ಕೊಳ್ಳೇಗಾಲ (ಚಾಮರಾಜನಗರ) ತಾಲೂಕಿನ ಮಧುವನಹಳ್ಳಿ ಗ್ರಾಮದ ತಿಲಕ್ ರಾಜ್ - ದೀಪು ದಂಪತಿಯ 15 ದಿನದ ಗಂಡು ಮಗು ಕೊರೊನಾದಿಂದ ಗುಣಮುಖವಾಗಿದೆ. ಕೋವಿಡ್ ಕೇರ್ ಸೆಂಟರ್ನಿಂದ ಬಿಡುಗಡೆಯಾಗುವ ಮೂಲಕ ಕೊರೊನಾ ಬಗ್ಗೆ ಜಿಲ್ಲೆಯ ಜನರಿಗಿದ್ದ ಆತಂಕವನ್ನು ಬಹುಪಾಲು ಕಡಿಮೆ ಮಾಡಿ ಆತ್ಮಸ್ಥೈರ್ಯ ಹೆಚ್ಚುವಂತೆ ಮಾಡಿದೆ.
ಮೈಸೂರಿನ ಅರಮನೆಯಲ್ಲಿ ಜೂನಿಯರ್ ಅಸಿಸ್ಟೆಂಟ್ ಆಗಿ ಕಾರ್ಯನಿರ್ವಹಿಸುತ್ತಿದ್ದ ಚಾಮರಾಜನಗರ ತಾಲೂಕಿನ ತಿಲಕ್ ರಾಜ್ ಶೀತ, ನಾಲಿಗೆ ರುಚಿ ಗ್ರಹಿಕೆ ಕಳೆದುಕೊಂಡ ಲಕ್ಷಣಗಳನ್ನು ಗಮನಿಸಿ ಜು. 25 ರಂದು ಕೊಳ್ಳೇಗಾಲದ ಕೊರೊನಾ ತಪಾಸಣಾ ಕೇಂದ್ರದಲ್ಲಿ ಟೆಸ್ಟ್ ಮಾಡಿಸಿದ್ದರಿಂದ ಕೊರೊನಾ ಇರುವುದು ದೃಢವಾಗಿತ್ತು. ತಪಾಸಣೆಗೂ ಮುನ್ನ, ತನ್ನ ಹೆಂಡತಿ-ಮಗುವಿನ ಯೋಗಕ್ಷೇಮ ವಿಚಾರಿಸಲು ಕೊಳ್ಳೇಗಾಲದ ಮಧುವನಹಳ್ಳಿ ಗ್ರಾಮಕ್ಕೆ ಭೇಟಿ ನೀಡಿದ್ದರು. ಈ ವೇಳೆ ತಿಲಕ್ ರಾಜ್ಗೆ ಕೊರೊನಾ ಇರುವುದು ಗೊತ್ತಾಗಿದೆ.
ಆರೋಗ್ಯಾಧಿಕಾರಿಗಳು ತಿಲಕ್ ರಾಜ್ ಅವರ ಹೆಂಡತಿ ಮತ್ತು ಮಗುವಿನ ತಪಾಸಣೆ ಮಾಡಿಸಿದಾಗ ಈ ಇಬ್ಬರಲ್ಲೂ ಕೊರೊನಾ ಇದೆ ಎಂದು ತಿಳಿದು ಭಯವಾಯಿತು. ಆದರೆ, ಇನ್ನಿತರ ನಮ್ಮ ಕುಟುಂಬದ ಸದಸ್ಯರಿಗೆ ನೆಗೆಟಿವ್ ಬಂದಿರುವುದು ತಿಳಿಯಿತು ಎಂದು ದೀಪು ಅವರ ತಂದೆ ಬಸವರಾಜು ಶೆಟ್ಟಿ ಈ ಬಗ್ಗೆ 'ಈಟಿವಿ ಭಾರತ'ದ ಜೊತೆ ಮಾತನಾಡುತ್ತಾ ಮಾಹಿತಿ ನೀಡಿದ್ದಾರೆ.
