್ರೇರೇಪಿಸುವ ಮಾತುಗಳನ್ನಾಡುವವರನ್ನು ಹದ್ದುಬಸ್ತಿನಲ್ಲಿರಿಸಬೇಕು ಎಂದು ಸಿದ್ದರಾಜು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
