ಬೆಂಗಳೂರು: ಕರ್ನಾಟಕ ಮತ್ತು ಸೌರಾಷ್ಟ್ರ ಮಧ್ಯೆ ನಡೆಯುತ್ತಿರುವ 2ನೇ ಸೆಮಿಫೈನಲ್ ಪಂದ್ಯ ಕುತೂಹಲಘಟ್ಟ ತಲುಪಿದೆ. ರಾಜ್ಯ ತಂಡದ ನಾಯಕ ಮಯಾಂಕ್ ಅಗರ್ವಾಲ್ ದ್ವಿಶತದ ಏಕಾಂಗಿ ಹೋರಾಟದಿಂದ 407 ರನ್ ಗುರಿ ನೀಡಿತ್ತು. ಇದಕ್ಕುತ್ತರವಾಗಿ ಬ್ಯಾಟಿಂಗ್ ನಡೆಸಿದ ಸೌರಾಷ್ಟ್ರ ಆರಂಭಿಕ ಹಿನ್ನಡೆಯನ್ನು ಮೀರಿ ಶೆಲ್ಡನ್ ಜಾಕ್ಸನ್, ನಾಯಕ ಅರ್ಪಿತ್ ವಸವದ ಶತಕದ ನೆರವಿನಿಂದ 4 ವಿಕೆಟ್ಗೆ 364 ರನ್ ಗಳಿಸಿದ್ದು, ಬೃಹತ್ ಮೊತ್ತದತ್ತ ದಾಪುಗಾಲಿಟ್ಟಿದೆ.
ಇಲ್ಲಿನ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಪಂದ್ಯದಲ್ಲಿ ಸೌರಾಷ್ಟ್ರ ಮೂರನೇ ದಿನದಾಟದಲ್ಲಿ ಉತ್ತಮ ಆಟವಾಡುವ ಮೂಲಕ ಪೂರ್ಣ ಶ್ರೇಯಾಂಕ ಪಡೆಯಿತು. ಎರಡನೇ ದಿನದ ಕೊನೆಯಲ್ಲಿ 76 ಕ್ಕೆ 2 ವಿಕೆಟ್ ಕಿತ್ತು ಅಲ್ಪಮೊತ್ತಕ್ಕೆ ಕಟ್ಟಿಹಾಕುವ ಕರ್ನಾಟಕದ ಯೋಜನೆಯನ್ನು ನಾಯಕ ಅರ್ಪಿತ್ ವಸವದ ಮತ್ತು ಶೆಲ್ಡನ್ ಜಾಕ್ಸನ್ ಬುಡಮೇಲು ಮಾಡಿದರು. ಹರ್ವಿಕ್ ದೇಸಾಯಿ ಜೊತೆಗೂಡಿ ಮೂರನೇ ದಿನದಾಟ ಆರಂಭಿಸಿದ ಜಾಕ್ಸನ್ ರನ್ ಪೇರಿಸಲು ಶುರು ಮಾಡಿದರು. ಇದೇ ವೇಳೆ ಕೌಶಿಕ್ ಎಸೆತದಲ್ಲಿ ಹರ್ವಿಕ್ ಔಟಾದರು.
ದ್ವಿಶತಕದ ಜೊತೆಯಾಟ: ಬಳಿಕ ಜೊತೆಗೂಡಿದ ಶೆಲ್ಡನ್ ಜಾಕ್ಸನ್ ಮತ್ತು ನಾಯಕ ಅರ್ಪಿತ್ ವಸವದ ಕರ್ನಾಟಕ ಬೌಲರ್ಗಳನ್ನು ಸುಸ್ತು ಮಾಡಿದರು. ಭರ್ಜರಿ ಬ್ಯಾಟ್ ಬೀಸಿದ ಜಾಕ್ಸನ್ 245 ಎಸೆತಗಳಲ್ಲಿ 23 ಬೌಂಡರಿ, 2 ಸಿಕ್ಸರ್ ಸಮೇತ 160 ರನ್ ಮಾಡಿದರು. ಇನ್ನೊಂದು ತುದಿಯಲ್ಲಿ ನಾಯಕ ಅರ್ಪಿತ್ 219 ಎಸೆತಗಳಲ್ಲಿ 15 ಬೌಂಡರಿಗಳಿದ್ದ 112 ರನ್ ಮಾಡಿದರು. ಇಬ್ಬರೂ ಸೇರಿ 232 ರನ್ಗಳ ದ್ವಿಶತಕದ ಜೊತೆಯಾಟವಾಡಿದರು.