ಮಗು ಜನನವಾದ 15 ದಿನಗಳ ಬಳಿಕ ನನ್ನ ಗಂಡನಿಗೆ ಕೊರೊನಾ ಇರುವುದು ಗೊತ್ತಾಗಿ ಗಾಬರಿಗೊಂಡೆ, ಆರೋಗ್ಯ ಸಿಬ್ಬಂದಿ ನನ್ನ ಜೊತೆ ಮಗುವಿಗೂ ಕೊರೊನಾ ತಪಾಸಣೆ ನಡೆಸಿದ್ದರಿಂದ ಕೊರೊನಾ ನಮ್ಮಿಬ್ಬರಲ್ಲೂ ಇದೆ ಎಂಬುದು ತಿಳಿದು ನನಗೂ ಆತಂಕವಾಯಿತು. ನವಜಾತ ಶಿಶುವಿಗೂ ಬಂತಲ್ಲ ಇದು ಎಂದು ಕಣ್ಣೀರಿಟ್ಟೆ. ನಂತರ ಮೂವರನ್ನು ಜಿಲ್ಲಾ ಕೋವಿಡ್ ಆಸ್ಪತ್ರೆಗೆ ಸೇರಿಸಲಾಯಿತು. ಅಲ್ಲಿನ ವಾತಾವಾರಣ ಮತ್ತು ಕೊರೊನಾ ಇರುವ ಮಕ್ಕಳನ್ನು ನೋಡಿ ಸ್ವಲ್ಪ ಮಟ್ಟಿಗೆ ನೆಮ್ಮದಿ ಸಿಕ್ಕಿತು. ನಮಗೂ ಕೊರೊನಾ ಗುಣವಾಗುತ್ತದೆ ಎಂಬ ವಿಶ್ವಾಸ ಮೂಡಿತು. 5 ದಿನಗಳ ಕಾಲ ಚಿಕಿತ್ಸೆ ನೀಡಲಾಯಿತು. ನನಗೆ ಮತ್ತು ಮಗುವಿಗೆ ಯಾವುದೇ ಕೊರೊನಾ ಲಕ್ಷಣ ಇರಲಿಲ್ಲ. ವರದಿ ಮಾತ್ರ ಪಾಸಿಟಿವ್ ಬಂತು. ಗುಣವಾದರೆ ಸಾಕು ಎಂದು ದೇವರಲ್ಲಿ ಪ್ರಾರ್ಥಿಸುತ್ತಿದ್ದೆ. 5 ದಿನದ ನಂತರ ಅಲ್ಲಿನ ವೈದ್ಯರು ಗುಣವಾಗಿದ್ದೀರಿ ಎಂದಾಗ ಮನಸ್ಸಿನಲ್ಲಿದ್ದ ಚಿಂತೆ ದೂರವಾಯ್ತು. ಸದ್ಯಕ್ಕೆ 10 ದಿನಗಳ ಹೋಂ ಐಸೋಲೇಷನ್ ಇರಬೇಕೆಂದು ತಿಳಿಸಲಾಗಿತ್ತು. ಇದೀಗ 7 ದಿನ ಮುಗಿದಿದೆ. ಪತಿಯೂ ಕೂಡ ನಿನ್ನೆ ಅಷ್ಟೆ ಆಸ್ಪತ್ರೆಯಿಂದ ಬಿಡುಗಡೆಯಾಗಿದ್ದಾರೆ ಎಂದು ದೀಪು ತಿಲಕ್ ಕುಮಾರ್ ವಿವರಿಸಿದ್ದಾರೆ.
ಕೊರೊನಾ ಕಾಮನ್ ಎನಿಸಿತು:
ಆಸ್ಪತ್ರೆಯಲ್ಲಿದ್ದ ಕೊರೊನಾ ರೋಗಿಗಳ ನೋಡಿ ಸ್ವಲ್ಪ ಭಯ ಹೋಯಿತು. ನಂತರ ಇದೀಗ ನಾವು ಮೂವರು ಗುಣಮುಖರಾಗಿದ್ದೇವೆ. ನಮ್ಮಲ್ಲಿ ಇದೀಗ ಆತ್ಮಬಲ ಹೆಚ್ಚಿದೆ. ಕೊರೊನಾ ಎಲ್ಲರಿಗೂ ಕಾಮನ್ ಆಗಿ ಬರುವ ಕಾಯಿಲೆ. ಡೆಂಗ್ಯೂಗಿಂತ ಏನು ಪರಿಣಾಮಕಾರಿಯಲ್ಲ. ಧೈರ್ಯವಿದ್ದರೆ ಸಾಕು, ಕೊರೊನಾ ಮಣಿಸಬಹುದು ಎಂದು ಮಗುವಿನ ತಾಯಿ ದೀಪು ಆತ್ಮ ವಿಶ್ವಾಸದ ಮಾತುಗಳನ್ನಾಡಿದ್ದಾರೆ.
