ಪಾಣಿಪತ್: ಕಾರು ಅಪಘಾತದಲ್ಲಿ ಗಾಯಗೊಂಡು ರಸ್ತೆ ಬದಿ ಬಿದ್ದಿದ್ದ ಭಾರತದ ಕ್ರಿಕೆಟಿಗ ರಿಷಬ್ ಪಂತ್ ಅವರನ್ನು ಅದೇ ಮಾರ್ಗವಾಗಿ ಹೋಗುತ್ತಿದ್ದ ಬಸ್ ಚಾಲಕ ರಕ್ಷಿಸಿ, ಆಸ್ಪತ್ರೆಗೆ ದಾಖಲು ಮಾಡಿದ್ದರು. ಆಪತ್ಬಾಂಧವನಂತೆ ಬಂದು ಕಾಪಾಡಿದ ಬಸ್ ಚಾಲಕ ಮತ್ತು ನಿರ್ವಾಹಕನನ್ನು ಸಾರಿಗೆ ಇಲಾಖೆ ಪ್ರಮಾಣಪತ್ರ ನೀಡಿ ಪ್ರಶಂಸಿಸಿದೆ.
ಸುಶೀಲ್, ಕ್ರಿಕೆಟಿಗನನ್ನು ಅಪಾಯದಿಂದ ಪಾರು ಮಾಡಿ ಜೀವ ಉಳಿಸಿದ ಬಸ್ ಚಾಲಕ. ಹರಿಯಾಣದ ಸಾರಿಗೆ ಇಲಾಖೆಯಲ್ಲಿ ಕೆಲಸ ಮಾಡುತ್ತಿರುವ ಅವರು, ಪಾಣಿಪತ್ ವಿಭಾಗಕ್ಕೆ ಸೇರಿದ್ದಾರೆ. ಆಪತ್ಬಾಂಧವ ಸುಶೀಲ್ ಕರ್ನಾಲ್ನ ಬಲ್ಲಾ ಗ್ರಾಮದ ನಿವಾಸಿಯಾಗಿದ್ದಾರೆ. ಒಂದು ತಿಂಗಳಿನಿಂದ ಪಾಣಿಪತ್ ಹರಿದ್ವಾರ ಮಾರ್ಗದ ಬಸ್ ಚಾಲಕನಾಗಿ ಕೆಲಸ ಮಾಡುತ್ತಿದ್ದಾರೆ.
ತಮ್ಮ ಮನೆಗೆ ಹೊರಟಿದ್ದ ಕ್ರಿಕೆಟಿಗ ರಿಷಬ್ ಪಂತ್ ರಸ್ತೆ ಅಪಘಾತದಲ್ಲಿ ಗಾಯಗೊಂಡಿದ್ದಾಗ, ಅವರ ರಕ್ಷಣೆಗೆ ಬಂದು ಆಂಬ್ಯುಲೆನ್ಸ್ಗೆ ಕರೆ ಮಾಡಿ ಆಸ್ಪತ್ರೆಗೆ ದಾಖಲಿಸಿದ ಮತ್ತು ಘಟನೆಯ ಭೀಕರತೆಯನ್ನು ಚಾಲಕ ಸುಶೀಲ್ ಅವರು ಈಟಿವಿ ಭಾರತ್ ಜೊತೆ ಮಾತನಾಡಿ ಹಂಚಿಕೊಂಡಿದ್ದಾರೆ.
ಸುಶೀಲ್ ಮಾತಲ್ಲಿ ಘಟನೆ ಹೀಗಿತ್ತು: 5.20 ರ ಸುಮಾರಿನಲ್ಲಿ ಹರಿದ್ವಾರದಿಂದ ಪಾಣಿಪತ್ಗೆ ಹೊರಟಿದ್ದೆವು. ಗುರುಕುಲ ಪ್ರದೇಶದಲ್ಲಿ ಕಾರು ರಭಸವಾಗಿ ಬಂದು ಡಿವೈಡರ್ಗೆ ಗುದ್ದಿ ಬೆಂಕಿ ಹೊತ್ತಿಕೊಂಡಿತು. ಕಾರು ಬಸ್ಸಿನ ಸ್ವಲ್ಪ ದೂರದಲ್ಲೇ ಬಿದ್ದಿತು. ಅದೃಷ್ಟವಶಾತ್ ಡಿಕ್ಕಿಯಾಗಲಿಲ್ಲ. ಅಪಘಾತದ ಬಳಿಕ ಕಾರಿನಿಂದ ಒಬ್ಬರು ಹೊರಗೆ ಹಾರಿದರು. ಇದನ್ನು ಕಂಡ ತಕ್ಷಣ ಬಸ್ ನಿಲ್ಲಿಸಿ, ಕಾರಿನ ಬಳಿಗೆ ತೆರಳಿದೆವು. ಇದ್ದಕ್ಕಿದ್ದಂತೆ ಕಾರಿನ ಹಿಂಭಾಗ ಬೆಂಕಿ ಆವರಿಸಿಕೊಂಡಿತು.
