ಬೆಂಗಳೂರು: ಆನ್ಲೈನ್ ಗೇಮ್ಗಳ ಸ್ವರೂಪದ ಕುರಿತಂತೆ ವಿಷಯ ತಜ್ಞರು ನಿರ್ಧರಿಸಬೇಕೇ ಹೊರತು ಸರಕು ಮತ್ತು ಸೇವಾ ತೆರಿಗೆ ಇಲಾಖೆಯ ಅಧಿಕಾರಿಯಲ್ಲ (ಜಿಎಸ್ಟಿ) ಎಂದು ಹೈಕೋರ್ಟ್ ಅಭಿಪ್ರಾಯಪಟ್ಟಿದೆ.
ಆನ್ಲೈನ್ ಗೇಮಿಂಗ್ಗಳಿಗೆ 21 ಸಾವಿರ ಕೋಟಿ ತೆರಿಗೆ ಪಾವತಿಸುವಂತೆ ನೋಟಿಸ್ ಜಾರಿ ಮಾಡಿದ್ದ ಸರಕು ಮತ್ತು ಸೇವಾ ತೆರಿಗೆ ಇಲಾಖೆಯ (ಜಿಎಸ್ಟಿ) ಗುಪ್ತಚರ ನಿರ್ದೇಶನಾಲಯದ ಕ್ರಮವನ್ನು ಗೇಮ್ಸ್ ಕ್ರಾಫ್ಟ್ ಟೆಕ್ನಾಲಜೀಸ್ ಪ್ರೈವೇಟ್ ಪ್ರಶ್ನಿಸಿ ನ್ಯಾಯಾಲಯಕ್ಕೆ ಅರ್ಜಿ ಸಲ್ಲಿಸಿತ್ತು. ಈ ಬಗ್ಗೆ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಎಸ್.ಆರ್.ಕೃಷ್ಣಕುಮಾರ್ ಅವರಿದ್ದ ನ್ಯಾಯಪೀಠ, ಆನ್ಲೈನ್ ಗೇಮಿಂಗ್ ಅವಕಾಶದ ಆಟ ಎಂಬುದಾಗಿ ಪರಿಗಣಿಸಲಾಗಿದೆಯೇ ಎಂದು ಪ್ರಶ್ನಿಸಿತು.
ತೆರಿಗೆ ಅಧಿಕಾರಿಗಳು ಗೇಮಿಂಗ್ ಕುರಿತಂತೆ ಏನು ಗೊತ್ತು. ಗೇಮ್ಗಳ ಸ್ವರೂಪವನ್ನು ಅಧಿಕಾರಿಗಳು ಹೇಗೆ ನಿರ್ಧರಿಸಲು ಸಾಧ್ಯ. ಅದಕ್ಕೆ ಸಂಬಂಧಿಸಿದಂತೆ ಅಧಿಕಾರಿಗಳಿಗೆ ಮಾಹಿತಿ ಇದಿಯೇ. ಇದನ್ನು ಪರಿಣಿತರ ನಿರ್ಧರಿಸಬೇಕಲ್ಲವೇ ಎಂದು ಪ್ರಶ್ನಿಸಿತು. ಈ ವೇಳೆ ತೆರಿಗೆ ಇಲಾಖೆಯ ಪರವಾಗಿ ಹಾಜರಾಗಿದ್ದ ಡೆಪ್ಯೂಟಿ ಸಾಲಿಸೇಟರ್ ಜನರಲ್ ಎನ್. ವೆಂಕಟರಾಮನ್, ತೆರಿಗೆ ವಿಧಿಸುವುದಕ್ಕಾಗಿ ಜಾರಿ ಮಾಡಿರುವ ನೋಟಿಸ್ನಲ್ಲಿ ಸಂಪೂರ್ಣ ವಿವರಗಳನ್ನು ನೀಡಲಾಗಿದೆ ಎಂದು ವಿವರಿಸಿದರು.
ಇದಕ್ಕೂ ಮುನ್ನ ವಾದ ಮಂಡಿಸಿದ ಹಿರಿಯ ವಕೀಲ ಅಭಿಷೇಕ್ ಮನು ಸಿಂಘ್ವಿ, ಸ್ಕಿಲ್ ಗೇಮ್ಗಳಿಗೆ ಸಂಬಂಧಿಸಿದಂತೆ ವಿವಿಧ ನ್ಯಾಯಾಲಯಗಳು ನೀಡಿರುವ ತೀರ್ಪುಗಳನ್ನು ವಿವರಿಸಿದರು. ಆನ್ಲೈನ್ ರಮ್ಮಿ ಗೇಮಿಂಗ್ನಲ್ಲಿ ಶೇ. 96ಕ್ಕೂ ಹೆಚ್ಚು ಗೇಮ್ಗಳನ್ನು ಹಮ್ಮಿಕೊಳ್ಳುತ್ತಿದ್ದು, ಅವುಗಳು ಕೌಶಲ್ಯದ ಆಟಗಳು ಎಂದು ಪರಿಗಣಿಸಲಾಗಿದೆ. ಅದು ಅವಕಾಶದ ಆಟವಲ್ಲ. ಹೀಗಾಗಿ ಸೆ.8ರಂದು ನೀಡಿರುವ ನೋಟಿಸ್ ಕಾನೂನು ಬಾಹಿರ. ಶೇ.28 ರಷ್ಟು ತೆರಿಗೆ ವಿಧಿಸುವುದು ನಿರ್ಬಂಧಿಸಬೇಕು ಎಂದು ನ್ಯಾಯಪೀಠಕ್ಕೆ ಮನವಿ ಮಾಡಿದರು.
ಅಲ್ಲದೆ, ಈ ವೇದಿಕೆಯಿಂದ ಸುಮಾರು 1500 ಕೋಟಿ ರು.ಗಳ ತೆರಿಗೆ ಪಾವತಿ ಮಾಡಲಾಗಿದೆ. ಹೀಗಿದ್ದರೂ, 21 ಸಾವಿರ ಕೋಟಿ ರು.ಗಳನ್ನು ಪಾವತಿಸುವಂತೆ ನೋಟಿಸ್ ನೀಡಲಾಗಿದೆ ಎಂದು ವಿವರಿಸಿದರು. ಪ್ರಕರಣದಲ್ಲಿ ಅರ್ಜಿದಾರರ ಪರವಾಗಿ ಹಿರಿಯ ವಕೀಲರಾದ ಮುಕುಲ್ ರೋಹ್ಟಗಿ ಮತ್ತು ಅರವಿಂದ ದತ್ತಾರ್ ವಾದ ಮಂಡಿಸಲಿದ್ದಾರೆ.
ಓದಿ: ವಿಡಿಯೋ ಗೇಮ್ನಿಂದ ಮಕ್ಕಳ ಬ್ರೈನ್ ಆಗುತ್ತೆ ಸೂಪರ್ ಆ್ಯಕ್ಟಿವ್ !