ಬಿಸಿ ನೀರು ಹಾಗೂ ವಿದ್ಯುತ್ ವ್ಯವಸ್ಥೆಯಿಲ್ಲ:
ಚಾಮರಾಜನಗರ ಕೋವಿಡ್ ಚಿಕಿತ್ಸಾ ಕೇಂದ್ರದಲ್ಲಿ ಬೀಸಿ ನೀರಿನ ವ್ಯವಸ್ಥೆ ಸರಿಯಿಲ್ಲ. ಕುಡಿಯಲು ಮಾತ್ರ ಬಿಸಿ ನೀರಿನ ವ್ಯವಸ್ಥೆ ಮಾಡಲಾಗಿದೆ. ಆದ್ರೆ ನಮ್ಮಂತ ಗರ್ಭಿಣಿ ಮತ್ತು ಬಾಣಂತಿಯರಿಗೆ ಮುಖ-ಕೈ ತೊಳೆಯಲು ಬಿಸಿ‌ನೀರಿನ ಅವ್ಶಶ್ಯಕತೆ ಇರುತ್ತದೆ. ಹಾಗೇ ಶೌಚ ಗೃಹದಲ್ಲೂ ಕೂಡ ವಿದ್ಯುತ್ ವ್ಯವಸ್ಥೆ ಇಲ್ಲ. ಇದರಿಂದ ನಮ್ಮಂತ ರೋಗಿಗಳಿಗೆ ತೊಂದರೆಯಾಗುತ್ತದೆ. ಜಿಲ್ಲಾಡಳಿತ ಈ ವಿಚಾರವನ್ನು ಪರಿಗಣಿಸಿ ಸಮಸ್ಯೆ ನಿವಾರಿಸಬೇಕೆಂದು ಇದೇ ವೇಳೆ ಒತ್ತಾಯಿಸಿದರು.
ಮಗುವಿನ ತಂದೆ ತಿಲಕ್ ರಾಜ್ ಮಾತನಾಡಿ, ಕೊರೊನಾ ಆ್ಯಂಟಿಜೆನ್ ಕಿಟ್ನಿಂದ ಪರೀಕ್ಷೆ ಮಾಡಿಸಿದಾಗ 20 ನಿಮಿಷಗಳಲ್ಲೇ ಮಾಹಿತಿ ತಿಳಿಯಿತು. ನಂತರ ಹೆಂಡತಿ- ಮಗುವಿಗೂ ಇರುವುದು ತಿಳಿದು ಸ್ವಲ್ಪ ಆಂತಕವಾಯಿತು. ಆದ್ರೆ ಕೊರೊನಾಗೆ ದೈರ್ಯವೇ ರಾಮಾಬಾಣ ಎಂಬುದು ನನಗೆ ತಿಳಿದಿದ್ದರಿಂದ ಹೆಂಡತಿ ಮತ್ತು ಆಕೆಯ ಮನೆಯವರಿಗೆ ಧೈರ್ಯ ತುಂಬಿದೆ. ಇದೀಗ ಮೂರು ಜನರು ಗುಣಮುಖರಾಗಿದ್ದೇವೆ. ಜಿಲ್ಲಾಡಳಿತ ಚೆನ್ನಾಗಿಯೇ ಚಿಕಿತ್ಸಾ ವ್ಯವಸ್ಥೆ ರೂಪಿಸಿದೆ. ಆದ್ರೆ ಬಾಣಂತಿ ಮಹಿಳೆಯರಿಗೆ ಬಿಸಿ ನೀರಿನ ಸೌಕರ್ಯ ಸರಿಯಿಲ್ಲ, ಜಿಲ್ಲಾಡಳಿತ ಇದನ್ನು ಸರಿ ಪಡಿಸಬೇಕಿದೆ ಎಂದಿದ್ದಾರೆ.
ಒಟ್ಟಾರೆ ಜಿಲ್ಲೆಯಲ್ಲಿ ಸೋಂಕಿನ ವರದಿ ಹೆಚ್ಚುತ್ತಿದ್ದರು. ಅಷ್ಟೇ ಗುಣಮುಖರಾದವರ ಸಂಖ್ಯೆಯೂ ಅಧಿಕವಾಗಿದೆ. ವಯೋವೃದ್ಧರು ಮತ್ತು ಮಕ್ಕಳು ಗುಣವಾಗುತ್ತಿರುವುದರಿಂದ ಜಿಲ್ಲೆಯ ಜನರಿಗೆ ಕೊರೊನಾ ಆತಂಕ ಬಹುಪಾಲು ಕಡಿಮೆಯಾಗಿದೆ.