ದ್ವಿಶತಕದತ್ತ ಮುನ್ನುಗ್ಗುತ್ತಿದ್ದ ಜಾಕ್ಸನ್ ಓಟಕ್ಕೆ ದಿನದಾಟ ಮುಗಿಯಲು 13 ಓವರ್ ಬಾಕಿ ಇದ್ದಾಗ ಸ್ಪಿನ್ನರ್ ಕೆ. ಗೌತಮ್ ಬ್ರೇಕ್ ಹಾಕಿದರು. ಇಬ್ಬರು ಆಟಗಾರರ ಶತಕದಿಂದ ಸೌರಾಷ್ಟ್ರ 43 ರನ್ಗಳ ಹಿನ್ನಡೆಯಲ್ಲಿದ್ದು, ಇನ್ನೂ ಎರಡು ದಿನ ಆಟ ಬಾಕಿ ಉಳಿದಿದೆ. 6 ವಿಕೆಟ್ಗಳು ಕೈಯಲ್ಲಿದ್ದು ದೊಡ್ಡ ಮೊತ್ತ ಪೇರಿಸುವ ಗುರಿ ಹೊಂದಿದೆ. ಚಿರಾಗ್ ಜಾನಿ (ಔಟಾಗದೆ 19) ಮತ್ತು ಅರ್ಪಿತ್ ಔಟಾಗದೇ 112 ರನ್ ಗಳಿಸಿ ಕ್ರೀಸ್ ನಾಳೆಗೆ ಕ್ರೀಸ್ ಕಾಯ್ದುಕೊಂಡಿದ್ದಾರೆ.
ರಾಜ್ಯಕ್ಕೆ ದಿನದಲ್ಲಿ ಸಿಕ್ಕಿದ್ದು 2 ವಿಕೆಟ್: ಮೂರನೇ ದಿನದಾಟದಲ್ಲಿ ಪಿಚ್ ಸ್ಪಿನ್ನರ್ಗಳಿಗೆ ನೆರವು ನೀಡಲಿದೆ ಎಂದು ಭಾವಿಸಲಾಗಿತ್ತು. ಸ್ಪಿನ್ನರ್ ಕೆ.ಗೌತಮ್ ಮತ್ತು ಶ್ರೇಯಸ್ ಗೋಪಾಲ್ ಮೇಲೆ ಹೆಚ್ಚಿನ ನಿರೀಕ್ಷೆ ಹೊಂದಲಾಗಿತ್ತು. ಆದರೆ, 90 ಓವರ್ಗಳ ದಿನದಾಟದಲ್ಲಿ ರಾಜ್ಯ ತಂಡಕ್ಕೆ ಸಿಕ್ಕಿದ್ದು ಕೇವಲ 2 ವಿಕೆಟ್ ಮಾತ್ರ. ಅದು ಭರ್ಜರಿ ಬ್ಯಾಟ್ ಮಾಡಿ ಶತಕ ಸಿಡಿಸಿದ ಜಾಕ್ಸನ್ ಮತ್ತು ನಿನ್ನೆ ವಿಕೆಟ್ ಕಾಯ್ದುಕೊಂಡಿದ್ದ ಹರ್ವಿಕ್ ದೇಸಾಯಿ.