ರಸ್ತೆ ಪಕ್ಕ ಬಿದ್ದಿದ್ದ ವ್ಯಕ್ತಿಯನ್ನು ಕೂಗಿದಾಗ ಆತ ಮಾತನಾಡಲಿಲ್ಲ. ಬಳಿಕ ಸಾವರಿಸಿಕೊಂಡು, ನಾನು ಭಾರತೀಯ ಕ್ರಿಕೆಟಿಗ ರಿಷಭ್ ಪಂತ್ ಎಂದು ಪರಿಚಯಿಸಿಕೊಂಡ. ಕಾರಲ್ಲಿ ಯಾರಾದರೂ ಇದ್ದಾರೆಯೇ ಎಂದು ಕೇಳಿದೆವು. ಇಲ್ಲ, ನಾನೊಬ್ಬನೇ ಇದ್ದೇನೆ ಎಂದು ಪಂತ್ ಹೇಳಿದರು. ಗಾಯಗೊಂಡ ಪಂತ್ರನ್ನು ರಸ್ತೆ ಪಕ್ಕಕ್ಕೆ ಕರೆದೊಯ್ದು ಕುಳ್ಳಿರಿಸಿ, ಬಸ್ಸಲ್ಲಿದ್ದ ಹೊದಿಕೆಯನ್ನು ತಂದು ಆತನಿಗೆ ನೀಡಿದೆವು.
ತಕ್ಷಣವೇ ನಮ್ಮ ಕಂಡಕ್ಟರ್ ಆಂಬ್ಯುಲೆನ್ಸ್ ಕರೆ ಮಾಡಿ ಮಾಹಿತಿ ನೀಡಿದರು. ಬಳಿಕ ಡಿಪೋಗೆ ಮಾಹಿತಿ ನೀಡಿದೆವು. ಈ ವೇಳೆ ಪಂತ್ ಅವರು, ತಮ್ಮ ಮನೆಗೆ ಕರೆ ಮಾಡಲು ಕೋರಿದರು. ಆದರೆ, ಅವರ ತಾಯಿಯ ಸಂಪರ್ಕ ಸಾಧ್ಯವಾಗಲಿಲ್ಲ. ಇದಾದ ಬಳಿಕ ನೀರು ಕುಡಿಸಿದೆವು. 15 ನಿಮಿಷದ ಬಳಿಕ ಆಂಬ್ಯುಲೆನ್ಸ್ ಸ್ಥಳಕ್ಕೆ ತಲುಪಿತು. ರಿಷಬ್ ಪಂತ್ರನ್ನು ಅದರಲ್ಲಿ ಸಾಗಿಸಿ, ಈತ ನಮ್ಮ ದೇಶದ ಕ್ರಿಕೆಟಿಗ ರಿಷಭ್ ಪಂತ್, ಕಾರು ಅಪಘಾತವಾಗಿ ಗಾಯಗೊಂಡಿದ್ದಾರೆ. ತಕ್ಷಣವೇ ಅವರನ್ನು ಉತ್ತಮ ಆಸ್ಪತ್ರೆಗೆ ಕರೆದೊಯ್ಯಲು ಆಂಬ್ಯುಲೆನ್ಸ್ ಚಾಲಕನಿಗೆ ತಿಳಿಸಿದೆವು.
ಬಳಿಕ ವಾಹನ ತೆರಳಿದ ಮೇಲೆ ನಾವು ಅಲ್ಲಿಂದ ಬಸ್ ಹತ್ತಿ ಹೊರಟೆವು. ಬಸ್ನಲ್ಲಿದ್ದ ಪ್ರಯಾಣಿಕರು ಕೂಡ ಇದೇ ವೇಳೆ ನೆರವಿಗೆ ಬಂದರು. ಅಪಘಾತದಿಂದ ಚೆಲ್ಲಾಪಿಲ್ಲಿಯಾಗಿದ್ದ ಬಿದ್ದಿದ್ದ ಪಂತ್ರ ವಸ್ತು, ಹಣವನ್ನು ಶೇಖರಿಸಿ ಕೊಟ್ಟರು ಎಂದು ಆಪತ್ಬಾಂಧವ ಸುಶೀಲ್ ತಿಳಿಸಿದರು.
ಸಾರಿಗೆ ಇಲಾಖೆಯಿಂದ ಪ್ರಶಂಸೆ: ಭಾರತೀಯ ಯುವ ಕ್ರಿಕೆಟಿಗನ ರಕ್ಷಣೆಗೆ ಧಾವಿಸಿದ ಚಾಲಕ ಮತ್ತು ನಿರ್ವಾಹಕರನ್ನು ಸಾರಿಗೆ ಇಲಾಖೆಯ ಪಾಣಿಪತ್ ವಿಭಾಗದಿಂದ ಪ್ರಶಂಸಿಸಲಾಗಿದೆ. ಸಮಯಪ್ರಜ್ಞೆ ಮೆರೆದ ಸಿಬ್ಬಂದಿಯನ್ನು ಅಲ್ಲಿನ ಅಧಿಕಾರಿಗಳು ಹೊಗಳಿದಿದ್ದಾರೆ. ಅವರಿಗೆ ರಾಜ್ಯಮಟ್ಟದ ಗೌರವ ಸಲ್ಲಬೇಕು ಎಂದು ಪ್ರಶಂಸಾ ಪತ್ರ ನೀಡಿದ್ದಾರೆ.
ಓದಿ: ಕ್ರಿಕೆಟಿಗ ರಿಷಭ್ ಪಂತ್ ಕಾರು ಅಪಘಾತ : ವಾಹನ ಸಂಪೂರ್ಣ ಭಸ್ಮ.. ಡೆಹ್ರಾಡೂನ್ ಆಸ್ಪತ್ರೆಗೆ ಶಿಫ್ಟ್