ಜಾಕ್ಸನ್ ಮತ್ತು ಅರ್ಪಿತ್ ಜೊತೆಯಾಟ ಮುರಿಯಲು ನಾಯಕ ಮಯಾಂಕ್ ಪದೇ ಪದೇ ಬೌಲರ್ಗಳನ್ನು ಬದಲಾಯಿಸಿದರೂ ಯಾವುದೇ ಫಲ ನೀಡಲಿಲ್ಲ. ಕೊನೆಯಲ್ಲಿ ಜಾಕ್ಸನ್ ವಿಕೆಟ್ ಪಡೆದು, ಕೊಂಚ ನಿಟ್ಟುಸಿರು ಬಿಡಬೇಕಾಯಿತು. ಆಫ್ ಸ್ಪಿನ್ನರ್ ಕೃಷ್ಣಪ್ಪ ಗೌತಮ್ 22 ಓವರ್ ಎಸೆದು 68 ರನ್ ನೀಡಿ 1 ವಿಕೆಟ್ ಪಡೆದರೆ, ಶ್ರೇಯಸ್ ಗೋಪಾಲ್ 11 ಓವರ್ನಲ್ಲಿ 58 ರನ್ ನೀಡಿದರೂ ವಿಕೆಟ್ ಪಡೆಯಲಿಲ್ಲ. ವಿದ್ವತ್ ಕಾವೇರಪ್ಪ 2 ವಿಕೆಟ್ ಪಡೆದರು.
ಇನ್ನು, ಕರ್ನಾಟಕ ತಂಡ ಬ್ಯಾಟಿಂಗ್ನಲ್ಲೂ ವೈಫಲ್ಯ ಅನುಭವಿಸಿತ್ತು. ನಾಯಕ ಮಯಾಂಕ್ ಅಗರ್ವಾಲ್ ಏಕಾಂಗಿಯಾಗಿ ಹೋರಾಡಿ 249 ರನ್ ಗಳಿಸಿದ್ದರು. ವಿಕೆಟ್ ಕೀಪರ್ ಶ್ರೀನಿವಾಸ್ ಶರತ್ 66 ರನ್ ಗಳಿಸಿ ಸಾಥ್ ನೀಡಿದ್ದು ಬಿಟ್ಟರೆ, ಯಾವೊಬ್ಬ ಬ್ಯಾಟರ್ನಿಂದ ದೊಡ್ಡ ಮೊತ್ತ ಬರಲಿಲ್ಲ. ಇನ್ನೆರಡು ದಿನ ಆಟ ಬಾಕಿ ಇದ್ದು, ಸೌರಾಷ್ಟ್ರ ಮುನ್ನಡೆ ಸಾಧಿಸುವ ಎಲ್ಲ ಸೂಚನೆ ಇದೆ. ಒಂದು ವೇಳೆ ಪಂದ್ಯ ಡ್ರಾ ಆದರೂ ಕರ್ನಾಟಕ ಫೈನಲ್ ರೇಸ್ನಿಂದ ಹೊರಬೀಳಲಿದೆ.
ಸಂಕ್ಷಿಪ್ತ ಸ್ಕೋರ್: ಕರ್ನಾಟಕ ಮೊದಲ ಇನಿಂಗ್ಸ್: 133.3 ಓವರ್ಗಳಲ್ಲಿ 407/10 (ಮಯಾಂಕ್ 249, ಶರತ್ 66, ಚೇತನ್ ಸಕಾರಿಯಾ 3/73, ಕುಶಾಂಗ್ ಪಟೇಲ್ 3/109).
ಸೌರಾಷ್ಟ್ರ ಮೊದಲ ಇನಿಂಗ್ಸ್: 112 ಓವರ್ಗಳಲ್ಲಿ 4 ವಿಕೆಟ್ಗೆ 364 (ಶೆಲ್ಡನ್ ಜಾಕ್ಸನ್ 160, ಅರ್ಪಿತ್ ವಸವದ ಅಜೇಯ 112: ವಿದ್ವತ್ ಕಾವೇರಪ್ಪ 2/64).
ಇದನ್ನೂ ಓದಿ: ರೋಹಿತ್ ಶತಕ, ಜಡೇಜಾ- ಅಕ್ಷರ್ ಫಿಫ್ಟಿ: ಭಾರತ 7 ವಿಕೆಟ್ಗೆ 321 ರನ್
